O PSOE da Guarda esixe a reparación ou retirada dos colectores soterrados do porto

O Grupo Municipal Socialista da Guarda vén de presentar no Concello unha moción para esixir actuacións urxentes ante a situación de deterioro e abandono dos colectores soterrados situados na zona do porto.

Durante anteriores mandatos, o goberno municipal apostou por un modelo de colectores soterrados, especialmente en contornos de alto valor como o porto, co obxectivo de mellorar a estética urbana, reducir os malos olores e ofrecer unha solución máis limpa, accesible e respectuosa co medio. Un investimento que, para os socialistas, contribuíu a modernizar a imaxe da vila e a adaptala ás necesidades da veciñanza e das persoas que nos visitan.

Colectores no porto da Guarda

Con todo, o actual equipo de goberno decidiu deixar fóra de funcionamento tanto os colectores desta zona como os da rúa Julia Vaquero, argumentando un suposto custo de mantemento elevado. A falta de conservación derivou nunha situación crítica: o afundimento das chapas metálicas que cobren os colectores obrigou recentemente á Policía Local a precintar a zona ante o risco para as persoas.

“Non só está en xogo a seguridade da cidadanía, senón tamén a imaxe que A Guarda proxecta. O porto é un espazo emblemático que non pode ofrecer un aspecto de abandono e desleixo”, sinalan desde o Grupo Socialista.

O PSOE da Guarda considera inadmisible que unhas infraestruturas públicas financiadas con fondos de todas e todos estean a deteriorarse sen que o Concello actúe. Por iso, a moción presentada propón un acordo claro: que o goberno municipal actúe de inmediato para reparar e poñer en funcionamento os colectores, ou que, no caso de non querer recuperalos, proceda á súa retirada definitiva e segura da vía pública.

“O que non se pode permitir é que sigan precintados no medio dunha zona pública tan sensible, sen función algunha e xerando riscos e unha imaxe deplorable”, conclúen.

Desde o Grupo Municipal Socialista lembran que os colectores soterrados son unha solución moderna, eficiente e perfectamente viable se hai vontade política e unha xestión responsable. E engaden que non actuar sería unha mostra máis da deixadez e falta de proxecto do actual goberno local.

O PSOE da Guarda abstense na votación sobre a licitación da piscina pola falta de garantías e transparencia do goberno local.

O Grupo Municipal Socialista da Guarda decidiu absterse na votación da proposta do goberno local para licitar novamente a obra de reforma da piscina municipal, ante a existencia dun informe desfavorable da intervención municipal, que alerta de riscos económicos graves para o Concello.

Desde o PSOE explican que, como forza política responsable, non poden apoiar unha proposta que inclúe o levantamento dun reparo suspensivo de intervención, cando os propios informes técnicos indican que non está garantida a financiación total da obra nin os prazos que esixe a subvención europea do millón e medio de euros.

Exterior da piscina municipal

Pero ademais, denuncian con total claridade que o goberno local mentiu descaradamente aos grupos da oposición cando se lles preguntou como pensaban cubrir o sobrecusto de máis de medio millón de euros que supuxo a revisión do proxecto da piscina.

"A resposta que se nos deu foi que ese diñeiro viría do Fondo de Cooperación Local da Xunta. Pero agora, grazas ao informe de intervención, descubrimos que iso non era certo: ese diñeiro non está concedido, non hai resolución firme, e o único que fixeron foi presentar unha solicitude. E presentar unha solicitude non é o mesmo que ter os cartos."

"Nós non estamos aquí para validar chapuzas nin improvisacións. E tampouco para acabar nun xulgado dentro duns anos por levantar un reparo de intervención que claramente advirte de que este procedemento non cumpre os requisitos. A responsabilidade política, e se é o caso tamén legal, será exclusivamente do equipo de goberno", sinalan desde o Grupo Socialista.

A portavoz socialista, Fátima Rodríguez, insiste en que a abstención non foi en ningún caso un freo á obra da piscina, que consideran necesaria e urxente para A Guarda. "A nosa abstención foi unha forma de dicir 'si' ao proxecto pero 'non' a esta forma de gobernar. A veciñanza merece obras ben feitas, ben financiadas e sen riscos para as contas municipais."

Desde o PSOE lembran, ademais, que todo este proceso podería terse evitado se o goberno local tivese actuado con máis antelación e responsabilidade: "Se se puxeran mans á obra cando tocaba, e se xestionasen as cousas con planificación e rigor, hoxe non estariamos nesta situación. Pero a improvisación e a falta de seriedade teñen consecuencias, e lamentablemente quen paga é A Guarda. Por non falar da inxente cantidade de plenos extraordinarios que están a convocar, co gasto que iso supón para o Concello".

O outro grupo da oposición tamén decidiu absterse, deixando en evidencia o illamento do goberno local nesta votación clave, e o malestar xeneralizado pola forma na que se está a xestionar un proxecto que debera ser motivo de consenso, non de polémica.

O PP e Fariñas dan as costas ás familias que piden máis seguridade no Skatepark.

O Grupo Municipal Socialista lamenta profundamente que o equipo de goberno, formado polo PP e Fariñas, rexeitase no último pleno a moción que propoñía restrinxir o acceso e estacionamento de vehículos na zona situada entre a pista de skatepark e a pista multideportiva do porto da Guarda durante as fins de semana.

A moción, presentada polo Grupo Socialista, tiña como obxectivo garantir a seguridade dos nenos e nenas que utilizan esa zona de maneira habitual, especialmente durante os días de maior afluencia. Esta área é un espazo de convivencia e xogo ao aire libre, onde moitas familias da vila acoden para que as crianzas practiquen deporte e socialicen. Con todo, a presenza de vehículos en tránsito ou aparcados supón un risco claro, xa que calquera despiste ou pelota fuxida pode ter consecuencias graves.

Zona da pista de Skate

A voceira socialista, Fátima Rodríguez, subliñou que “resulta incomprensible que o equipo de goberno prefira priorizar a circulación de vehículos antes que a seguridade dos nenos e nenas que utilizan esta zona”. Engadiu que “o argumento de que van facer unha intervención na zona da Atalaia non debería ser excusa para non tomar medidas urxentes e necesarias neste punto tan sensible, sobre todo cando son as propias familias as que o reclaman”.

Desde o Grupo Municipal Socialista, consideramos que a decisión de rexeitar esta moción é unha mostra de irresponsabilidade por parte do equipo de goberno, que demostra así a súa falta de vontade para atender as demandas veciñais en materia de seguridade.

O Grupo Socialista reafirma o seu compromiso de seguir traballando para que as voces das familias sexan escoitadas e para que se adopten as medidas necesarias que garantan a seguridade das crianzas nos espazos de lecer e convivencia da nosa vila.

O Grupo Socialista acada o apoio do pleno nas súas mocións sobre o xabarín e o Camiño de Santiago.

O Pleno do Concello da Guarda, celebrado o pasado 28 de maio, aprobou dúas mocións presentadas polo Grupo Municipal Socialista que buscan dar resposta ás demandas da veciñanza e reforzar a imaxe da Guarda como municipio acolledor.

A primeira das mocións, relativa ao control da presenza de xabarís no Trega, recolle a preocupación manifestada polos veciños e veciñas da contorna do monte polos incidentes e danos provocados por esta especie. A proposta socialista insta ao Concello a solicitar formalmente á Xunta de Galicia a instalación de gaiolas-trampa no Monte Trega, unha medida que permitiría capturar de maneira selectiva e controlada os exemplares problemáticos, sen recorrer a métodos máis agresivos e garantindo así a seguridade da poboación e a protección das fincas.

A segunda moción aprobada aborda a mellora da sinalización do Camiño Portugués da Costa no tramo de entrada á Guarda. O texto destaca as dificultades que atopan moitos peregrinos e peregrinas ao chegar a puntos de desembarco non oficiais, como a praia da Lamiña, onde non existen indicacións claras para retomar o trazado oficial do Camiño. A moción insta ao Concello a instalar sinalización axeitada e visible nestes puntos, así como a mellorar a sinalización existente en zonas como a Pasaxe, o Codesal, o Muíño e a senda litoral.

A voceira do Grupo Municipal Socialista, Fátima Rodríguez, salientou que a aprobación destas mocións “amosa que a nosa labor como oposición vai máis alá de fiscalizar: tamén queremos ser proactivos/as, propoñendo medidas concretas que atendan ás preocupacións da veciñanza e que contribúan a mellorar a convivencia e a imaxe do noso concello”. Engadiu, ademais, que “desde o Grupo Socialista entendemos que a cidadanía espera de nós responsabilidade e compromiso, e por iso traballamos para que as súas demandas teñan resposta e se transformen en acordos que beneficien á Guarda”.

O Grupo Municipal Socialista celebra a aprobación destas iniciativas e reafirma o seu compromiso de seguir traballando na defensa dos intereses das veciñas e veciños da Guarda.