O PSOE da Guarda propón ampliar a apertura dos baños públicos do litoral e instalar un aseo autolimpable no porto.

 O Grupo Municipal Socialista da Guarda presentará no próximo pleno unha moción para mellorar os servizos públicos de aseos nas praias e no porto.

A iniciativa inclúe dúas propostas principais: a instalación dun baño público autolimpable na zona do porto e a ampliación do período de apertura dos baños públicos situados na praia do Muíño e da Area Grande.

Baño da praia da Area Grande

Desde o PSOE lembran que A Guarda vive desde hai anos unha notable desestacionalización do turismo vinculada ao incremento de peregrinos e peregrinas do Camiño Portugués da Costa, facendo que exista movemento de visitantes durante boa parte do ano e non unicamente nos meses de verán.

Os/as socialistas sinalan que os baños públicos do Muíño e Area Grande permanecen pechados gran parte do ano pese a atoparse en zonas de paso habitual de persoas que pasean, practican deporte ou realizan o Camiño de Santiago.

Por outra banda, o Grupo Municipal Socialista considera necesaria a instalación dun aseo autolimpable na zona do porto, un espazo cun importante movemento social, turístico e hostaleiro, especialmente durante fins de semana e períodos de maior afluencia.

A proposta inclúe tamén unha petición relativa á apertura dos baños públicos do Muíño e Area Grande entre os meses de marzo a outubro, ademais de estudar fórmulas de mantemento e limpeza que garantan o correcto funcionamento destes servizos.

“Falamos de limpeza e atención á veciñanza, pero tamén de ofrecer unha mellor atención ás persoas que visitan A Guarda ao longo do ano”, sinalan desde o PSOE da Guarda.

O PSOE da Guarda critica que Carrero saque peito dunha reforma da Praza de Abastos moito menos ambiciosa do previsto.

A recente reinauguración da Praza de Abastos da Guarda, celebrada a pasada semana, foi utilizada polo alcalde para sacar peito da xestión do seu goberno e presentar a actuación como un gran proxecto propio. Con todo, desde o Grupo Municipal Socialista lembran que a realidade é bastante distinta: o proxecto de mellora da praza foi impulsado no anterior mandato polo goberno socialista e, ademais, o proxecto inicialmente previsto era moito máis ambicioso do que finalmente se executou.

Os/as socialistas explican que, no anterior mandato, desde a Concellería de Desenvolvemento Local, dirixida pola actual portavoz municipal socialista, Fátima Rodríguez, impulsouse un proxecto de dinamización e modernización da Praza de Abastos que ía moito máis alá dunha simple reforma estética. Este proxecto foi presentado a unha convocatoria de Fondos Europeos e conseguiu unha subvención de 318.458,40 € para poder executalo.

Renuncia de Carrero á subvención para a Praza de Abastos

A proposta incluía, ademais da reforma estética, que nin sequera se executou conforme ao proxecto inicial, diferentes actuacións destinadas a modernizar o mercado e mellorar os servizos á clientela. Entre elas atopábanse, por exemplo, a instalación de taquillas refrixeradas para facilitar a recollida de pedidos fóra do horario habitual da praza, a instalación dunha plataforma salvaescaleiras na terraza para acadar a accesibilidade total do mercado, así como outras actuacións orientadas á modernización das instalacións.

Ademais, o proxecto tamén contemplaba accións de formación e asesoramento para comerciantes, campañas de promoción e dinamización comercial e ferramentas para mellorar a visibilidade e competitividade dos negocios, medidas das que se poderían ter beneficiado non só os postos da praza senón tamén outros establecementos comerciais da vila.

Infografías do proxecto orixinal da Praza de Abastos

Segundo lembran os/as socialistas, esta subvención permitiría financiar estas actuacións sen ter que empregar fondos procedentes da Deputación de Pontevedra, podendo destinar ese diñeiro a outras obras necesarias no municipio.

Porén, un mes despois de recibir a resolución favorable da axuda europea conseguida polos/as Socialistas, xa co actual alcalde no goberno, o Concello decidiu renunciar a ela. O alcalde tratou de xustificar esta decisión alegando cuestións orzamentarias.

Asistentes a reinaguración da Praza

Desde o Grupo Municipal Socialista consideran que esta explicación non se sostén e lembran que a xestión municipal consiste precisamente en atopar solucións para non perder oportunidades de financiamento como esta. Renunciar a máis de 318.000 euros de fondos europeos xa concedidos non era, en ningún caso, unha opción. Aí quedou demostrada a nula capacidade de xestión deste goberno.

“Resulta chamativo que agora se organice unha reinauguración e se pretenda vender como un gran logro unha actuación que, ademais de ter sido impulsada polo anterior goberno socialista, quedou moi lonxe do proxecto inicialmente previsto”, sinalan desde o PSOE da Guarda.

O PSOE de A Guarda celebra que, despois de anos de reclamacións, a Xunta avance na senda arredor do Trega

 O proxecto da senda peonil e ciclista do Monte Trega dá un novo paso adiante coa apertura do proceso de información pública por parte do ente autonómico aprobado no Consello da Xunta.

O grupo municipal socialista da Guarda celebra que o Consello da Xunta aprobara onte a apertura do proceso de información pública do proxecto da senda peonil e ciclista que circunvalará o Monte de Santa Trega, ao longo da estrada autonómica PO-352, conectando o núcleo urbano da Guarda con Camposancos.

Iso si, a súa portavoz, Fátima Rodríguez, destaca que este anuncio chega “con anos de retraso e cun evidente oportunismo político”, xa que “a Xunta pretende agora botarlle un cable a un goberno popular local que, en máis de dous anos, non foi quen de impulsar nin un só proxecto relevante para A Guarda”.

Pola súa banda, a secretaria xeral do PSOE da Guarda, Bárbara Domínguez, lembra que “este proxecto non nace da iniciativa do actual goberno local, senón dunha longa traxectoria de xestións impulsadas polos anteriores executivos socialistas en base ás demandas da cidadanía. Xa en 2020 o Concello presentara na Xunta un anteproxecto da senda para a súa inclusión nos plans de infraestruturas, sen obter resposta naquel momento”

O grupo socialista anuncia, ademais, que revisará con lupa o proxecto co fin de vixiar que esta obra se faga con total transparencia, respecto ambiental e co consenso da veciñanza afectada.

O goberno de Carrero e Fariñas levan a piscina municipal ao bordo do desastre.

O Grupo Municipal Socialista acusa ao goberno de Carrero e Fariñas de levar á piscina municipal ao desastre absoluto. A día de hoxe, a maior subvención deportiva da historia de A Guarda -1,5 millóns de euros conseguidos polo PSOE en 2023 para a reforma da piscina - está practicamente perdida.

Unha cronoloxía que evidencia a inacción:

• En 2023, o PSOE deixou asegurados 1,5 millóns de euros de Fondos Europeos para a obra.

• O goberno local esperou ata novembro de 2024 para buscar o resto do financiamento, que non conseguiu ata marzo de 2025: 700.000 € da Deputación de Pontevedra.

• En novembro de 2024 entregouse o proxecto, pero non saíu a licitación ata abril de 2025.

• En maio de 2025 a licitación quedou deserta, pois ningunha empresa se presentou.
  Despois revisaron o proxecto e descubriron custes mal calculados, co que o orzamento aumentou en case 600.000 €.

• Decidiron pedir esa cantidade á Xunta de Galicia, que en setembro de 2025 denegou a subvención.

  

  Piscina municipal da Guarda

No momento no que souberon que a reforma custaría máis do previsto, deberían ter solicitado un préstamo bancario como plan B, asegurando así a financiación e evitando máis atrasos. Pola contra, fiárono todo a unha subvención que finalmente non chegou.

A realidade é incontestable: a obra, cun prazo de execución dun ano, debería estar finalizada en marzo de 2026 para non perder a subvención europea. Fagan contas: a día de hoxe é materialmente imposible chegar a tempo. Nin sequera cunha prórroga sería viable salvar os fondos.

O tema é que Carrero e Fariñas poden ser ineptos, pero non parvos. Saben que non facer a obra suporía un custo político demasiado alto. Por iso acabarán tirando adiante con ela, tarde e mal, pero coa diferenza de que agora será o Concello quen teña que asumir cos cartos de todos os veciños e veciñas ese 1,5 millóns de euros.

A maiores, o persoal da piscina segue sen saber en que condicións afrontará un ERTE nin se perderán poder adquisitivo. Mentres, a veciñanza está condenada a unhas instalacións cheas de goteiras e cun risco real de peche por unha avaría maior.

“Estamos ante un auténtico escándalo. Carrero e Fariñas perderon tempo, van perder cartos e puxeron a piscina contra as cordas. A súa incompetencia vai custarlle á Guarda 1,5 millóns de euros que xa tiñamos asegurados. Tirarán adiante coa obra porque saben que non facela lles custaría demasiado, pero acabaremos pagándoa todos/as cos recursos do Concello. En calquera caso, con este goberno, somos os veciños e veciñas da Guarda quen perdemos”, denuncia a portavoz socialista, Fátima Rodríguez.

 

Carrero volve mentir. Esta vez coa apertura da Rúa Baixo Muro

 O Grupo Municipal Socialista quere advertir á veciñanza dunha realidade que xa ninguén pode ignorar: o alcalde da Guarda, Roberto Álvarez Carrero, minte. Minte con descaro e faino constantemente.

Nestes días vimos como, a través das redes sociais do Concello, aseguraba que “non houbera avances significativos” na apertura da rúa Baixo Muro - Ireira ata a compra da parcela realizada agora. Iso é unha MENTIRA en maiúsculas.

Parcela de conexión coa rúa Baixo Muro

Cando Carrero chegou ao goberno en 2023 xa o PSOE xestionara a modificación puntual do Plan Xeral que era obrigatorio facer para poder abrir a rúa. Xa lle quedara o proxecto redactado e conseguidos todos os permisos de Patrimonio. Incluso tiña diñeiro para facelo, porque se deixara reservado.

Sen todos eses trámites previos, a apertura sería imposible. E todo iso estaba feito antes de que Carrero chegase ao goberno, e a pesar de ter todo iso avanzado retrasou esta obra dous anos, e agora quere poñerse medallas. É incrible a falta de honestidade deste rexidor.

Os feitos están aí, e son públicos, e poden comprobarse na web do concello en noticias publicadas en 2019, 2020 e 2022.

Pero o problema non é só esta mentira. O problema é que non é a primeira, nin a segunda. Xa nos enganou co tema dos cobros da Deputación, tamén enganou cando afirmou que o Concello quedara sen fondos tras o paso dos/as socialistas, e agora volve facelo con este asunto. Sempre o mesmo patrón: negar a evidencia e manipular a realidade.

Un alcalde pode equivocarse, pode ter outra visión, pode mesmo discrepar. O que non pode facer é mentir sistematicamente á cidadanía. Porque cando se perde a confianza, pérdese todo.

Nós non imos permitir que se reescriba a historia ao gusto de Carrero. A apertura desta rúa é froito de anos de traballo e planificación, e a veciñanza ten dereito a coñecer a verdade.

A Guarda precisa un goberno serio, honesto e que mire polos intereses comúns, non un alcalde que fai da mentira o seu xeito de gobernar.

Carrero e o seu goberno din NON a mellorar a senda e o porto

O equipo de goberno vota en contra de dúas mocións presentadas polo PSOE, unha delas na que se pedían melloras no mantemento e a seguridade na senda litoral, e outra relacionada cos colectores soterrados de Porto, precintados pola Policía Local desde xuño.

Lembran aquel Partido Popular que prometía cambiar o rumbo da vila, con rúas máis limpas, mobiliario público en mellor estado e un patrimonio ben coidado?

Votación no pleno de xullo

Nós tamén. Pero o que vemos, día tras día, é que todas aquelas promesas quedaron en iso: palabras de campaña, titulares de panfleto e frases bonitas xunto a fotos sorrintes. Baleiras de contido e de compromiso.

O pleno de xullo foi a confirmación de todo isto. O que nos atopamos foi un Carrero visiblemente molesto coas críticas recollidas nas mocións socialistas. Tanto, que preferiu votar en contra, xunto co seu socio de goberno, antes que admitir que A Guarda necesita máis mantemento e atención.

E non o fixeron porque as propostas non foran necesarias, que ben o son, senón porque aprobalas significaría recoñecer que o PSOE tiña razón. E que, de todo o que prometeron, non están cumprindo nin a cuarta parte.

Iso si… denuncia que facemos nas redes ou instancia que presentamos, denuncia que os pon a correr. E xa van uns cantos casos: a sega da senda litoral poucos días despois de rexistrar a moción; a limpeza dun muro na rúa Roda; os desbroces no Castro, na estrada da Gándara…Todos tras denuncias públicas nosas. Se non, nada.

Casualidade? Non. Falta de planificación. Desgoberno. E un estilo político que só reacciona cando se ve contra as cordas.

O PSOE da Guarda esixe actuacións urxentes na senda litoral.

 O Grupo Municipal Socialista da Guarda vén de presentar unha moción no pleno para reclamar actuacións inmediatas na senda litoral, un dos principais recursos naturais, turísticos e patrimoniais da nosa vila, hoxe en situación de total abandono.

A realidade é a que é: a senda litoral está en ruínas mentres o goberno do Partido Popular mira para outro lado. E resulta aínda máis grave cando lembramos que foi o propio alcalde, Carrero, quen criticaba duramente o estado do mobiliario urbano en anteriores mandatos, prometendo máis coidado, máis limpeza e máis atención aos espazos públicos.

Senda litoral invadida de maleza

Prometeron máis mantemento, pero deixan que se podreza unha das rutas máis importantes da Guarda:

• Táboas afundidas, podres e rotas, que xa teñen provocado caídas a persoas que camiñaban pola zona.

• Cravos oxidados sobresaíndo do chan, con risco evidente de lesións.

• Maleza cubrindo boa parte do camiño, que debería ser accesible.

• Elementos patrimoniais coma as Salinas do Seixal ou a Fonte de Santa Catalina esquecidos, cubertos de herbas, sen limpeza nin posta en valor.

“Non só non cumpren o que prometeron. Estano facendo peor ca nunca. O abandono é tal que esta senda, que conta co distintivo de Sendeiro Azul e transcorre por unha zona que forma parte da Rede Natura 2000, corre serio risco de perder o seu valor e incluso de comprometer a súa continuidade como espazo recoñecido”, afirman dende o PSOE da Guarda.

A moción presentada polo grupo socialista recolle catromedidas básicas que o goberno debería estar aplicando desde o primeiro día:

1. ​Reparación urxente de todas as táboas en mal estado e eliminación de cravos que podan sobresair das táboas.

2. ​Limpeza inmediata da maleza e da vexetación que invade a senda.

3. ​​Adecentamento dos elementos patrimoniais que se atopan ao longo da senda como por exemplo as Salinas de Seixal ou a Fonte de Santa Catalina.

4. Posta en marcha dun plan anual de mantemento, con revisións periódicas, limpeza, sinalización e posta en valor do patrimonio asociado á senda.

“Non é unha cuestión de estética, senón de seguridade e responsabilidade institucional. Estamos falando dun espazo que usan centos de persoas a diario, e que forma parte da imaxe que damos como vila turística. Un goberno que deixa que isto pase, ou non ten interese ou non ten capacidade”, conclúe a portavoz socialista Fátima Rodríguez.

Salinas en estado de abandono

Taboas podres na senda litoral

O PSOE da Guarda esixe a reparación ou retirada dos colectores soterrados do porto

O Grupo Municipal Socialista da Guarda vén de presentar no Concello unha moción para esixir actuacións urxentes ante a situación de deterioro e abandono dos colectores soterrados situados na zona do porto.

Durante anteriores mandatos, o goberno municipal apostou por un modelo de colectores soterrados, especialmente en contornos de alto valor como o porto, co obxectivo de mellorar a estética urbana, reducir os malos olores e ofrecer unha solución máis limpa, accesible e respectuosa co medio. Un investimento que, para os socialistas, contribuíu a modernizar a imaxe da vila e a adaptala ás necesidades da veciñanza e das persoas que nos visitan.

Colectores no porto da Guarda

Con todo, o actual equipo de goberno decidiu deixar fóra de funcionamento tanto os colectores desta zona como os da rúa Julia Vaquero, argumentando un suposto custo de mantemento elevado. A falta de conservación derivou nunha situación crítica: o afundimento das chapas metálicas que cobren os colectores obrigou recentemente á Policía Local a precintar a zona ante o risco para as persoas.

“Non só está en xogo a seguridade da cidadanía, senón tamén a imaxe que A Guarda proxecta. O porto é un espazo emblemático que non pode ofrecer un aspecto de abandono e desleixo”, sinalan desde o Grupo Socialista.

O PSOE da Guarda considera inadmisible que unhas infraestruturas públicas financiadas con fondos de todas e todos estean a deteriorarse sen que o Concello actúe. Por iso, a moción presentada propón un acordo claro: que o goberno municipal actúe de inmediato para reparar e poñer en funcionamento os colectores, ou que, no caso de non querer recuperalos, proceda á súa retirada definitiva e segura da vía pública.

“O que non se pode permitir é que sigan precintados no medio dunha zona pública tan sensible, sen función algunha e xerando riscos e unha imaxe deplorable”, conclúen.

Desde o Grupo Municipal Socialista lembran que os colectores soterrados son unha solución moderna, eficiente e perfectamente viable se hai vontade política e unha xestión responsable. E engaden que non actuar sería unha mostra máis da deixadez e falta de proxecto do actual goberno local.