venres, 16 de marzo de 2018

Os Socialistas da Guarda trasladan o problema do deterioro no litoral do esteiro do Miño ata os parlamentos Galego e Español.

Na mañá do venres 16 de marzo visitaron a zona do esteiro do Miño, que está sufrindo estragos no litoral, a deputada do parlamento Galego e portavoz de medio ambiente do grupo socialista, Patricia Vilán, e o deputado no parlamento Español, pola provincia de Pontevedra, Guillermo Meijón.
Patricia Vilán e Guillermo Meijón cos socialistas Guardeses
O obxectivo da visita dos deputados, aos que acompañaron os membros do equipo de goberno municipal xunto co presidente da Entidade Local Menor de Camposancos, é coñecer de primeira man os efectos destrutivos que o río está a producir en dous puntos do litoral: a zona da praia Lamiña-O Forte e a zona do Codesal.
Na zona da Lamiña-O Forte, estase a producir unha erosión acelerada con perda de parte do cordón dunar e caída de numerosas árbores, co risco de que a auga acabe por inundar unha zona na que o nivel do terreo é máis baixa ca do río, o que podería ter uns efectos impredicibles.
Na zona do Codesal produciuse a destrución dunha escolleira reparada por Costas do Estado no ano 2016, o que provocou tamén a caída de numerosas árbores e pon en risco a senda peonil que discorre ao carón do litoral. A situación é tan perigosa que o concello sinalizou a zona como medida de precaución para os usuarios desta senda.
En días pasados o concello solicitou, das administracións que teñen competencias no litoral do río que está a sufrir este proceso de destrución, a tramitación de emerxencia das actuacións que paren o proceso e que permitan a recuperación da praia.
En vista de que, por parte da Xunta e do Goberno Central, non se responde á solicitude do concello e non se asumen as responsabilidades que lles corresponden, os deputados do PSdeG-PSOE trasladarán este problema aos parlamentos Galego e Español, con sendas iniciativas que pidan responsabilidades aos gobernos e para que atendan as demandas .













martes, 28 de novembro de 2017

O PP da Guarda vota en contra das obras en Concepción Arenal.

No pleno municipal celebrado na Guarda o pasado día 24 de novembro o equipo de goberno levaba, coma punto máis importante na orde do día, a aprobación do convenio entre o concello e a deputación de Pontevedra para realizar as obras de humanización da rúa Concepción Arenal, que inclúen a Praza de Avelino Vicente e o entorno do antigo convento de San Benito.
Infografía de entorno do convento de San Bento
Dende o ano 2012 o concello viña solicitando da deputación completar a urbanización desta rúa de competencia provincial, presentando distintos proxectos que o presidente Louzán sempre desestimou, ignorando a importancia desta actuación que o goberno municipal consideraba prioritaria.
Dende o comezo desta lexislatura o alcalde da Guarda trasladou a presidenta da deputación a importancia de acometer a obra de urbanización integral desta rúa, polo seu mal estado na parte alta e por ser unha das principais da localidade tanto desde o punto de vista social como económico, dado que na actualidade é a que conta con máis establecementos comerciais.
Despois de moitos meses de xestións para conseguir a redacción dun ambicioso proxecto e de chegar a un acordo sobre os prazos de execución e o financiamento, foi ao pleno ordinario de novembro a aprobación do convenio que compromete á deputación e concello para a execución das obras.
O custo total da actuación ascende a 1.598.755,98 € dos cales a deputación fará unha aportación do 70% que ascende a 1.119.129,18 € e o concello o 30 % que ascende a 479.626,80 €. A achega económica por parte do concello está distribuída en tres anualidades entre 2017 e 2019.
A sorpresa foi maiúscula cando a hora da votación do punto na orde do día, trámite imprescindible para poder asinar o convenio e executar a obra, o PP da Guarda manifestou a súa postura en contra. Segundo o alcalde: “o PP está aplicando aquelo de “canto peor mellor”. Non ten visión institucional, decisións como esta invalídano para ser alternativa de goberno na nosa Vila. Non se pode desprezar un investimento por parte da deputación de máis dun millón de euros. Os seus electores deben coñecer e valorar este feito”.


A pesar da oposición do PP o punto foi aprobado co apoio do equipo de goberno e o BNG. Agora falta que sexa aprobado no pleno da deputación para que a presidenta Carmela Silva e o alcalde Antonio Lomba, asinen o convenio que permita executar unha obra moi importante para A Guarda. O proxecto darase a coñecer á cidadanía a partir do momento no que o documento de compromiso do investimento estea asinado.

venres, 2 de xuño de 2017

A Xunta segue ignorando a importancia da VAP para a nosa comarca

Os Socialistas da Guarda consideran inadmisible que a Xunta de Galicia siga mantendo incomunicado o Baixo Miño ao non marcar tan sequera prazos para o remate da Vía de Altas Prestacións entre A Guarda e Tui, o que demostra a situación de esquecemento a que San Caetano somete a comarca. Nas propias verbas do Delegado Territorial da Xunta de Galicia en Pontevedra, José Manuel Cores Tourís, feitas no Rosal a un medio de comunicación local (preguntado sobre os prazos para o tramo entre Tui e Goián), recoñeceu que aínda non teñen prazos tan sequera para poder aproximar unha data. 

Como ven declarando nos últimos meses, Antonio Lomba, Alcalde de A Guarda, seguirá insistindo co resto de concellos para que se comece a traballar: “Isto demostra o escaso interese que o Partido Popular demostra para esta infraestrutura imprescindible para nosa comarca, que obriga a desprazamentos máis conxestionados e inseguros. Parece que non teñen en conta que sen a VAP a comarca segue adoecendo. Votan a favor aquí nos concellos e logo en Santiago deixan morrer nun caixón o proxecto, como eles mesmos recoñecen.”
O grupo do PSdeG no Parlamento de Galicia ven de presentar nos Orzamentos da Comunidade para este 2017, dúas emendas para incluír dotacións no proxecto. A primeira de 8 millóns de euros para continuar coas obras xa iniciadas do tramo I e a segunda para o acceso a Areas de 400.000 €. Ambas botadas atrás polos votos do PP, o que demostra a dobre vara dos conservadores, opoñéndose e negando a maior, a gran necesidade que ten a comarca.
Abel Losada deputado do PSdeG
Abel Losada, deputado socialista por Pontevedra recoñece que: “non esconden tan sequera o desinterese. Coa negativa de incluír esa emenda, perdemos unha oportunidade máis de rematar ese tramo que conecta mellor a comarca coa cidade referencia que é Vigo. Non só por unha cuestión monetaria senón por comezar a traballar e ter o compromiso da administración autonómica. Os Socialistas xa tiñamos a sensación de que a VAP non era prioridade para a Xunta nesta lexislatura, pero agora xa o pódemos demostrar con feitos, por exemplo, 41 votos en contra nesa votación.”

martes, 11 de abril de 2017

Non preguntes por Santa Trega a “La Voz de Galicia”!!

O pasado 9 de abril, domingo de Ramos, O que escribe, alcalde da Guarda, tivo que soportar indignado a lectura dun desafortunado artigo sobre o Monte Santa Trega no periódico La Voz de Galicia. Basicamente o artigo era desafortunado porque a maioría das cousas que alí se dicían eran mentira e trataba sen o máis mínimo respecto a turistas, hostaleiros de Santa Trega, departamentos de Turismo e Patrimonio do concello da Guarda e mesmo ao equipo de goberno Guardés. O artigo era desafortunado e prexudicial para unha vila turística como A Guarda ata no titular, que rezaba: “¿Donde me puedo informar sobre el castro de Santa Trega?” co subtítulo “Ante la ausencia de una caseta informativa en el yacimiento, los turistas preguntan en los bares de la zona”
Panel informativo no poboado castrexo

Polo que escribe, supoño que o periodista que firma o artigo nunca estivo no Monte Trega e  parece que tampouco coñece moi ben A Guarda, non sei se falará de oídas ou recibirá ditado dalgún grupo político que, no que a turismo se refire, non acredita coñecemento nin experiencia algunha e o que din os seus representantes non pasan de ser meras ocorrencias.
Comecemos polo principio. No xacemento aqueolóxico de Santa Trega, declarado Monumento Histórico Artístico e Ben de Interese cultural dende 1931, nunca houbo unha caseta informativa como parece insinuar o artigo no subtítulo. A oficina de información turística atopábase no que se coñece como Pico de San Francisco, a pé do MASAT (Museo Arqueolóxico de Santa Trega), declarado Ben de Interese Cultural en 1962, e funcionaba nas épocas de tempada alta, en Semana Santa e verán. Agora esa oficina foi trasladada ao museo, está perfectamente sinalizada e funciona 11 meses ao ano ben atendida polos profesionais que alí traballan, que son das persoas máis preparadas para falar do Monte Santa Trega e fan o seu traballo con moita profesionalidade.
Sinalización da oficina de turismo

No cumio do monte Santa Trega non hai bares, alí hai dous establecementos hostaleiros, o hotel-restaurante Pazo e o restaurante Mar y Cielo. É un descuido imperdoable é unha falta de respecto chamarlle “bares” a estes establecementos. Por certo para os restaurantes resulta moi interesante que os turistas entren a pedir información ou a charlar sobre o Trega e os seus xacementos, é unha maneira de facer clientes. Que falen do Monte non significa que non poidan informarse por outros medios.
Dicir, como se afirma no mencionado artigo, que hai falta de información sobre o Trega é dun descoñecemento absoluto, e desta maneira infravalórase o traballo dos profesionais do concello da Guarda. Nos últimos anos os departamentos de Patrimonio e Turismo teñen feito moito por mellorar  o aspecto informativo sobre a paisaxe e o patrimonio dun dos lugares máis visitados de Galicia. Na subida, na caseta de cobro, entrégaselle aos visitantes un folleto informativo, e ao chegar ao xacemento os turistas atópanse con completos paneis sobre o poboado e as vivendas castrexas e na zona alta con paneis que axudan a interpretar a paisaxe. Pero por se isto non fora suficiente, no poboado, no museo, na capela e noutros lugares hai uns fitos informativos con códigos QR que dan acceso a audioguías en catro linguas, galego, castelán, inglés e francés.


A URL das audioguías e:
https://www.youtube.com/channel/UCclhuUPCJqDlHD0TOc3PqOQ
Pero se hai persoas interesadas en acceder a elas que non dispoñen do código QR e non queren teclear esa dirección imposible, basta con que busquen en youtube “audioguías do Trega”.
Toda a información anterior, que non é pouca, non resulta suficiente a criterio do concello da Guarda para un sitio coma o Trega en épocas de afluencia masiva de visitantes. Así, o xoves día 6 de abril foi remitida a tódolos medios de comunicación, incluída La Voz de Galicia, a programación da Semana Santa no concello da Guarda e nesta programación inclúese entre outras cousas, visitas guiadas gratuítas ao MASAT e ao castro de Santa Trega.

Toda a información anterior pode ampliarse, para aqueles viaxeiros que planifican a visita ao Trega con antelación ou que aínda queren máis información, accedendo a magnífica páxina de turismo que o concello da Guarda estreou en 2016 en tres linguas, galego, español e inglés, www.turismoaguarda.es ou mesmo descargando a App do concello da Guarda, que tamén ten información turística cun apartado exclusivo para o Monte Santa Trega.
Na Guarda sabemos o que nos traemos entre mans, empregámonos a fondo para manter o legado que nos deixaron todas aquelas persoas que traballaron para que O Monte Santa Trega e o seu Museo Arqueolóxico, que este ano cumpre o seu primeiro centenario, sexa o que é hoxe en día. Eu creo que poucos lugares de Galicia poden presumir de ofrecer tanta información como nós damos do noso Monte.
En definitiva, podemos dicir a vista destes feitos demostrables e contrastables que se queres saber do Monte Trega, ven Á Guarda, non preguntes en  “La Voz de Galicia”.

sábado, 8 de abril de 2017

Humanización da praza do Reló. Un compromiso electoral

Un dos puntos do programa electoral presentado para as últimas eleccións municipais dos Socialistas da Guarda no apartado de urbanismo era humanizar o entorno do Concello. Para reafirmar este compromiso, na entrevista feita ao entonces candidato a alcaldía da Guarda, Antonio Lomba, publicada no boletín O teu pobo nº 14, o candidato dicía "Peonalizaremos a praza do Reló para disfrute dos veciños". Estes e outros compromisos electorais foron os que fixeron que moitos veciños e veciñas deran o apoio a candidatura presentada polo partido Socialista.
Nós témolo moi claro. Os compromisos electorais son para cumprilos, ou polo menos para intentalo. Aínda así, hai que dicir que moitas veces non está só nas nosas mans o levar a cabo determinadas actuacións por moito que o desexemos.
Dende o primeiro día da lexislatura estamos traballado para conseguir prazas de aparcamento en determinadas zonas e así poder liberar outras de coches, isto non é fácil, hai moitos factores en xogo pero nós seguirmos traballando. No caso das humanizacións da praza do Reló, da 2ª fase da rúa Calvario e da habilitación dunha zona para peóns no comezo da rúa San Bernardo, sabíamos que se perderían algúnhas prazas de aparcamento ás que non tiñamos alternativa que ofrecer, pero que era necesario facelas por que significaba unha gran mellora para a maioría dos veciños. Sabemos que hai algunha xente que lles afectan estas humanizacións e que lles incomodan, pero pensamos que co paso do tempo valorarán positivamente estas actuación porque dende o punto de vista obxectivo significan unha mellora da cualidade de vida para todos. Dende o equipo de goberno pedimos un pouco de paciencia e comprensión para adaptarse a estes cambios.
No proxecto de humanización da Vila que temos no Grupo Municpal Socialista o obxectivo é mellorar a cualidade dos veciños e veciñas recuperando espazos públicos para a cidadanía, para que persoas de tódalas idades pero sobre todo as máis vulnerables, nenos e maiores, poidan sentirse cómodos e seguros. Pero tamén temos moi en conta os axentes económicos que se poden sentir afectados por estas actuacións. Nos cambios que temos proxectados para o futuro estamos seguros que non afectamos en absoluto a establecementos comerciais e hosteleros para mal. Pensamos que os cambios que propoñemos son beneficiosos para todos aínda que necesitarán dun periodo de adpatación.
O equipo de goberno do Concello da Guarda Seguirá traballando para cumprir os seus compromisos, para iso a maioría dos veciños e veciñas nos deron a súa confianza.

xoves, 30 de marzo de 2017

O Concello da Guarda informa da execución das obras de peatonalización parcial da Praza do Reló

Nos próximas días o Concello da Guarda executará a obra de peatonalización parcial da Praza do Reló. Con esta obra eliminarase o tráfico e aparcamento na maioría da superficie da praza.

Estado da praza do Reló con coches aparcados
O concello informa aos veciños e veciñas que cando estea rematada a obra só poderán circular vehículos dende a rúa Bernardo Alonso a Cervantes, e dende a rúa Colón tamén a Cervantes.

Nesta nova disposición facilitarase un aparcamento para minusválidos e unha zona de carga e descarga. Os carrís de circulación estarán limitados por bolardos extraíbles de aceiro inoxidable e dotarase de mobiliario ao resto da praza.

A intención do Concello con esta actuación é por en valor a Praza do Reló como espazo de convivencia tranquila para todos os veciños e veciñas, dende os máis pequenos ata os avós.
Novos sentidos de circulación do tráfico


sábado, 18 de febreiro de 2017

O PP da Guarda arremete contra os concelleiros vinculados a asociacións

Despois de que a corporación da Guarda dera a aprobación inicial aos orzamentos de 2017 cos votos en contra do PP e BNG e coa intención de poñer obstáculos a aprobación definitiva dos orzamentos, o PP, adoptando unha actitude sen precedentes, presentou por rexistro a recusación dos votos de tres concelleiros do equipo de goberno por pertencer a asociacións. Os concelleiros do PP pretenden alterar a vontade democrática do pleno do concello da Guarda ao solicitar a anulación dos votos dos concelleiros, que teñen o dereito e a obriga de votar nos asuntos municipais que van a pleno, dado que para elo foron elixidos, por sufraxio directo, polos veciños da Guarda.

Aínda que hai outros concelleiros nas condicións que o PP alega para pedir a anulación do voto, as iras dos populares van dirixidas ao goberno municipal: a Elena Baz, concelleira de Cultura, pola súa pertenza a Xamaraina, a Paulino Rodríguez, concelleiro de Servizos, pola súa vinculación coa asociación de veciños O Percamino da Gándara e contra Montse Magallanes, concelleira de facenda, por ter responsabilidades na asociación das Mulleres Progresistas.
Tradicionalmente, a hora de elaborar as listas para as eleccións municipais, sobre todo nas vilas pequenas como A Guarda, os partidos políticos buscan algúns dos seus candidatos entre activistas sociais. En practicamente tódalas vilas hai membros das corporacións vinculados con asociacións. A Guarda, localidade que destaca por ter moitas organizacións asociativas, non é nin nunca foi unha excepción. Algúns exemplos notables dos últimos anos son: o Alcalde do Partido Popular, José Luis Alonso Riego, que foi presidente do Sporting Guardés na súa época como rexedor e o actual tenente de Alcalde, Miguel Español, foi presidente da asociación Pedra Furada, que organizaba as festas do Monte, a vez que ostentaba a tenencia de alcaldía.
Baixo o punto de vista do equipo de goberno do concello da Guarda é inxustificable a actitude dos populares que pretenderon gañar con subterfuxios o que perderon nunhas votacións democráticas, romperon para o futuro un clima de respecto da corporación polas asociacións que se viña mantendo dende as primeiras eleccións municipais da democracia.
O resultado final deste ataque á vontade da corporación non tivo o efecto pretendido polo PP. Visto o informe do secretario do concello da Guarda o alcalde non admitiu as recusacións manténdose así o dereito a votar dos concelleiros cuestionados o que significa un triunfo para a democracia.