O PSOE da Guarda consigue que se amplíe a apertura dos baños públicos do litoral e a instalación dun aseo autolimpable no porto

 O Grupo Municipal Socialista da Guarda presentou no pleno de maio unha moción para mellorar os servizos públicos de aseos nas praias e no porto, que foi aprobada por unanimidade.

A iniciativa incluía dúas propostas principais: a instalación dun baño público autolimpable na zona do porto e a ampliación do período de apertura dos baños públicos situados na praia do Muíño e da Area Grande.

Desde o PSOE da Guarda valoran positivamente o apoio unánime da corporación, pero lembran a Roberto A. Carrero que “non abonda con votar a favor; agora hai que cumprir os acordos aprobados polo pleno”.

O grupo socialista advirte ademais de que “o goberno municipal está empezando a acostumarse a apoiar mocións da oposición que logo non executa”, polo que aseguran que estarán “vixiantes para que estas medidas non queden nun simple titular e se convertan nunha realidade para a veciñanza e para as persoas que visitan A Guarda”.

O PSOE da Guarda propón ampliar a apertura dos baños públicos do litoral e instalar un aseo autolimpable no porto.

 O Grupo Municipal Socialista da Guarda presentará no próximo pleno unha moción para mellorar os servizos públicos de aseos nas praias e no porto.

A iniciativa inclúe dúas propostas principais: a instalación dun baño público autolimpable na zona do porto e a ampliación do período de apertura dos baños públicos situados na praia do Muíño e da Area Grande.

Baño da praia da Area Grande

Desde o PSOE lembran que A Guarda vive desde hai anos unha notable desestacionalización do turismo vinculada ao incremento de peregrinos e peregrinas do Camiño Portugués da Costa, facendo que exista movemento de visitantes durante boa parte do ano e non unicamente nos meses de verán.

Os/as socialistas sinalan que os baños públicos do Muíño e Area Grande permanecen pechados gran parte do ano pese a atoparse en zonas de paso habitual de persoas que pasean, practican deporte ou realizan o Camiño de Santiago.

Por outra banda, o Grupo Municipal Socialista considera necesaria a instalación dun aseo autolimpable na zona do porto, un espazo cun importante movemento social, turístico e hostaleiro, especialmente durante fins de semana e períodos de maior afluencia.

A proposta inclúe tamén unha petición relativa á apertura dos baños públicos do Muíño e Area Grande entre os meses de marzo a outubro, ademais de estudar fórmulas de mantemento e limpeza que garantan o correcto funcionamento destes servizos.

“Falamos de limpeza e atención á veciñanza, pero tamén de ofrecer unha mellor atención ás persoas que visitan A Guarda ao longo do ano”, sinalan desde o PSOE da Guarda.

O PSOE da Guarda canaliza demandas reais e acada acordos no pleno

O Grupo Municipal Socialista da Guarda conseguiu o apoio unánime da Corporación para dúas mocións que abordaban cuestións de relevancia para a veciñanza: a transparencia na facturación do abastecemento de auga e a seguridade peonil nun tramo da rúa Donantes de Sangre.

A primeira das iniciativas fai referencia á facturación do servizo municipal de abastecemento de auga, tras detectarse que, desde que a ORAL da Deputación de Pontevedra, asumiu a recadación, os recibos deixaron de incluír información básica como as lecturas anteriores e actuais dos contadores. Esta situación dificulta que a cidadanía poida comprobar ou contrastar o consumo facturado e limita as posibilidades de reclamación.

Concelleiros do Grupo Municipal Socialista

Desde o Grupo Municipal Socialista lembraron que a normativa municipal reguladora do servizo de abastecemento de auga, no seu artigo 43, establece de maneira expresa que esta información debe figurar obrigatoriamente nos recibos. Por este motivo, a moción aprobada insta ao Concello a esixir á Deputación a inclusión deses datos nos recibos bancarios, garantindo desta forma unha información clara, transparente e accesible para toda a veciñanza, tendo en conta especialmente ás persoas maiores ou con dificultades para acceder a medios dixitais.

A segunda moción aprobada responde a unha demanda veciñal da rúa Donantes de Sangre, onde existe unha carencia evidente de beirarrúas nun tramo moi utilizado para os desprazamentos a pé cara ao centro da vila. A falta de continuidade das beirarrúas obriga ás persoas a camiñar polo arcén, nalgúns puntos moi estreito, xerando unha situación de risco, especialmente para persoas maiores, con mobilidade reducida, usuarias de cadeiras de rodas ou familias con carriños de bebés.

Desde o PSOE da Guarda puxéronse tamén de manifesto os riscos existentes na contorna do cruzamento co Camiño de Lamela, onde realiza parada o autobús escolar, ao non existir espazos seguros para o tránsito peonil. A moción obriga agora ao Concello a iniciar os trámites necesarios para a dotación de beirarrúas neste tramo da rúa, garantindo criterios de accesibilidade universal, así como a avaliación da seguridade viaria na zona da parada escolar.

A portavoz do Grupo Municipal Socialista, Fátima Rodríguez, valorou positivamente o respaldo unánime do pleno, destacando que “O PSOE da Guarda seguirá escoitando á veciñanza e levando ao pleno propostas concretas e útiles, unha forma de traballar que define o proxecto co que aspira a gobernar a vila, fronte ao modelo actual baseado máis en posar para a foto que na xestión”.

Dúas novas mocións do PSOE da Guarda para responder a demandas veciñais.

O Grupo Municipal Socialista da Guarda presentará no próximo pleno ordinario dúas mocións que abordan cuestións de relevancia para a veciñanza: a transparencia na facturación do abastecemento de auga e a seguridade peonil nun tramo da rúa Donantes de Sangre.

A primeira das iniciativas esixe o cumprimento da normativa vixente na facturación do servizo municipal de abastecemento de auga, logo de detectar que, desde que a recadación foi asumida pola ORAL da Deputación de Pontevedra, os recibos que emiten as entidades bancarias deixaron de incluír información básica sobre os consumos realizados. Esta carencia impide á cidadanía comprobar os datos facturados e dificulta calquera posibilidade de control ou reclamación, xerando unha situación de indefensión que resulta inaceptable nun servizo público básico. A moción insta a corrixir de maneira inmediata esta práctica e garantir unha facturación clara, detallada e conforme ao que establece a normativa municipal.

A segunda moción pon o foco na necesidade de dotar de beirarrúas o tramo final da rúa Donantes de Sangre. A falta de continuidade das beirarrúas obriga a camiñar polo arcén, que nalgúns puntos apenas alcanza os 40 centímetros, o que supón un alto risco, especialmente para persoas maiores, persoas con mobilidade reducida, usuarias de cadeiras de rodas, familias con carriños de bebés e estudantes que utilizan as paradas do transporte escolar. Con esta moción trátase de apoiar unha reclamación que leva meses na rúa grazas a unha iniciativa veciñal que está recollendo firmas para conseguir mellorar a seguridade peonil na zona.

Desde o Grupo Municipal Socialista sinalan que estas dúas mocións volven poñer de manifesto o contraste entre o traballo propositivo da oposición e a falta de contido dos últimos plenos municipais, nos que o equipo de goberno non está a levar asuntos de relevancia para o debate e a mellora da calidade de vida da veciñanza. “Mentres o goberno local presenta plenos baleiros de iniciativas, o PSOE da Guarda segue trasladando ao pleno problemas reais e demandas concretas da cidadanía, con propostas rigorosas e viables”, subliñan.

Os/as socialistas agardan contar co apoio do resto da corporación para sacar adiante ambas iniciativas, que consideran fundamentais para avanzar nun Concello máis transparente, accesible e seguro para todas e todos.

O Grupo Socialista da Guarda insta ao alcalde a actuar e esixir solucións para un transporte público digno.

 O pasado mércores, o Grupo Municipal Socialista (GMS) conseguiu a aprobación unánime dunha moción para esixir á Xunta de Galicia melloras no servizo de transporte público na Guarda, unha demanda amplamente reclamada pola veciñanza.

A moción, presentada polo Grupo Municipal Socialista, tras numerosas queixas recollidas nos últimos meses, insta ao alcalde a deixar de mirar cara outro lado, e abordar o problema directamente co responsable da Consellería de Infraestruturas e Mobilidade da Xunta de Galicia, demandando solucións inmediatas ante as graves deficiencias da actual concesión xestionada pola empresa Lugove.

Desde a súa implantación a finais de 2020, este servizo revelou múltiples carencias:

• Redución de paradas.

• Frecuencias insuficientes, especialmente en horas punta.

• Autobuses saturados que deixan usuarios nas paradas sen alternativa de transporte.

Estas deficiencias afectan especialmente aos colectivos máis vulnerables: estudantes, persoas maiores que necesitan acceder aos hospitais de referencia (Álvaro Cunqueiro e Meixoeiro), e traballadores/as que dependen deste medio para os seus desprazamentos. A situación é tan grave que, en moitas ocasións, os/as usuarios/as vense obrigados/as a recorrer a taxis como única opción para chegar aos seus destinos.

Na moción aprobada, solicitouse:

1. Que o goberno local traslade á Xunta a urxencia de mellorar o servizo de transporte público.

2. Que se adapten horarios e se reforcen frecuencias para cubrir as necesidades reais da veciñanza.

3. Que se esixa á empresa adxudicataria o cumprimento rigoroso das condicións pactadas e se realice un seguimento eficaz.

Un transporte público eficiente non só mellora a calidade de vida da cidadanía senón que tamén garante a igualdade de acceso a servizos esenciais, como a educación e a sanidade, e contribúe á sostibilidade. Desde o GMS reiteramos o noso compromiso en esixir unha solución inmediata e efectiva para que A Guarda dispoña dun transporte público digno e acorde coas súas necesidades.