O PSOE da Guarda consigue que se amplíe a apertura dos baños públicos do litoral e a instalación dun aseo autolimpable no porto

 O Grupo Municipal Socialista da Guarda presentou no pleno de maio unha moción para mellorar os servizos públicos de aseos nas praias e no porto, que foi aprobada por unanimidade.

A iniciativa incluía dúas propostas principais: a instalación dun baño público autolimpable na zona do porto e a ampliación do período de apertura dos baños públicos situados na praia do Muíño e da Area Grande.

Desde o PSOE da Guarda valoran positivamente o apoio unánime da corporación, pero lembran a Roberto A. Carrero que “non abonda con votar a favor; agora hai que cumprir os acordos aprobados polo pleno”.

O grupo socialista advirte ademais de que “o goberno municipal está empezando a acostumarse a apoiar mocións da oposición que logo non executa”, polo que aseguran que estarán “vixiantes para que estas medidas non queden nun simple titular e se convertan nunha realidade para a veciñanza e para as persoas que visitan A Guarda”.

O PSOE da Guarda propón ampliar a apertura dos baños públicos do litoral e instalar un aseo autolimpable no porto.

 O Grupo Municipal Socialista da Guarda presentará no próximo pleno unha moción para mellorar os servizos públicos de aseos nas praias e no porto.

A iniciativa inclúe dúas propostas principais: a instalación dun baño público autolimpable na zona do porto e a ampliación do período de apertura dos baños públicos situados na praia do Muíño e da Area Grande.

Baño da praia da Area Grande

Desde o PSOE lembran que A Guarda vive desde hai anos unha notable desestacionalización do turismo vinculada ao incremento de peregrinos e peregrinas do Camiño Portugués da Costa, facendo que exista movemento de visitantes durante boa parte do ano e non unicamente nos meses de verán.

Os/as socialistas sinalan que os baños públicos do Muíño e Area Grande permanecen pechados gran parte do ano pese a atoparse en zonas de paso habitual de persoas que pasean, practican deporte ou realizan o Camiño de Santiago.

Por outra banda, o Grupo Municipal Socialista considera necesaria a instalación dun aseo autolimpable na zona do porto, un espazo cun importante movemento social, turístico e hostaleiro, especialmente durante fins de semana e períodos de maior afluencia.

A proposta inclúe tamén unha petición relativa á apertura dos baños públicos do Muíño e Area Grande entre os meses de marzo a outubro, ademais de estudar fórmulas de mantemento e limpeza que garantan o correcto funcionamento destes servizos.

“Falamos de limpeza e atención á veciñanza, pero tamén de ofrecer unha mellor atención ás persoas que visitan A Guarda ao longo do ano”, sinalan desde o PSOE da Guarda.

O PSOE acusa ao alcalde de renunciar a investimentos para A Guarda tras abandonar o GDR Galicia Suroeste e anuncia unha moción para revertelo.

O Grupo Municipal Socialista da Guarda anuncia que presentará unha moción no próximo pleno municipal para que o Concello recupere a súa participación en Galicia Suroeste Eurural, despois de que o alcalde decidise de maneira unilateral abandonar esta entidade clave para a captación de fondos e o desenvolvemento económico do territorio, sen debate público nin acordo plenario.

O PSOE considera que esta decisión supón renunciar a oportunidades e investimentos para o municipio por non asumir unha cota anual inferior aos 6.500 euros, unha cantidade mínima se se compara cos beneficios acadados pola Guarda nos últimos anos.

Fotografía de familia do GDR da que se borrou Carrero

Esta entidade beneficia directamente a emprendedores e emprendedoras, asociacións sen ánimo de lucro e aos propios concellos participantes, facilitando a chegada de investimentos e novas oportunidades ao territorio.

Nos últimos anos, A Guarda recibiu de forma directa máis de 113.000 euros en investimentos a través do GDR. Grazas a estes fondos leváronse a cabo actuacións concretas como o cambio de fiestras e a instalación dun ascensor no obradoiro de emprego Manuel B. Portela, a creación dunha área recreativa inclusiva no Monte Torroso ou a instalación dun aula de informática e melloras na vivenda protexida da asociación Avelaíña.

A esta cantidade hai que sumar outros proxectos dos que a nosa vila foi beneficiaria, como a promoción turística conxunta en FITUR, a campaña “Parte de Ti”, o acto de lanzamento de marca celebrado na sede das Redeiras da Guarda ou o Foro da Muller Rural, entre outros, que acadaron máis de 127.000 euros adicionais.

Ademais, Galicia Suroeste está a xestionar actualmente proxectos con financiamento europeo e estatal por un importe próximo aos 2.000.000€, destinados a apoiar o emprendemento, atraer investimento e impulsar novas oportunidades económicas no territorio.

Desde o PSOE lembran que as asociacións e entidades da Guarda poderán seguir participando nos programas do GDR, pero advirten de que a saída do Concello supón reducir a capacidade económica da entidade e, polo tanto, as oportunidades futuras para o territorio.

Resulta difícil de entender que o goberno municipal renuncie a participar nunha entidade que trae investimentos e oportunidades por unha cota anual irrisoria, mentres ao mesmo tempo destina recursos públicos a cuestións moito menos prioritarias, como máis de 1.500 euros en apenas dous meses en entrevistas radiofónicas de promoción persoal do alcalde.

Mentres ao alcalde se lle enche a boca falando de crecemento económico, na práctica estase renunciando a ferramentas reais de colaboración e captación de fondos que benefician directamente aos/as emprendedores/as, asociacións e mesmo ao propio Concello da Guarda.

Por todo iso, desde o Grupo Municipal Socialista presentarán ao pleno unha moción para instar ao equipo de goberno a reconsiderar esta decisión e recuperar a participación do Concello nunha entidade que leva anos contribuíndo ao desenvolvemento local e comarcal, ao apoio das asociacións e, en definitiva, á mellora da calidade de vida da veciñanza.

Fotos, titulares e pouca realidade: o PSOE acusa ao goberno local de vivir da propaganda

Nos últimos días estamos asistindo a unha intensa campaña de autopromoción por parte do goberno municipal, que chega xusto despois de que a veciñanza puidese ver, con claridade, a actitude de desatención do alcalde nas súas responsabilidades na Deputación de Pontevedra. A resposta non foi máis traballo nin máis resultados: foi unha sucesión de publicacións en redes e notas de prensa destinadas a construír un relato que non se corresponde coa realidade.

A última mostra é a súa nota sobre turismo, na que se atribúen méritos e éxitos que nin promoveron nin impulsaron. Fálase de “traballo intenso e ben feito en promoción turística”, cando o certo é que a maior parte dos datos que exhiben responden á inercia de anos anteriores, ao esforzo do tecido asociativo e empresarial da vila e á consolidación de recursos que xa estaban plenamente posicionados moito antes de que este goberno tomase posesión.

O Monte Santa Trega leva décadas sendo o principal motor turístico da Guarda. As Festas do Monte, a Festa da Langosta, o porto, o estuario ou o Piueiro son atractivos consolidados que non naceron nestes dous últimos anos. Non se coñece ningunha iniciativa nova, transformadora ou estratéxica posta en marcha polo actual goberno que xustifique apropiarse destes resultados.

A oficialización en 2016 do "Camiño Portugués da Costa" e o seu posterior posicionamento foron froito dun traballo institucional e técnico desenvolvido hai anos. Dende entón, o actual executivo limitouse a aproveitar o crecemento natural dun itinerario que xa viña en expansión, sen impulsar melloras necesarias nin executar actuacións básicas. Un exemplo claro é a falta de sinalización axeitada en puntos clave como Camposancos, unha solicitude presentada polo Grupo Socialista e aprobada por unanimidade en pleno en maio de 2025, que a día de hoxe segue sen executarse, mentres os/as peregrinos/as continúan desorientándose en determinados tramos.

Tampouco resulta rigoroso atribuír ao Concello feitos que non dependen da súa acción directa, como a rodaxe dunha película na vila, a presenza entre finalistas dun concurso comercial ou o recoñecemento turístico dunha plataforma privada. Son circunstancias positivas para a Guarda, sen dúbida, pero non responden a unha planificación nin a unha estratexia municipal específica.

Esta mesma estratexia repítese tamén no ámbito económico. Mentres presumen de apoiar o comercio e a empresa, non puxeron en marcha nin formación, nin axudas, nin medidas reais de dinamización. O caso do polígono industrial é moi clarificador: se de verdade existise unha aposta firme por desenvolvelo como espazo para xerar emprego, nunca se tería barallado trasladar alí o punto limpo.

O problema de fondo é que se está a confundir presenza con xestión. Gobernar non é aparecer nas fotos, nin estar en todos os actos, nin limitarse á axenda institucional. Gobernar é dedicar horas ao despacho, planificar, reunirse, impulsar proxectos e facer seguimento continuo. E iso é o que non se está vendo. Hai moita actividade cara a fóra, pero moi pouca xestión real detrás.

A Guarda ten potencial, recursos e unha base sólida construída ao longo de moito tempo. O que precisa agora é un goberno que lidere, que planifique e que execute. Non un executivo máis preocupado por responder ás críticas da oposición que por poñer en marcha políticas reais que melloren o presente e o futuro da nosa vila.

O PSOE da Guarda esixe actuacións urxentes na senda litoral.

 O Grupo Municipal Socialista da Guarda vén de presentar unha moción no pleno para reclamar actuacións inmediatas na senda litoral, un dos principais recursos naturais, turísticos e patrimoniais da nosa vila, hoxe en situación de total abandono.

A realidade é a que é: a senda litoral está en ruínas mentres o goberno do Partido Popular mira para outro lado. E resulta aínda máis grave cando lembramos que foi o propio alcalde, Carrero, quen criticaba duramente o estado do mobiliario urbano en anteriores mandatos, prometendo máis coidado, máis limpeza e máis atención aos espazos públicos.

Senda litoral invadida de maleza

Prometeron máis mantemento, pero deixan que se podreza unha das rutas máis importantes da Guarda:

• Táboas afundidas, podres e rotas, que xa teñen provocado caídas a persoas que camiñaban pola zona.

• Cravos oxidados sobresaíndo do chan, con risco evidente de lesións.

• Maleza cubrindo boa parte do camiño, que debería ser accesible.

• Elementos patrimoniais coma as Salinas do Seixal ou a Fonte de Santa Catalina esquecidos, cubertos de herbas, sen limpeza nin posta en valor.

“Non só non cumpren o que prometeron. Estano facendo peor ca nunca. O abandono é tal que esta senda, que conta co distintivo de Sendeiro Azul e transcorre por unha zona que forma parte da Rede Natura 2000, corre serio risco de perder o seu valor e incluso de comprometer a súa continuidade como espazo recoñecido”, afirman dende o PSOE da Guarda.

A moción presentada polo grupo socialista recolle catromedidas básicas que o goberno debería estar aplicando desde o primeiro día:

1. ​Reparación urxente de todas as táboas en mal estado e eliminación de cravos que podan sobresair das táboas.

2. ​Limpeza inmediata da maleza e da vexetación que invade a senda.

3. ​​Adecentamento dos elementos patrimoniais que se atopan ao longo da senda como por exemplo as Salinas de Seixal ou a Fonte de Santa Catalina.

4. Posta en marcha dun plan anual de mantemento, con revisións periódicas, limpeza, sinalización e posta en valor do patrimonio asociado á senda.

“Non é unha cuestión de estética, senón de seguridade e responsabilidade institucional. Estamos falando dun espazo que usan centos de persoas a diario, e que forma parte da imaxe que damos como vila turística. Un goberno que deixa que isto pase, ou non ten interese ou non ten capacidade”, conclúe a portavoz socialista Fátima Rodríguez.

Salinas en estado de abandono

Taboas podres na senda litoral

A Xunta de Galicia executa as obras dun compromiso acadado polo anterior goberno socialista para o Castelo de Santa Cruz

•  O equipo de goberno socialista conseguira na anterior lexislatura a colaboración da Axencia de Turismo (Xunta de Galicia) para mellorar os camiños de acceso ao Castelo de Santa Cruz, e alumear artisticamente e de forma ecoeficiente a muralla.

• Fai uns días que xa podemos ver rematada a intervención que afectaba aos accesos ao Castelo, quedando aínda pendente de instalar a iluminación ornamental da muralla.

Os/as Socialistas somos conscientes de que o Patrimonio da Guarda é un dos bens máis prezados desta vila, e durante as últimas lexislaturas leváronse a cabo moitas xestións para tratar de protexelo e poñelo en valor.

Exemplo disto sería a firma deste convenio coa Axencia de Turismo da Xunta de Galicia, pero tamén diversas actuacións clave como a restauración e consolidación do xacemento do Barrio Mergelina, a reconstrución da porta norte do Castro, o proxecto Mar de Sal a través do que se recuperaron as Salinas do Seixal, ou a promoción de actividades de divulgación como as Barferencias ou as visitas guiadas.

Con todo, non podemos ocultar a nosa profunda tristeza ao ver como nos últimos tempos as nosas principais xoias patrimoniais, como o Castelo de Santa Cruz, as Salinas ou o Castro de Santa Trega, se atopan practicamente nun estado de abandono. Esta situación reflicte, unha vez máis, o total desleixo do actual equipo de goberno cara ao noso pobo.

A situación é tan preocupante que incluso o xornal Atlántico denunciou recentemente a falta de atención e coidado co que se está a tratar o noso patrimonio.

En relación ás obras no Castelo de Santa Cruz, celebramos que a Xunta de Galicia retomara e completara as melloras que quedaran pendentes. Non obstante, é imprescindible que o actual equipo de goberno comece a asumir a súa responsabilidade na protección e conservación do noso patrimonio, algo que, lamentablemente, non fixeron durante o tempo que levan gobernando.

A Xunta de Galicia inicia as obras dun compromiso acadado polo anterior goberno socialista para o Castelo de Santa Cruz.

• O equipo de goberno socialista conseguira na anterior lexislatura a colaboración da Axencia de Turismo (Xunta de Galicia) para mellorar os camiños de acceso ao Castelo de Santa Cruz, e alumear artísticamente e de forma ecoeficiente a muralla.

• Fai uns días deuse inicio a ditas obras, e xa poden observarse máquinas traballando tanto no acceso á Porta da Vila como na parte exterior da muralla.

O anterior goberno, consciente de que o Patrimonio da Guarda era, e sigue sendo, o ben máis prezado da nosa localidade, levou a cabo durante anos unha serie de iniciativas cun obxectivo común: poñer en valor e rendibilizar o seu Patrimonio para dalo a coñecer, para conservalo e tamén para utilizalo como atractivo turístico.

Rehabilitación do acceso pola porta da vila

Un deses elementos no que se puxo especial énfase, e que ademáis está declarado Ben de Interese Cultural, foi o Castelo de Santa Cruz.

Por iso solicitouse á Axencia de Turismo de Galicia a realización de varias actuacións dirixidas a seguir poñendo en valor este ben patrimonial, firmando un convenio entre a mesma e o Concello da Guarda na anterior lexislatura.

Obras de iluminación da muralla

Alegrámonos de que a Xunta de Galicia retome esta obra que quedara pendente de facer, e xa se dera inicio ás obras que representarán cambios moi positivos para o Castelo, xa que unha vez finalizadas a muralla lucirá iluminada e se mellorarán e farán accesibles os accesos tanto pola Porta da Vila (tramo que arranca na rúa Puerto Rico e ascende entre dúas casas indianas), como pola Porta de Socorro (tramo que nace no camiño peonil da Avda. Sto. Domingo de Guzmán). 

Roberto Carrero está molesto porque a oposición airea os seus pouco acertados movementos na xestión dos fondos

•  Roberto Carrero está molesto porque a oposición airea os seus pouco acertados movementos na xestión dos fondos.

• A cantidade de cartos que tiña na súa man para desbloquear a obra da senda arredor do Tegra, foi dirixida a outras actuacións que non son, desde logo, urxentes.

Roberto Carrero amósase moi molesto cos partidos da oposición simplemente por contar a verdade do que fixo o seu goberno, e que non foi, nin máis nin menos, que renunciar ao diñeiro que tiñan xa na man para desbloquear a obra da senda arredor do Trega.

Fala de que somos responsables de que esta obra non estea feita tras dúas lexislaturas…iso si que é unha tomadura de pelo pola súa parte.

Circunvalación ao Trega, estado actual

Aos/ás socialistas só nos faltou poñernos de xeonllos e suplicar á Xunta que asumise a obra, que recordemos, é quen ten que facela, xa que a estrada é propiedade súa. Chegamos incluso a presentar en 2020 un anteproxecto de senda para ver se, facilitándolles o traballo, entraban en razón e por fin escoitaban as peticións da cidadanía guardesa.

Se para Carrero facer iso, ou buscar financiación por outras vías para iniciar a obra, é unha “actitude belicosa”, é que non entendeu nada.

Destinar eses cartos do Plan de Turismo a iniciar o proxecto da senda era, sobre todo, unha declaración de intencións pola nosa parte. Demostramos que a pesar de que a Xunta desoíse durante anos as necesidades da cidadanía guardesa, o equipo de goberno socialista quería buscar a toda costa sacar o proxecto da senda adiante, fora como fose.

A verdade é que, analizando polo miúdo o traballo de Carrero durante o tempo que leva no goberno, vemos bastante difícil que poda conseguir nesta lexislatura que a Xunta financie este proxecto. E se o consegue, máis ben será mérito da ben instaurada “política de amiguismos” do PP ou da matraca que levamos dando nós co tema desde fai anos, e xa non tanto da súa xestión.

Pero ollo, que non se engane o actual alcalde, non crea que todos/as somos da súa mesma condición. A nós xamais nos vai a “doer” que se faga esta obra, aínda que sexa o mesmo Satanás quen se encargue de facela, porque confrontacións políticas aparte, o que nós queremos é o ben da Guarda e o estamos demostrando a través do noso apoio ao seu equipo de goberno en todo o que consideramos bo para este pobo.

Cousa que, por certo, vostedes non fixeron estando en oposición: Votando en contra da reforma do pavillón, da humanización de Concepción Arenal, dunha subvención da Deputación para dinamización do comercio, etc. Eran vostedes unha mala oposición e agora son un mal goberno. 

A senda arredor do Trega, cada vez máis lonxe de ser unha realidade.

•  Ante a inacción da Xunta de Galicia, o anterior goberno socialista reservara unha partida económica do Plan de Turismo (PSTD) para dar inicio á senda arredor do Trega.

• Agora, os Populares, deciden eliminar as actuacións na senda, e destinan ese diñeiro á creación dun aparcamento disuasorio no Museo do Mar e a conectar a senda Litoral coa das Cetáreas.

A través desta nota de prensa, desde o Grupo Municipal Socialista, queremos facer unha serie de aclaracións en relación á situación da senda arredor do Trega.

No Plan de Turismo, a través do que acadamos 1.000.000€ para diversas actuacións en materia de turismo, destinábase unha cantidade de diñeiro para dar inicio á senda arredor do Trega.

recreación da senda arredor do Trega

Dediciuse apostar por esta actuación porque a Xunta de Galicia, ente a quen realmente lle compete levar a cabo esta obra, leva incumplindo ao longo dos últimos anos e de forma reiterada, as súas promesas de construíla.

Xa en 2018 o Director Xeral de Infraestruturas de Xunta, aseguráballe a Antonio Lomba que sacarían unha liña de subvencións para sendas que nunca chegou a publicarse. En 2020 a Conselleira de Infraestruturas (Ethel Vázquez) comprometíase tamén, neste caso, a valorar incluír a nosa senda nun Plan de Sendas do Baixo Miño a través de fondos europeos (FEDER 2021-2027), promesa que volveu a incumprirse.

En vista dos antecedentes, os socialistas decidiron reservar unha partida orzamentaria para a senda dentro do Plan de Turismo, para desta forma, dar inicio ás obras e forzar á Xunta de Galicia a destinar fondos para a mesma, replicando a mesma estratexia que se seguira coa reforma do Pavillón Municipal, para o que ao principio a Xunta non quixo destinar nin un euro, e logo, unha vez o Concello e a Deputación puxeron fondos, viuse obrigada a facelo.

O Partido Popular publicaba unha nota de prensa en novembro de 2023 sacando peito porque Ethel Vázquez tamén lles prometera a eles/as incluir a senda nos próximos fondos FEDER (sónanos esa resposta…), o que polo de pronto nos di que, como mínimo, ata despois de 2027 a Xunta non prevé en ningún caso, abordar esta obra…se é que realmente a inclúe, cousa que, visto o visto, xa dubidamos.

E agora, observamos estupefactos/as como desde o Concello se decide que a cantidade coa que se pretendía dar inicio a esta obra, crucial para A Guarda e Camposancos tanto a nivel turístico como a nivel de seguridade viaria, se vai a destinar a facer unha obra que desde logo non ten a urxencia nin a importancia que pode ter a da senda arredor do Trega.

Preto de cumprirse un ano deste novo goberno, non deixamos de asombrarnos coa falta de consideración cara á cidadanía e o pouco sentido común que aplican ás súas políticas.

Leticia Gallego urxe á Xunta a arranxar o problema de transporte entre A Guarda e Caminha para dar continuidade ao Camiño Portugués da Costa

 Censura o “importante quebranto e confusión” que supón a inactividade da liña do ferri que une os dous concellos e denuncia a proliferación de “publicacións contraditorias” que “formulan alternativas que nada teñen que ver coa ruta oficial”

A deputada socialista Leticia Gallego visitou hoxe A Guarda, xunto ao seu a alcalde, Antonio Lomba, para presentar unha batería de iniciativas para urxir á Xunta a resolver o problema de transporte entre o concello guardés e o municipio portugués de Caminha co principal obxectivo de dar continuidade ao Camiño Portugués da Costa no seu paso polo esteiro do Miño.

“O transbordador que une as dúas beiras do río atópase inactivo e isto impide a peregrinas e peregrinos cruzar o esteiro en transporte regular”, alertou a socialista, quen incidiu no “importante quebranto e confusión” que isto supón, ao que se suma a “desinformación” e as “publicacións contraditorias” sobre a ruta Xacobea.

Ao fío disto, Gallego lamentou que, “malia que a web oficial do Camiño de Santiago sinala que o Camiño Portugués da Costa entra en Galicia pola vila mariñeira de A Guarda, tras cruzar o río Miño na súa desembocadura, varias organizacións e entidades portuguesas formulan alternativas que nada teñen que ver coa ruta oficial, recoñecida e promovida pola Xunta”.

Así, destacou, “algunhas publicacións indícanlles ás peregrinas e peregrinos que percorran case 30 quilómetros máis para cruzar o río a través da ponte que une Vilanova de Cerveira e Tomiño para logo chegar ata A Guarda, e noutras mesmo propoñen continuar o itinerario ata Valença do Minho para enlazar dende alí co Camiño Portugués, o cal é moito máis grave xa que anula o percorrido pola costa atlántica galega que transcorre polos municipios de A Guarda, O Rosal, Oia, Baiona e Nigrán”.

“Cómpre buscar unha solución a curto prazo para arranxar esta problemática no transporte de pasaxeiros e pasaxeiras entre ambos municipios, polo que pedimos á Xunta que se reúna cos alcaldes afectados para que poidan trasladarlles de primeira man a problemática que están a vivir”, subliñou a responsable socialista.

Por último, Gallego pediu ao goberno galego que “se manifeste e tome medidas” en relación ás publicacións que difunden itinerarios “non oficiais” sobre o Camiño Portugués da Costa, xa que isto “implica un enorme prexuízo” para a ruta Xacobea e, nomeadamente, para os municipios do Baixo Miño polos que transcorre.

Enlace a iniciativa parlamentaria

Non preguntes por Santa Trega a “La Voz de Galicia”!!

O pasado 9 de abril, domingo de Ramos, O que escribe, alcalde da Guarda, tivo que soportar indignado a lectura dun desafortunado artigo sobre o Monte Santa Trega no periódico La Voz de Galicia. Basicamente o artigo era desafortunado porque a maioría das cousas que alí se dicían eran mentira e trataba sen o máis mínimo respecto a turistas, hostaleiros de Santa Trega, departamentos de Turismo e Patrimonio do concello da Guarda e mesmo ao equipo de goberno Guardés. O artigo era desafortunado e prexudicial para unha vila turística como A Guarda ata no titular, que rezaba: “¿Donde me puedo informar sobre el castro de Santa Trega?” co subtítulo “Ante la ausencia de una caseta informativa en el yacimiento, los turistas preguntan en los bares de la zona”

Panel informativo no poboado castrexo

Polo que escribe, supoño que o periodista que firma o artigo nunca estivo no Monte Trega e  parece que tampouco coñece moi ben A Guarda, non sei se falará de oídas ou recibirá ditado dalgún grupo político que, no que a turismo se refire, non acredita coñecemento nin experiencia algunha e o que din os seus representantes non pasan de ser meras ocorrencias.
Comecemos polo principio. No xacemento aqueolóxico de Santa Trega, declarado Monumento Histórico Artístico e Ben de Interese cultural dende 1931, nunca houbo unha caseta informativa como parece insinuar o artigo no subtítulo. A oficina de información turística atopábase no que se coñece como Pico de San Francisco, a pé do MASAT (Museo Arqueolóxico de Santa Trega), declarado Ben de Interese Cultural en 1962, e funcionaba nas épocas de tempada alta, en Semana Santa e verán. Agora esa oficina foi trasladada ao museo, está perfectamente sinalizada e funciona 11 meses ao ano ben atendida polos profesionais que alí traballan, que son das persoas máis preparadas para falar do Monte Santa Trega e fan o seu traballo con moita profesionalidade.

Sinalización da oficina de turismo

No cumio do monte Santa Trega non hai bares, alí hai dous establecementos hostaleiros, o hotel-restaurante Pazo e o restaurante Mar y Cielo. É un descuido imperdoable é unha falta de respecto chamarlle “bares” a estes establecementos. Por certo para os restaurantes resulta moi interesante que os turistas entren a pedir información ou a charlar sobre o Trega e os seus xacementos, é unha maneira de facer clientes. Que falen do Monte non significa que non poidan informarse por outros medios.
Dicir, como se afirma no mencionado artigo, que hai falta de información sobre o Trega é dun descoñecemento absoluto, e desta maneira infravalórase o traballo dos profesionais do concello da Guarda. Nos últimos anos os departamentos de Patrimonio e Turismo teñen feito moito por mellorar  o aspecto informativo sobre a paisaxe e o patrimonio dun dos lugares máis visitados de Galicia. Na subida, na caseta de cobro, entrégaselle aos visitantes un folleto informativo, e ao chegar ao xacemento os turistas atópanse con completos paneis sobre o poboado e as vivendas castrexas e na zona alta con paneis que axudan a interpretar a paisaxe. Pero por se isto non fora suficiente, no poboado, no museo, na capela e noutros lugares hai uns fitos informativos con códigos QR que dan acceso a audioguías en catro linguas, galego, castelán, inglés e francés.

A URL das audioguías e:
https://www.youtube.com/channel/UCclhuUPCJqDlHD0TOc3PqOQ
Pero se hai persoas interesadas en acceder a elas que non dispoñen do código QR e non queren teclear esa dirección imposible, basta con que busquen en youtube “audioguías do Trega”.
Toda a información anterior, que non é pouca, non resulta suficiente a criterio do concello da Guarda para un sitio coma o Trega en épocas de afluencia masiva de visitantes. Así, o xoves día 6 de abril foi remitida a tódolos medios de comunicación, incluída La Voz de Galicia, a programación da Semana Santa no concello da Guarda e nesta programación inclúese entre outras cousas, visitas guiadas gratuítas ao MASAT e ao castro de Santa Trega.

Toda a información anterior pode ampliarse, para aqueles viaxeiros que planifican a visita ao Trega con antelación ou que aínda queren máis información, accedendo a magnífica páxina de turismo que o concello da Guarda estreou en 2016 en tres linguas, galego, español e inglés, www.turismoaguarda.es ou mesmo descargando a App do concello da Guarda, que tamén ten información turística cun apartado exclusivo para o Monte Santa Trega.
Na Guarda sabemos o que nos traemos entre mans, empregámonos a fondo para manter o legado que nos deixaron todas aquelas persoas que traballaron para que O Monte Santa Trega e o seu Museo Arqueolóxico, que este ano cumpre o seu primeiro centenario, sexa o que é hoxe en día. Eu creo que poucos lugares de Galicia poden presumir de ofrecer tanta información como nós damos do noso Monte.
En definitiva, podemos dicir a vista destes feitos demostrables e contrastables que se queres saber do Monte Trega, ven Á Guarda, non preguntes en  “La Voz de Galicia”.