O PP volve apropiarse do traballo alleo: Carrero inaugura un proxecto que os gobernos socialistas fixeron posible

Se hoxe a Guarda conta cun moderno edificio para as súas asociacións non é grazas a Roberto Á. Carrero nin ao Partido Popular. É grazas ao compromiso, á visión e ao traballo dos gobernos socialistas, que decidiron recuperar un inmoble que o PP deixara completamente abandonado.

A colocación dunha placa co nome do alcalde Roberto Á. Carrero no antigo colexio Sinde é a mellor mostra dunha forma de facer política á que, por desgraza, xa nos ten acostumados: apropiarse de actuacións que non impulsou, non planificou e para as que non tivo que buscar financiación, intentando borrar da memoria colectiva o traballo realizado durante anos polos gobernos socialistas.

Placa no Antigo Sinde

Cómpre lembrar que durante o último goberno popular, con Celso Rodríguez Fariñas formando parte do executivo, o antigo Sinde foi desaloxado alegando o seu suposto estado ruinoso. As asociacións foron expulsadas e o edificio quedou abandonado durante anos, mentres incluso se estendían rumores sobre unha posible venda do inmoble para intereses privados. Esa era a única proposta do Partido Popular para este espazo: abandonalo, deixalo deteriorarse e desprenderse del.

Foron os gobernos socialistas os que decidiron facer exactamente o contrario. O primeiro foi comprobar, mediante informes técnicos independentes, que o edificio podía recuperarse. Despois chegou o investimento, a rehabilitación progresiva dos espazos, o traslado das asociacións, a creación de aulas de formación e a posta en valor dun inmoble público que hoxe presta un enorme servizo á veciñanza.

Ese traballo non foi froito da casualidade. Foi unha aposta política sostida durante anos. Tanto é así que o goberno socialista deixou redactado o proxecto de rehabilitación integral do bloque agora inaugurado e conseguiu o financiamento da Deputación de Pontevedra para facelo realidade. É dicir, cando Carrero chegou á Alcaldía atopouse un proxecto pensado, redactado e financiado. O único que tivo que facer foi executalo.

Antigo Sinde reformado

Desde o Grupo Municipal Socialista alegrámonos de que este espazo estea finalmente ao servizo das asociacións, porque ese foi sempre o noso obxectivo. Pero tamén defendemos que a política debe exercerse con honestidade. Inaugurar unha obra é lexítimo; apropiarse do traballo alleo non o é.

Porque, por moitas placas que se coloquen, hai algo que non se pode cambiar: quen abandonou este edificio foi o Partido Popular, e quen o recuperou para a Guarda foron os gobernos socialistas.

 

O PSOE da Guarda acusa a Carrero de incumprir un acordo plenario unánime e de afogar economicamente ao tecido asociativo

 O Grupo Municipal Socialista da Guarda denuncia o novo incumprimento do alcalde, Roberto Carrero, despois de que transcorrido xa o primeiro semestre de 2026 o Concello continúe sen publicar a convocatoria anual das subvencións municipais por concorrencia competitiva, malia existir un acordo plenario aprobado por unanimidade para que estas axudas se convocasen antes do 30 de xuño.

A moción, presentada polo PSOE no pleno de novembro de 2025 e apoiada por todos os grupos políticos, buscaba precisamente evitar os continuos atrasos que estaban a prexudicar ás asociacións culturais, deportivas e sociais da Guarda, obrigándoas a desenvolver a súa actividade sen saber se contarían co respaldo económico do Concello.

Asociación Cultural Alfombras da Guarda en Avelino Vicente

"Carrero non só incumpre os compromisos que adquire coa oposición; incumpre tamén os acordos aprobados polo Pleno, que representa a vontade de toda a Corporación", sinala a voceira socialista, Fátima Rodríguez.

O PSOE lembra ademais que a situación é aínda máis grave porque as subvencións correspondentes ao exercicio 2025, convocadas xa con meses de atraso, foron xustificadas polas entidades hai xa varios meses e, a día de hoxe, seguen sen ser abonadas polo Concello. Esta circunstancia está a provocar importantes problemas de liquidez a asociacións que, en moitos casos, tiveron que adiantar recursos propios para desenvolver actividades de interese xeral.

"Estamos falando de colectivos que dinamizan a vida cultural, deportiva e social da Guarda. O Concello esíxelles cumprir prazos e obrigas administrativas, pero logo é o propio goberno municipal o que incumpre sistematicamente cos seus compromisos", denuncia Rodríguez.

Reunion de asociacións para a III Mostra Asociativa

Para os socialistas, esta forma de actuar evidencia "unha absoluta falta de planificación e de respecto polo tecido asociativo". Consideran que Carrero converteu nunha práctica habitual gobernar tarde e mal, trasladando ás asociacións as consecuencias da súa incapacidade para xestionar.

O Grupo Municipal Socialista esixe ao alcalde que publique de maneira inmediata a convocatoria de subvencións de 2026 e que proceda sen máis demora ao pagamento das axudas de 2025 xa xustificadas, evitando que as asociacións da Guarda continúen financiando co seu propio esforzo económico unha ineficacia que é responsabilidade exclusiva do goberno municipal.

O PSOE da Guarda acusa a Carrero de gobernar “a golpe de improvisación” tras dous intentos fallidos de traslado do punto limpo.

O Grupo Municipal Socialista da Guarda acusa ao alcalde, Roberto A. Carrero, de gobernar “sen rumbo, sen planificación e a golpe de improvisación” despois de confirmar nunha reunión cos veciños/as da zona a paralización do traslado do punto limpo á rúa Maceiras, o segundo intento fallido nun asunto importante para o municipio.

Desde o PSOE lembran que esta situación non é puntual, senón a consecuencia directa dunha forma de gobernar baseada en anunciar proxectos sen ter resoltos nin os aspectos máis básicos. “Primeiro pretenderon instalalo na zona da Gándara, cun proxecto inviable que incluso afectaba a terreos doutro concello. Logo na rúa Maceiras, onde xa investiron case 40.000€ de diñeiro público na compra das parcelas que, a día de hoxe, non teñen utilidade algunha. Canto nos vai custar a falta de planificación deste goberno?”, denuncia a súa portavoz municipal Fátima Rodríguez.

Ubicacións fallidas do punto limpo

Os/as socialistas denuncian que o goberno local actuou de novo sen rigor técnico nin análise previa, escollendo unha segunda localización que carecía de servizos, que requiría complexos trámites urbanísticos e que, ademais, prexudicaba directamente á veciñanza da zona, tanto polo impacto ambiental como pola perda de valor das súas propiedades.

Pero, ademais, advirten dun problema de fondo: a falta absoluta de visión de futuro. “Estamos falando dunha zona próxima a unha franxa onde se poderían construír vivendas unifamiliares, algo do que A Guarda vai moi xusta. Se a veciñanza non se mobilizara Carrero tería hipotecado solo dispoñible para construír, por mor das súas decisións tomadas á lixeira”, sinalan.

Para o Grupo Socialista, o máis grave é que esta cadea de erros ten consecuencias directas para as arcas municipais. “Aquí xa se gastou diñeiro en proxectos que non serven e en terreos que non se van utilizar. E agora, haberá que volver gastar máis para buscar unha terceira ubicación. Isto non é serio nin responsable”.

A pesar das críticas, desde o PSOE valoran que o goberno local rectificase e paralizase o proxecto na rúa Maceiras tras a presión veciñal, pero deixan claro que “non se pode gobernar a base de erros e rectificacións continuas”.

 

O PSOE da Guarda celebra a aprobación da súa moción en apoio ao sector pesqueiro e reclama á Xunta que actúe.

 O Grupo Municipal Socialista da Guarda amosa a súa satisfacción pola aprobación, no último pleno, da súa moción presentada en apoio ao sector pesqueiro e marisqueiro local, que acadou o respaldo unánime da corporación.

Desde o PSOE destacan que esta iniciativa nace do contacto directo coa Confraría Santa Tecla, que en febreiro lles trasladou a situación de enorme dificultade que atravesa o sector como consecuencia da sucesión de temporais e das limitacións normativas actuais.

Grupo municipal Socialista

Tal e como se puxo de manifesto durante o pleno, a frota local apenas puido traballar seis días entre o 1 de xaneiro e o 20 de febreiro, rexistrando perdas moi importantes que afectan directamente á economía de moitas familias da Guarda.

A moción aprobada insta á Xunta de Galicia a abrir un espazo de diálogo co sector e a introducir maior flexibilidade na normativa, permitindo adaptar os períodos de descanso á realidade dun porto de mar aberto como o da Guarda, especialmente en contextos nos que as condicións meteorolóxicas impiden a actividade durante longos períodos.

Texto da moción

“Estamos falando de sentido común: se non poden saír ao mar durante días polo temporal, non ten lóxica que cando as condicións o permiten tampouco poidan facelo por coincidir en fin de semana”, sinala Fátima Rodríguez, portavoz do grupo socialista.

Neste sentido, lembran que este tipo de medidas xa se están aplicando noutras comunidades autónomas, como Asturias ou Cantabria, polo que consideran que “non hai escusas para que a Xunta non actúe”.

Para o PSOE, a aprobación desta moción supón “un primeiro paso importante” para dar visibilidade á problemática do sector e para que as súas demandas sexan escoitadas no Parlamento de Galicia, onde o Grupo Parlamentario Socialista tamén rexistrou unha proposición non de lei que recolle estas mesmas reivindicacións e que será debatida proximamente.

Desde o PSOE local lamentan que durante estes meses especialmente complicados non existise un contacto directo do goberno local coa confraría para coñecer de primeira man a súa situación. En todo caso, valoran positivamente o apoio á moción no pleno. “Agora é o momento de que o Partido Popular en Santiago dea tamén un paso adiante e atenda as peticións dun sector que o único que reclama é poder traballar. É unha cuestión de vontade política e de xustiza para o sector”, sinalan desde o partido.

O PSOE da Guarda acusa ao concello de falta de empatía co persoal da piscina municipal

 O Grupo Municipal Socialista da Guarda denuncia a ausencia total de vontade política e empatía do Goberno local coa situación das traballadoras e traballadores da piscina municipal, que durante dez meses, como mínimo, verán reducidos os seus ingresos ao 70% da súa base reguladora debido ao ERTE derivado da obra de reforma da instalación.

No pleno extraordinario celebrado hoxe, no que se aprobou o Plan de Seguridade e Saúde da obra, a portavoz socialista Fátima Rodríguez puxo enriba da mesa a situación “profundamente inxusta” na que queda o persoal, que ademais leva “meses vivindo nunha incerteza absoluta sen recibir información clara sobre o seu futuro laboral”.

Grupo Municipal Socialista

Rodríguez lembrou que o Goberno local comprometeuse expresamente a buscar unha fórmula que evitase a perda de capacidade adquisitiva do persoal durante o tempo que non puidesen traballar, pero que esas promesas “non se van cumprir”. Ademais, advertiu de que moitas destas persoas teñen contratos a tempo parcial, polo que o impacto económico do ERTE será aínda maior.

Durante a súa intervención, a portavoz deu lectura ao comunicado publicado fai uns días por CCOO, no que o sindicato critica que, aínda que o concello reafirmou o seu compromiso co persoal en repetidas ocasións, finalmente se pode comprobar a ausencia de vontade real do Goberno para buscar alternativas.

Fátima Rodríguez lamentou especialmente que, tras unha denuncia tan clara e fundamentada realizada no pleno, o Goberno local optase polo silencio absoluto, sen ofrecer explicación nin defensa algunha, e defende que “ese silencio é o recoñecemento implícito de que o que dixemos é verdade e de que non teñen argumentos para negar a súa falta de compromiso coa xente traballadora”.

A portavoz socialista insistiu en que aquí non estamos ante unha dificultade administrativa, senón ante “un Goberno sen previsión, sen empatía e sen vocación de servizo público”.

“Cando se goberna así, sempre hai alguén que paga as consecuencias. E non son eles, que seguirán cobrando íntegros os seus salarios cada mes; son as traballadoras e traballadores da piscina, que non teñen responsabilidade ningunha nesta situación”, engadiu.

O Grupo Municipal Socialista esixe ao Goberno local que deixe de agocharse no silencio, e se poña a traballar para conseguir cumprir a palabra dada ao persoal.

Carrero, un apaixonado dos proxectos socialistas.

Nos últimos días, o Concello da Guarda anunciaba a bombo e platillo a inminente finalización do pumptrack da Atalaia, incluído na rehabilitación da zona deportiva de Punta Xanete. O alcalde, Roberto A. Carrero, presume dunha actuación que, por moito que lle pese recoñecelo, non é máis que outro proxecto herdado do anterior goberno socialista.

Desde o grupo socialista queremos lembrar, unha vez máis, que este proxecto foi deseñado, redactado e xestionado durante o noso último mandato, no que se elaborou a proposta, se conseguiron os permisos sectoriais e se deixou todo listo para a súa execución. Xa en febreiro de 2021, os medios de comunicación recollían a noticia: A Guarda contaría cunha pista de pumptrack na Atalaia, un proxecto que quería responder ás demandas da veciñanza máis nova e deportista do noso pobo.

Pista de pumptrack do proxecto Socialista

O actual goberno local liderado por un Carrero, cada vez máis especialista en coller atallos, gardou este proxecto nun caixón durante dous anos, sen dar explicación algunha. E agora, como se fose novidade, sácao do esquecemento coma quen acaba de ter unha idea xenial.

Pero isto non é unha excepción. Ao contrario: parece que a única política do señor Carrero é vivir do legado socialista. Tras dous anos á fronte do Concello, a realidade é contundente: non deu sacado adiante nin un só proxecto propio. A súa xestión limítase a inaugurar ou anunciar o que xa lle deixamos feito: a rehabilitación da piscina municipal, a reforma do antigo colexio Sinde, a renovación da rúa Coruña ou a rehabilitación da escola de San Lorenzo, ou como neste caso o proxecto da pumptrack, que se apresura a vender como se fose obra súa.

Desde o grupo socialista, instamos ao alcalde a que deixe de vivir da herdanza e comece a traballar de verdade, cunha folla de ruta propia e iniciativas que respondan ás necesidades reais da veciñanza. Mentres iso non ocorra, seguiremos lembrando á cidadanía quen traballa e quen simplemente se pendura medallas alleas.

O PSOE da Guarda abstense na votación sobre a licitación da piscina pola falta de garantías e transparencia do goberno local.

O Grupo Municipal Socialista da Guarda decidiu absterse na votación da proposta do goberno local para licitar novamente a obra de reforma da piscina municipal, ante a existencia dun informe desfavorable da intervención municipal, que alerta de riscos económicos graves para o Concello.

Desde o PSOE explican que, como forza política responsable, non poden apoiar unha proposta que inclúe o levantamento dun reparo suspensivo de intervención, cando os propios informes técnicos indican que non está garantida a financiación total da obra nin os prazos que esixe a subvención europea do millón e medio de euros.

Exterior da piscina municipal

Pero ademais, denuncian con total claridade que o goberno local mentiu descaradamente aos grupos da oposición cando se lles preguntou como pensaban cubrir o sobrecusto de máis de medio millón de euros que supuxo a revisión do proxecto da piscina.

"A resposta que se nos deu foi que ese diñeiro viría do Fondo de Cooperación Local da Xunta. Pero agora, grazas ao informe de intervención, descubrimos que iso non era certo: ese diñeiro non está concedido, non hai resolución firme, e o único que fixeron foi presentar unha solicitude. E presentar unha solicitude non é o mesmo que ter os cartos."

"Nós non estamos aquí para validar chapuzas nin improvisacións. E tampouco para acabar nun xulgado dentro duns anos por levantar un reparo de intervención que claramente advirte de que este procedemento non cumpre os requisitos. A responsabilidade política, e se é o caso tamén legal, será exclusivamente do equipo de goberno", sinalan desde o Grupo Socialista.

A portavoz socialista, Fátima Rodríguez, insiste en que a abstención non foi en ningún caso un freo á obra da piscina, que consideran necesaria e urxente para A Guarda. "A nosa abstención foi unha forma de dicir 'si' ao proxecto pero 'non' a esta forma de gobernar. A veciñanza merece obras ben feitas, ben financiadas e sen riscos para as contas municipais."

Desde o PSOE lembran, ademais, que todo este proceso podería terse evitado se o goberno local tivese actuado con máis antelación e responsabilidade: "Se se puxeran mans á obra cando tocaba, e se xestionasen as cousas con planificación e rigor, hoxe non estariamos nesta situación. Pero a improvisación e a falta de seriedade teñen consecuencias, e lamentablemente quen paga é A Guarda. Por non falar da inxente cantidade de plenos extraordinarios que están a convocar, co gasto que iso supón para o Concello".

O outro grupo da oposición tamén decidiu absterse, deixando en evidencia o illamento do goberno local nesta votación clave, e o malestar xeneralizado pola forma na que se está a xestionar un proxecto que debera ser motivo de consenso, non de polémica.