O PSOE da Guarda celebra a aprobación da súa moción en apoio ao sector pesqueiro e reclama á Xunta que actúe.

 O Grupo Municipal Socialista da Guarda amosa a súa satisfacción pola aprobación, no último pleno, da súa moción presentada en apoio ao sector pesqueiro e marisqueiro local, que acadou o respaldo unánime da corporación.

Desde o PSOE destacan que esta iniciativa nace do contacto directo coa Confraría Santa Tecla, que en febreiro lles trasladou a situación de enorme dificultade que atravesa o sector como consecuencia da sucesión de temporais e das limitacións normativas actuais.

Grupo municipal Socialista

Tal e como se puxo de manifesto durante o pleno, a frota local apenas puido traballar seis días entre o 1 de xaneiro e o 20 de febreiro, rexistrando perdas moi importantes que afectan directamente á economía de moitas familias da Guarda.

A moción aprobada insta á Xunta de Galicia a abrir un espazo de diálogo co sector e a introducir maior flexibilidade na normativa, permitindo adaptar os períodos de descanso á realidade dun porto de mar aberto como o da Guarda, especialmente en contextos nos que as condicións meteorolóxicas impiden a actividade durante longos períodos.

Texto da moción

“Estamos falando de sentido común: se non poden saír ao mar durante días polo temporal, non ten lóxica que cando as condicións o permiten tampouco poidan facelo por coincidir en fin de semana”, sinala Fátima Rodríguez, portavoz do grupo socialista.

Neste sentido, lembran que este tipo de medidas xa se están aplicando noutras comunidades autónomas, como Asturias ou Cantabria, polo que consideran que “non hai escusas para que a Xunta non actúe”.

Para o PSOE, a aprobación desta moción supón “un primeiro paso importante” para dar visibilidade á problemática do sector e para que as súas demandas sexan escoitadas no Parlamento de Galicia, onde o Grupo Parlamentario Socialista tamén rexistrou unha proposición non de lei que recolle estas mesmas reivindicacións e que será debatida proximamente.

Desde o PSOE local lamentan que durante estes meses especialmente complicados non existise un contacto directo do goberno local coa confraría para coñecer de primeira man a súa situación. En todo caso, valoran positivamente o apoio á moción no pleno. “Agora é o momento de que o Partido Popular en Santiago dea tamén un paso adiante e atenda as peticións dun sector que o único que reclama é poder traballar. É unha cuestión de vontade política e de xustiza para o sector”, sinalan desde o partido.

O PSOE acusa ao alcalde de renunciar a investimentos para A Guarda tras abandonar o GDR Galicia Suroeste e anuncia unha moción para revertelo.

O Grupo Municipal Socialista da Guarda anuncia que presentará unha moción no próximo pleno municipal para que o Concello recupere a súa participación en Galicia Suroeste Eurural, despois de que o alcalde decidise de maneira unilateral abandonar esta entidade clave para a captación de fondos e o desenvolvemento económico do territorio, sen debate público nin acordo plenario.

O PSOE considera que esta decisión supón renunciar a oportunidades e investimentos para o municipio por non asumir unha cota anual inferior aos 6.500 euros, unha cantidade mínima se se compara cos beneficios acadados pola Guarda nos últimos anos.

Fotografía de familia do GDR da que se borrou Carrero

Esta entidade beneficia directamente a emprendedores e emprendedoras, asociacións sen ánimo de lucro e aos propios concellos participantes, facilitando a chegada de investimentos e novas oportunidades ao territorio.

Nos últimos anos, A Guarda recibiu de forma directa máis de 113.000 euros en investimentos a través do GDR. Grazas a estes fondos leváronse a cabo actuacións concretas como o cambio de fiestras e a instalación dun ascensor no obradoiro de emprego Manuel B. Portela, a creación dunha área recreativa inclusiva no Monte Torroso ou a instalación dun aula de informática e melloras na vivenda protexida da asociación Avelaíña.

A esta cantidade hai que sumar outros proxectos dos que a nosa vila foi beneficiaria, como a promoción turística conxunta en FITUR, a campaña “Parte de Ti”, o acto de lanzamento de marca celebrado na sede das Redeiras da Guarda ou o Foro da Muller Rural, entre outros, que acadaron máis de 127.000 euros adicionais.

Ademais, Galicia Suroeste está a xestionar actualmente proxectos con financiamento europeo e estatal por un importe próximo aos 2.000.000€, destinados a apoiar o emprendemento, atraer investimento e impulsar novas oportunidades económicas no territorio.

Desde o PSOE lembran que as asociacións e entidades da Guarda poderán seguir participando nos programas do GDR, pero advirten de que a saída do Concello supón reducir a capacidade económica da entidade e, polo tanto, as oportunidades futuras para o territorio.

Resulta difícil de entender que o goberno municipal renuncie a participar nunha entidade que trae investimentos e oportunidades por unha cota anual irrisoria, mentres ao mesmo tempo destina recursos públicos a cuestións moito menos prioritarias, como máis de 1.500 euros en apenas dous meses en entrevistas radiofónicas de promoción persoal do alcalde.

Mentres ao alcalde se lle enche a boca falando de crecemento económico, na práctica estase renunciando a ferramentas reais de colaboración e captación de fondos que benefician directamente aos/as emprendedores/as, asociacións e mesmo ao propio Concello da Guarda.

Por todo iso, desde o Grupo Municipal Socialista presentarán ao pleno unha moción para instar ao equipo de goberno a reconsiderar esta decisión e recuperar a participación do Concello nunha entidade que leva anos contribuíndo ao desenvolvemento local e comarcal, ao apoio das asociacións e, en definitiva, á mellora da calidade de vida da veciñanza.

Fotos, titulares e pouca realidade: o PSOE acusa ao goberno local de vivir da propaganda

Nos últimos días estamos asistindo a unha intensa campaña de autopromoción por parte do goberno municipal, que chega xusto despois de que a veciñanza puidese ver, con claridade, a actitude de desatención do alcalde nas súas responsabilidades na Deputación de Pontevedra. A resposta non foi máis traballo nin máis resultados: foi unha sucesión de publicacións en redes e notas de prensa destinadas a construír un relato que non se corresponde coa realidade.

A última mostra é a súa nota sobre turismo, na que se atribúen méritos e éxitos que nin promoveron nin impulsaron. Fálase de “traballo intenso e ben feito en promoción turística”, cando o certo é que a maior parte dos datos que exhiben responden á inercia de anos anteriores, ao esforzo do tecido asociativo e empresarial da vila e á consolidación de recursos que xa estaban plenamente posicionados moito antes de que este goberno tomase posesión.

O Monte Santa Trega leva décadas sendo o principal motor turístico da Guarda. As Festas do Monte, a Festa da Langosta, o porto, o estuario ou o Piueiro son atractivos consolidados que non naceron nestes dous últimos anos. Non se coñece ningunha iniciativa nova, transformadora ou estratéxica posta en marcha polo actual goberno que xustifique apropiarse destes resultados.

A oficialización en 2016 do "Camiño Portugués da Costa" e o seu posterior posicionamento foron froito dun traballo institucional e técnico desenvolvido hai anos. Dende entón, o actual executivo limitouse a aproveitar o crecemento natural dun itinerario que xa viña en expansión, sen impulsar melloras necesarias nin executar actuacións básicas. Un exemplo claro é a falta de sinalización axeitada en puntos clave como Camposancos, unha solicitude presentada polo Grupo Socialista e aprobada por unanimidade en pleno en maio de 2025, que a día de hoxe segue sen executarse, mentres os/as peregrinos/as continúan desorientándose en determinados tramos.

Tampouco resulta rigoroso atribuír ao Concello feitos que non dependen da súa acción directa, como a rodaxe dunha película na vila, a presenza entre finalistas dun concurso comercial ou o recoñecemento turístico dunha plataforma privada. Son circunstancias positivas para a Guarda, sen dúbida, pero non responden a unha planificación nin a unha estratexia municipal específica.

Esta mesma estratexia repítese tamén no ámbito económico. Mentres presumen de apoiar o comercio e a empresa, non puxeron en marcha nin formación, nin axudas, nin medidas reais de dinamización. O caso do polígono industrial é moi clarificador: se de verdade existise unha aposta firme por desenvolvelo como espazo para xerar emprego, nunca se tería barallado trasladar alí o punto limpo.

O problema de fondo é que se está a confundir presenza con xestión. Gobernar non é aparecer nas fotos, nin estar en todos os actos, nin limitarse á axenda institucional. Gobernar é dedicar horas ao despacho, planificar, reunirse, impulsar proxectos e facer seguimento continuo. E iso é o que non se está vendo. Hai moita actividade cara a fóra, pero moi pouca xestión real detrás.

A Guarda ten potencial, recursos e unha base sólida construída ao longo de moito tempo. O que precisa agora é un goberno que lidere, que planifique e que execute. Non un executivo máis preocupado por responder ás críticas da oposición que por poñer en marcha políticas reais que melloren o presente e o futuro da nosa vila.

O PSOE da Guarda canaliza demandas reais e acada acordos no pleno

O Grupo Municipal Socialista da Guarda conseguiu o apoio unánime da Corporación para dúas mocións que abordaban cuestións de relevancia para a veciñanza: a transparencia na facturación do abastecemento de auga e a seguridade peonil nun tramo da rúa Donantes de Sangre.

A primeira das iniciativas fai referencia á facturación do servizo municipal de abastecemento de auga, tras detectarse que, desde que a ORAL da Deputación de Pontevedra, asumiu a recadación, os recibos deixaron de incluír información básica como as lecturas anteriores e actuais dos contadores. Esta situación dificulta que a cidadanía poida comprobar ou contrastar o consumo facturado e limita as posibilidades de reclamación.

Concelleiros do Grupo Municipal Socialista

Desde o Grupo Municipal Socialista lembraron que a normativa municipal reguladora do servizo de abastecemento de auga, no seu artigo 43, establece de maneira expresa que esta información debe figurar obrigatoriamente nos recibos. Por este motivo, a moción aprobada insta ao Concello a esixir á Deputación a inclusión deses datos nos recibos bancarios, garantindo desta forma unha información clara, transparente e accesible para toda a veciñanza, tendo en conta especialmente ás persoas maiores ou con dificultades para acceder a medios dixitais.

A segunda moción aprobada responde a unha demanda veciñal da rúa Donantes de Sangre, onde existe unha carencia evidente de beirarrúas nun tramo moi utilizado para os desprazamentos a pé cara ao centro da vila. A falta de continuidade das beirarrúas obriga ás persoas a camiñar polo arcén, nalgúns puntos moi estreito, xerando unha situación de risco, especialmente para persoas maiores, con mobilidade reducida, usuarias de cadeiras de rodas ou familias con carriños de bebés.

Desde o PSOE da Guarda puxéronse tamén de manifesto os riscos existentes na contorna do cruzamento co Camiño de Lamela, onde realiza parada o autobús escolar, ao non existir espazos seguros para o tránsito peonil. A moción obriga agora ao Concello a iniciar os trámites necesarios para a dotación de beirarrúas neste tramo da rúa, garantindo criterios de accesibilidade universal, así como a avaliación da seguridade viaria na zona da parada escolar.

A portavoz do Grupo Municipal Socialista, Fátima Rodríguez, valorou positivamente o respaldo unánime do pleno, destacando que “O PSOE da Guarda seguirá escoitando á veciñanza e levando ao pleno propostas concretas e útiles, unha forma de traballar que define o proxecto co que aspira a gobernar a vila, fronte ao modelo actual baseado máis en posar para a foto que na xestión”.

Dúas novas mocións do PSOE da Guarda para responder a demandas veciñais.

O Grupo Municipal Socialista da Guarda presentará no próximo pleno ordinario dúas mocións que abordan cuestións de relevancia para a veciñanza: a transparencia na facturación do abastecemento de auga e a seguridade peonil nun tramo da rúa Donantes de Sangre.

A primeira das iniciativas esixe o cumprimento da normativa vixente na facturación do servizo municipal de abastecemento de auga, logo de detectar que, desde que a recadación foi asumida pola ORAL da Deputación de Pontevedra, os recibos que emiten as entidades bancarias deixaron de incluír información básica sobre os consumos realizados. Esta carencia impide á cidadanía comprobar os datos facturados e dificulta calquera posibilidade de control ou reclamación, xerando unha situación de indefensión que resulta inaceptable nun servizo público básico. A moción insta a corrixir de maneira inmediata esta práctica e garantir unha facturación clara, detallada e conforme ao que establece a normativa municipal.

A segunda moción pon o foco na necesidade de dotar de beirarrúas o tramo final da rúa Donantes de Sangre. A falta de continuidade das beirarrúas obriga a camiñar polo arcén, que nalgúns puntos apenas alcanza os 40 centímetros, o que supón un alto risco, especialmente para persoas maiores, persoas con mobilidade reducida, usuarias de cadeiras de rodas, familias con carriños de bebés e estudantes que utilizan as paradas do transporte escolar. Con esta moción trátase de apoiar unha reclamación que leva meses na rúa grazas a unha iniciativa veciñal que está recollendo firmas para conseguir mellorar a seguridade peonil na zona.

Desde o Grupo Municipal Socialista sinalan que estas dúas mocións volven poñer de manifesto o contraste entre o traballo propositivo da oposición e a falta de contido dos últimos plenos municipais, nos que o equipo de goberno non está a levar asuntos de relevancia para o debate e a mellora da calidade de vida da veciñanza. “Mentres o goberno local presenta plenos baleiros de iniciativas, o PSOE da Guarda segue trasladando ao pleno problemas reais e demandas concretas da cidadanía, con propostas rigorosas e viables”, subliñan.

Os/as socialistas agardan contar co apoio do resto da corporación para sacar adiante ambas iniciativas, que consideran fundamentais para avanzar nun Concello máis transparente, accesible e seguro para todas e todos.

O PSOE da Guarda acusa ao concello de falta de empatía co persoal da piscina municipal

 O Grupo Municipal Socialista da Guarda denuncia a ausencia total de vontade política e empatía do Goberno local coa situación das traballadoras e traballadores da piscina municipal, que durante dez meses, como mínimo, verán reducidos os seus ingresos ao 70% da súa base reguladora debido ao ERTE derivado da obra de reforma da instalación.

No pleno extraordinario celebrado hoxe, no que se aprobou o Plan de Seguridade e Saúde da obra, a portavoz socialista Fátima Rodríguez puxo enriba da mesa a situación “profundamente inxusta” na que queda o persoal, que ademais leva “meses vivindo nunha incerteza absoluta sen recibir información clara sobre o seu futuro laboral”.

Grupo Municipal Socialista

Rodríguez lembrou que o Goberno local comprometeuse expresamente a buscar unha fórmula que evitase a perda de capacidade adquisitiva do persoal durante o tempo que non puidesen traballar, pero que esas promesas “non se van cumprir”. Ademais, advertiu de que moitas destas persoas teñen contratos a tempo parcial, polo que o impacto económico do ERTE será aínda maior.

Durante a súa intervención, a portavoz deu lectura ao comunicado publicado fai uns días por CCOO, no que o sindicato critica que, aínda que o concello reafirmou o seu compromiso co persoal en repetidas ocasións, finalmente se pode comprobar a ausencia de vontade real do Goberno para buscar alternativas.

Fátima Rodríguez lamentou especialmente que, tras unha denuncia tan clara e fundamentada realizada no pleno, o Goberno local optase polo silencio absoluto, sen ofrecer explicación nin defensa algunha, e defende que “ese silencio é o recoñecemento implícito de que o que dixemos é verdade e de que non teñen argumentos para negar a súa falta de compromiso coa xente traballadora”.

A portavoz socialista insistiu en que aquí non estamos ante unha dificultade administrativa, senón ante “un Goberno sen previsión, sen empatía e sen vocación de servizo público”.

“Cando se goberna así, sempre hai alguén que paga as consecuencias. E non son eles, que seguirán cobrando íntegros os seus salarios cada mes; son as traballadoras e traballadores da piscina, que non teñen responsabilidade ningunha nesta situación”, engadiu.

O Grupo Municipal Socialista esixe ao Goberno local que deixe de agocharse no silencio, e se poña a traballar para conseguir cumprir a palabra dada ao persoal.

O goberno de Carrero á deriva: dimisións, ausencias e promesas incumpridas

 Hai un ano e medio, o equipo de goberno da Guarda prometía un “novo rumbo” para o noso concello. A estas alturas comprobamos que esa promesa quedou en nada: o que vemos é un goberno en descomposición, cun alcalde con escasa dedicación ao concello e cun rumbo máis caótico que novo.

A primeira en saltar do barco foi Vanesa Alonso, veterinaria de profesión e que ocupaba o cargo de Concelleira de Medio Ambiente. Máis recentemente, tamén o fixo Fernando Reyes, piloto e Concelleiro de Turismo. Dúas dimisións en tan só ano e medio de mandato.

E se falamos de ausencias, o caso máis grave é o do concelleiro de Comercio e Empresa, Anxo Pena, que leva todo o 2024 desaparecido: ningún pleno, ningún proxecto, ningunha acción relevante das súas concellerías. A razón?: Leva un ano vivindo e traballando fóra de España, algo que consideramos totalmente incompatible co desempeño do seu cargo.

Ante tal situación, sin precedentes no noso concello, desde o Grupo Municipal Socialista decidimos presentar unha moción no pleno de novembro para esixir a súa comparecencia no próximo pleno ordinario. Queremos que explique á cidadanía que traballo fixo neste ano e, sobre todo, se pensa asumir as súas responsabilidades cara o futuro.

Pensamos que a nosa petición non é para nada desmesurada, polo que nos sorprendeu a postura do Partido Popular no pleno, que votou en contra desta moción, coma se a transparencia e a rendición de contas non foran importantes para eles/as. Por sorte para A Guarda, o seu socio de goberno e o resto da oposición apoiaron a nosa proposta, permitindo que saíse adiante. Agora toca esperar pola comparecencia, aínda que as expectativas, vistas as circunstancias, non son demasiado altas.

E por último, como levamos advertindo desde o inicio deste mandato, A Guarda non pode permitirse un alcalde sen a dedicación que o Concello require. Carrero reparte o seu tempo entre a Deputación (onde ten un 79% de adicación), a docencia, a avogacía e a Alcaldía, o que deixa ao noso municipio sen o liderado e o compromiso que merece. Como ben di o refrán, “quen moito abarca, pouco apreta”.

Desde o grupo municipal socialista lamentamos profundamente que A Guarda teña que soportar un goberno que prometía tanto e que, finalmente, quedou en nada. Mentres eles/as seguen á deriva, nós continuaremos traballando pola transparencia, pola responsabilidade e, sobre todo, polos intereses de todas as veciñas e veciños de A Guarda.

Carrero, sen peso en Santiago: só 50.000 euros para A Guarda en 2025

•  O pasado 21 de outubro, o delegado territorial Agustín Reguera, durante unha visita institucional á nosa localidade, anunciaba que a Xunta de Galicia asignará 16,5 millóns de euros á comarca do Baixo Miño dentro dos orzamentos de 2025.
• Porén, deses 16,5 millóns, A Guarda só recibirá unha partida de 50.000 euros, destinada ao proxecto do “Novo vial de acceso ao porto”. É irónico que a imaxe que acompaña esta nova fora tomada na Guarda, un dos concellos que menos recursos recibirá en 2025 por parte deste ente autonómico.

O Grupo Parlamentario do PSdeG-PSOE fíxonos chegar o pasado sábado os orzamentos da Xunta para que puidésemos estudalos e presentar as nosas propostas de emenda. Segundo o documento, a única asignación para A Guarda será de 50.000 euros para o vial de acceso ao porto.

No último pleno ordinario de setembro, o Partido Socialista presentou unha moción para instar a Carrero a reactivar de forma urxente o proxecto da saída sur ao porto, que o alcalde tiña "esquecido nun caixón" dende a súa chegada ao cargo. A moción foi aprobada por unanimidade, polo que Carrero tiña que "poñerse as pilas" e comezar a "petar portas" tanto na Xunta como na Deputación para conseguir o financiamento necesario para levar a cabo a obra.

A parte máis complicada do proxecto, que consistía en lograr que a Deputación redactase o proxecto e obter todas as autorizacións sectoriais favorables, xa fora completada polos/as socialistas. Agora, ao actual equipo de goberno só lles resta conseguir os fondos para executar a obra.

De momento, parece que a "recolecta de cartos" non vai demasiado ben, xa que só contamos con eses 50.000 euros da Xunta, unha cantidade insignificante tendo en conta que o custo total da obra ascende a máis de 1.700.000 euros.

Está claro que Carrero é un alcalde ineficaz para xestionar o Concello no día a día, pero tamén demostra ser incapaz de atraer investimento para a nosa localidade, nin sequera cando o seu propio partido goberna na Xunta.

En resumo, con Carrero na Alcaldía e o PP na Xunta, o futuro que nos agarda nos próximos tres anos pinta moi, pero que moi negro.

Carrero deixa 1 ano “no caixón” o proxecto da Saída Sur ao Porto da Guarda.

•  A tan ansiada saída sur ao porto, un proxecto que os/as socialistas estabamos sacando adiante coa colaboración da Deputación de Pontevedra, e que quedara moi avanzado a finais da lexislatura pasada, leva todo un ano paralizado.

• A portavoz do partido socialista, Fátima Rodríguez, presentará unha moción ao pleno para que o actual equipo de goberno teña que comprometerse a seguir impulsando este proxecto.

As xestións para dotar á Guarda desta necesaria infraestrutura foran xa iniciadas a principios de marzo de 2017, ano no que o anterior alcalde da Guarda, Antonio Lomba, solicitou á Deputación de Pontevedra presidida pola socialista Carmela Silva, a redacción do proxecto desta infraestrutura, vinculada á humanización de Concepción Arenal.

Infografía do acceso sur do porto da Guarda

Despois de anos de trámites e antes do remate da anterior lexislatura, conseguíase o informe favorable de Patrimonio ao proxecto proposto. E, en xuño de 2023, co mandato de Carrero xa iniciado, publicábase no DOGA o informe favorable da Dirección Xeral de Calidade Ambiental, que definitivamente daba luz verde ao proxecto de construción dun novo acceso ao porto da Guarda.

Unha vez feitos estes trámites, que realmente eran os máis complicados, o actual alcalde debería ter “movido ficha” neste asunto durante este ano, pero non foi así. Fai unhas semanas solicitamos acceso ao expediente para saber en que punto se atopaba o tema, e cando nolo deron puidemos comprobar que todo o procedemento quedara paralizado xusto no punto no que nós o deixáramos.

Todo isto ven a demostrar, unha vez máis, que todos eses asuntos que parecían preocuparlle tanto a Carrero cando estaba na oposición e sobre os que facía tanta demagoxia, agora pasaron a un segundo ou terceiro plano.

Preguntámonos se este goberno vai a seguir paralizando todos os proxectos importantes para A Guarda, e se Carrero vai a seguir no seu papel de “alcalde ausente” os próximos tres anos de lexislatura.

Tamén nos gustaría saber se Roberto vai a preocuparse nalgún momento dos asuntos da Guarda, porque aínda que vaia aos eventos e se saque fotos para aparentar actividade, este alcalde non lle dedica suficiente tempo ao Concello, e ás probas nos remitimos: subvencións perdidas, proxectos paralizados, falta de mantenemento, ausencia de novas iniciativas, etc.

Nós, pola nosa parte, e demostrando o noso compromiso coa Guarda levaremos a pleno unha moción para que o equipo de goberno teña que comprometerse a seguir adiante con este proxecto, e sobre todo non se perdan todos os avances feitos desde 2017, avances aos que costou moito esforzo e tempo chegar.

Roberto A. Carrero, un alcalde ausente que non fai o traballo que se espera del

Ante dúas cuestións lanzadas pola portavoz do Grupo Municipal Socialista durante o punto de Rogos e Preguntas do último pleno, o Alcalde evadiu de xeito directo a súa responsabilidade como rexidor e demostrou o pouco que lle importan o noso pobo e a súa cidadanía.

Unha das cuestións estaba relacionada co ferri. Pedimos información sobre cando íamos a ter de novo conexión con Caminha, e que pasaba co pantalán de atraque que aínda non chegou a instalarse, cando el mesmo nos asegurou nunha reunión mantida con nós en novembro de 2023, que o pantalán estaría instalado nunhas semanas.

Rampa do Ferry - Alto non pasar

A outra cuestión estaba relacionada coa Estación Marítima da Pasaxe. Queremos recordar que a Estación Marítima é un edificio que pertence a Portos de Galicia e que inicialmente estaba cedido ao Concello da Guarda ata xuño de 2029.

O anterior equipo de goberno sacou a última licitación para a explotación da cafetería da Estación Marítima en marzo de 2022, e á mesma presentáranse dúas empresas locais interesadas, pero pouco despois de saír a licitación, Portos de Galicia decidiu rescindir a concesión alegando cuestións normativas, e tivo que paralizarse o proceso posto que o edificio deixaba de estar cedido ao Concello.

Un ano despois do cese da concesión, durante unha visita á Guarda da Responsable de Portos de Galicia, e ante a pregunta do noso Concelleiro Rafa Alvarez de que tiñan previsto facer coa Estación Marítima, comentou que estaban perfilando un proxecto para ese edificio, pero que nese momento non podían darlle ningunha información ao respecto.

Dado que xa pasou un ano desa conversa, durante o pleno, tamén lle preguntamos ao Alcalde se tiña algunha noticia nova sobre este tema.

A súa resposta para estas dúas preguntas foi a mesma: “Para sabelo poden preguntarlle directamente a Portos de Galicia, porque son temas que non dependen do Concello”.

Cando lle comentamos que o normal sería que o alcalde estivera informado daqueles asuntos, que aínda sendo competencia doutras administracións, afectan á nosa cidadanía, volveu a insistir no mesmo: “Diríxase vostede á administración responsable dese tema”.

Ante a nosa sorpresa, volvemos a insistir preguntándolle se lle diría o mesmo a un/ha cidadán/a que lle fixera a consulta, e insistiu en que lle daría a mesma resposta que a nós. Que o/a animaría e axudaría a presentar unha instancia a través do Portelo Único dirixida a Portos de Galicia. Alucinante, non?

Dado que a nós si que nos preocupa ter informada á cidadanía, e vendo que ao Alcalde parece non importarlle nin a conexión con Caminha nin que a estación Marítima se caia a pedazos, o luns día 8 de abril, desde o Grupo Municipal Socialista da Guarda, presentamos unha instancia dirixida a Portos de Galicia solicitando que nos dean resposta e aclaren as nosas dúbidas en relación a estes temas.

Nós, despois da sorprendente resposta de Carrero no pleno, sacamos a mesma conclusión á que levamos chegando durante todos estes meses de goberno: A Guarda ten un alcalde ausente que non fai o traballo que se espera del.