O PSOE da Guarda propón ampliar a apertura dos baños públicos do litoral e instalar un aseo autolimpable no porto.

 O Grupo Municipal Socialista da Guarda presentará no próximo pleno unha moción para mellorar os servizos públicos de aseos nas praias e no porto.

A iniciativa inclúe dúas propostas principais: a instalación dun baño público autolimpable na zona do porto e a ampliación do período de apertura dos baños públicos situados na praia do Muíño e da Area Grande.

Baño da praia da Area Grande

Desde o PSOE lembran que A Guarda vive desde hai anos unha notable desestacionalización do turismo vinculada ao incremento de peregrinos e peregrinas do Camiño Portugués da Costa, facendo que exista movemento de visitantes durante boa parte do ano e non unicamente nos meses de verán.

Os/as socialistas sinalan que os baños públicos do Muíño e Area Grande permanecen pechados gran parte do ano pese a atoparse en zonas de paso habitual de persoas que pasean, practican deporte ou realizan o Camiño de Santiago.

Por outra banda, o Grupo Municipal Socialista considera necesaria a instalación dun aseo autolimpable na zona do porto, un espazo cun importante movemento social, turístico e hostaleiro, especialmente durante fins de semana e períodos de maior afluencia.

A proposta inclúe tamén unha petición relativa á apertura dos baños públicos do Muíño e Area Grande entre os meses de marzo a outubro, ademais de estudar fórmulas de mantemento e limpeza que garantan o correcto funcionamento destes servizos.

“Falamos de limpeza e atención á veciñanza, pero tamén de ofrecer unha mellor atención ás persoas que visitan A Guarda ao longo do ano”, sinalan desde o PSOE da Guarda.

O PSdeG-PSOE da Guarda pide explicacións pola intención do goberno local de adquirir a casa de Don Eloypor preto de 800.000 euros

O Grupo Municipal Socialista da Guarda manifesta a súa preocupación ante as informacións coñecidas nos últimos días sobre a intención do goberno local de adquirir a coñecida como casa de Don  Eloy por unha cantidade que roldaría os 800.000 euros.

 

Dende o PSdeG-PSOE consideramos que, máis alá do atractivo que pode supoñer a recuperación dun inmoble singular do noso patrimonio, é imprescindible actuar con responsabilidade e transparencia cando se trata de investimentos desta magnitude, especialmente nun concello cunha capacidade económica limitada como é o da Guarda.

 

Á adquisición do inmoble habería que engadir, necesariamente, o elevado custo da súa rehabilitación. Cómpre lembrar que se trata dunha edificación suxeita ás restricións de Patrimonio, o que implica intervencións complexas, custosas e prolongadas no tempo, co obxectivo de conservar fielmente os seus elementos orixinais.

 

Neste contexto, o Grupo Municipal Socialista xa solicitou unha reunión co equipo de goberno co obxectivo de coñecer de primeira man en que punto se atopa esta operación, cales son os plans previstos para o inmoble e como se pretende financiar tanto a súa adquisición como a súa posterior rehabilitación.

 

Neste sentido, o PSdeG-PSOE pregúntase:

• Cal é o proxecto concreto para este inmoble e que uso se lle pretende dar? 

• Que retorno real terá para a veciñanza da Guarda? 

 

A día de hoxe, non consta unha planificación clara nin un estudo que xustifique o investimento, nin tampouco se coñece como se financiaría tanto a compra como a rehabilitación.

 

Ademais, resulta chamativo que o Concello xa teña realizado un investimento de arredor de 1.000 euros na redacción dun proxecto para a creación dun parque urbano neste espazo, sen que previamente se teña explicado o conxunto da actuación nin o seu encaixe dentro das prioridades municipais.

 

Dende o PSdeG-PSOE lembramos que o Concello da Guarda xa dispón de dúas casas indianas en propiedade, como é o Centro Cultural e a sede do Concello, polo que resulta aínda máis necesario aclarar que necesidades se pretenden cubrir con esta nova adquisición.

 

Nun contexto no que existen múltiples necesidades urxentes na vila: mantemento de espazos públicos, mellora de servizos básicos ou investimentos en infraestruturas, consideramos imprescindible abrir un debate serio sobre as prioridades reais do municipio.

Por todo isto, instamos ao goberno local a ofrecer explicacións claras, detalladas e públicas sobre esta operación, así como a garantir que calquera decisión deste tipo responda ao interese xeral da veciñanza e a unha planificación rigorosa e sostible no tempo.

 

A cidadanía debe coñecer a que se van a destinar os seus cartos, e sobre todo a non ser vítima da falla de planificación do actual goberno.

O PSOE da Guarda acusa a Carrero de gobernar “a golpe de improvisación” tras dous intentos fallidos de traslado do punto limpo.

O Grupo Municipal Socialista da Guarda acusa ao alcalde, Roberto A. Carrero, de gobernar “sen rumbo, sen planificación e a golpe de improvisación” despois de confirmar nunha reunión cos veciños/as da zona a paralización do traslado do punto limpo á rúa Maceiras, o segundo intento fallido nun asunto importante para o municipio.

Desde o PSOE lembran que esta situación non é puntual, senón a consecuencia directa dunha forma de gobernar baseada en anunciar proxectos sen ter resoltos nin os aspectos máis básicos. “Primeiro pretenderon instalalo na zona da Gándara, cun proxecto inviable que incluso afectaba a terreos doutro concello. Logo na rúa Maceiras, onde xa investiron case 40.000€ de diñeiro público na compra das parcelas que, a día de hoxe, non teñen utilidade algunha. Canto nos vai custar a falta de planificación deste goberno?”, denuncia a súa portavoz municipal Fátima Rodríguez.

Ubicacións fallidas do punto limpo

Os/as socialistas denuncian que o goberno local actuou de novo sen rigor técnico nin análise previa, escollendo unha segunda localización que carecía de servizos, que requiría complexos trámites urbanísticos e que, ademais, prexudicaba directamente á veciñanza da zona, tanto polo impacto ambiental como pola perda de valor das súas propiedades.

Pero, ademais, advirten dun problema de fondo: a falta absoluta de visión de futuro. “Estamos falando dunha zona próxima a unha franxa onde se poderían construír vivendas unifamiliares, algo do que A Guarda vai moi xusta. Se a veciñanza non se mobilizara Carrero tería hipotecado solo dispoñible para construír, por mor das súas decisións tomadas á lixeira”, sinalan.

Para o Grupo Socialista, o máis grave é que esta cadea de erros ten consecuencias directas para as arcas municipais. “Aquí xa se gastou diñeiro en proxectos que non serven e en terreos que non se van utilizar. E agora, haberá que volver gastar máis para buscar unha terceira ubicación. Isto non é serio nin responsable”.

A pesar das críticas, desde o PSOE valoran que o goberno local rectificase e paralizase o proxecto na rúa Maceiras tras a presión veciñal, pero deixan claro que “non se pode gobernar a base de erros e rectificacións continuas”.

 

O PSOE da Guarda celebra a aprobación da súa moción en apoio ao sector pesqueiro e reclama á Xunta que actúe.

 O Grupo Municipal Socialista da Guarda amosa a súa satisfacción pola aprobación, no último pleno, da súa moción presentada en apoio ao sector pesqueiro e marisqueiro local, que acadou o respaldo unánime da corporación.

Desde o PSOE destacan que esta iniciativa nace do contacto directo coa Confraría Santa Tecla, que en febreiro lles trasladou a situación de enorme dificultade que atravesa o sector como consecuencia da sucesión de temporais e das limitacións normativas actuais.

Grupo municipal Socialista

Tal e como se puxo de manifesto durante o pleno, a frota local apenas puido traballar seis días entre o 1 de xaneiro e o 20 de febreiro, rexistrando perdas moi importantes que afectan directamente á economía de moitas familias da Guarda.

A moción aprobada insta á Xunta de Galicia a abrir un espazo de diálogo co sector e a introducir maior flexibilidade na normativa, permitindo adaptar os períodos de descanso á realidade dun porto de mar aberto como o da Guarda, especialmente en contextos nos que as condicións meteorolóxicas impiden a actividade durante longos períodos.

Texto da moción

“Estamos falando de sentido común: se non poden saír ao mar durante días polo temporal, non ten lóxica que cando as condicións o permiten tampouco poidan facelo por coincidir en fin de semana”, sinala Fátima Rodríguez, portavoz do grupo socialista.

Neste sentido, lembran que este tipo de medidas xa se están aplicando noutras comunidades autónomas, como Asturias ou Cantabria, polo que consideran que “non hai escusas para que a Xunta non actúe”.

Para o PSOE, a aprobación desta moción supón “un primeiro paso importante” para dar visibilidade á problemática do sector e para que as súas demandas sexan escoitadas no Parlamento de Galicia, onde o Grupo Parlamentario Socialista tamén rexistrou unha proposición non de lei que recolle estas mesmas reivindicacións e que será debatida proximamente.

Desde o PSOE local lamentan que durante estes meses especialmente complicados non existise un contacto directo do goberno local coa confraría para coñecer de primeira man a súa situación. En todo caso, valoran positivamente o apoio á moción no pleno. “Agora é o momento de que o Partido Popular en Santiago dea tamén un paso adiante e atenda as peticións dun sector que o único que reclama é poder traballar. É unha cuestión de vontade política e de xustiza para o sector”, sinalan desde o partido.

O PSOE da Guarda critica que Carrero saque peito dunha reforma da Praza de Abastos moito menos ambiciosa do previsto.

A recente reinauguración da Praza de Abastos da Guarda, celebrada a pasada semana, foi utilizada polo alcalde para sacar peito da xestión do seu goberno e presentar a actuación como un gran proxecto propio. Con todo, desde o Grupo Municipal Socialista lembran que a realidade é bastante distinta: o proxecto de mellora da praza foi impulsado no anterior mandato polo goberno socialista e, ademais, o proxecto inicialmente previsto era moito máis ambicioso do que finalmente se executou.

Os/as socialistas explican que, no anterior mandato, desde a Concellería de Desenvolvemento Local, dirixida pola actual portavoz municipal socialista, Fátima Rodríguez, impulsouse un proxecto de dinamización e modernización da Praza de Abastos que ía moito máis alá dunha simple reforma estética. Este proxecto foi presentado a unha convocatoria de Fondos Europeos e conseguiu unha subvención de 318.458,40 € para poder executalo.

Renuncia de Carrero á subvención para a Praza de Abastos

A proposta incluía, ademais da reforma estética, que nin sequera se executou conforme ao proxecto inicial, diferentes actuacións destinadas a modernizar o mercado e mellorar os servizos á clientela. Entre elas atopábanse, por exemplo, a instalación de taquillas refrixeradas para facilitar a recollida de pedidos fóra do horario habitual da praza, a instalación dunha plataforma salvaescaleiras na terraza para acadar a accesibilidade total do mercado, así como outras actuacións orientadas á modernización das instalacións.

Ademais, o proxecto tamén contemplaba accións de formación e asesoramento para comerciantes, campañas de promoción e dinamización comercial e ferramentas para mellorar a visibilidade e competitividade dos negocios, medidas das que se poderían ter beneficiado non só os postos da praza senón tamén outros establecementos comerciais da vila.

Infografías do proxecto orixinal da Praza de Abastos

Segundo lembran os/as socialistas, esta subvención permitiría financiar estas actuacións sen ter que empregar fondos procedentes da Deputación de Pontevedra, podendo destinar ese diñeiro a outras obras necesarias no municipio.

Porén, un mes despois de recibir a resolución favorable da axuda europea conseguida polos/as Socialistas, xa co actual alcalde no goberno, o Concello decidiu renunciar a ela. O alcalde tratou de xustificar esta decisión alegando cuestións orzamentarias.

Asistentes a reinaguración da Praza

Desde o Grupo Municipal Socialista consideran que esta explicación non se sostén e lembran que a xestión municipal consiste precisamente en atopar solucións para non perder oportunidades de financiamento como esta. Renunciar a máis de 318.000 euros de fondos europeos xa concedidos non era, en ningún caso, unha opción. Aí quedou demostrada a nula capacidade de xestión deste goberno.

“Resulta chamativo que agora se organice unha reinauguración e se pretenda vender como un gran logro unha actuación que, ademais de ter sido impulsada polo anterior goberno socialista, quedou moi lonxe do proxecto inicialmente previsto”, sinalan desde o PSOE da Guarda.

O pleno da Guarda rectifica a ordenanza de emerxencia social tras unha petición socialista

O Grupo Municipal Socialista da Guarda valora positivamente a modificación introducida na nova Ordenanza de Axudas de Emerxencia Social do Concello da Guarda tras a proposta formulada polo grupo no pleno anterior.

Durante o debate da aprobación inicial, o Grupo Socialista apoiara a actualización das contías e a ampliación dos conceptos das axudas, medidas necesarias despois de anos sen revisión.

Con todo, tamén advertira dun requisito que consideraba inxusto: para poder acceder ás axudas de emerxencia era necesario estar ao corrente de pago coas administracións públicas.

Concelleiros do Grupo Municipal Socialista

O grupo explicou que esta condición podía deixar fóra precisamente ás persoas que máis necesitan estas axudas. Non é raro que quen acode aos servizos sociais teña débedas acumuladas, non por vontade propia, senón porque non chega a fin de mes.

Na práctica, iso significaba que unha persoa que precisase unha axuda urxente para pagar a luz, evitar un desafiuzamento ou cubrir necesidades básicas podía quedar excluída por ter unha débeda administrativa.

Tras a intervención do Grupo Socialista, o goberno municipal encargou aos servizos técnicos a redacción dun novo texto que elimina ese requisito nos casos de emerxencia social, garantindo ademais que a modificación se axuste á normativa vixente.

Para o Grupo Municipal Socialista, esta rectificación mellora de maneira clara a ordenanza e reforza o seu carácter social. “As axudas de emerxencia non poden funcionar como unha subvención ordinaria; son unha rede de seguridade para momentos moi duros”, sinala a súa portavoz municipal Fátima Rodríguez.

O grupo destaca que esta modificación demostra que é posible facer unha oposición crítica e ao mesmo tempo construtiva. O seu labor, indican, consiste en estudar os expedientes, detectar posibles melloras e defender cambios que beneficien á veciñanza. “Non se trata de opoñerse por sistema, senón de traballar para que as normas sexan máis xustas e máis útiles”, conclúen.

O PSOE acusa ao alcalde de renunciar a investimentos para A Guarda tras abandonar o GDR Galicia Suroeste e anuncia unha moción para revertelo.

O Grupo Municipal Socialista da Guarda anuncia que presentará unha moción no próximo pleno municipal para que o Concello recupere a súa participación en Galicia Suroeste Eurural, despois de que o alcalde decidise de maneira unilateral abandonar esta entidade clave para a captación de fondos e o desenvolvemento económico do territorio, sen debate público nin acordo plenario.

O PSOE considera que esta decisión supón renunciar a oportunidades e investimentos para o municipio por non asumir unha cota anual inferior aos 6.500 euros, unha cantidade mínima se se compara cos beneficios acadados pola Guarda nos últimos anos.

Fotografía de familia do GDR da que se borrou Carrero

Esta entidade beneficia directamente a emprendedores e emprendedoras, asociacións sen ánimo de lucro e aos propios concellos participantes, facilitando a chegada de investimentos e novas oportunidades ao territorio.

Nos últimos anos, A Guarda recibiu de forma directa máis de 113.000 euros en investimentos a través do GDR. Grazas a estes fondos leváronse a cabo actuacións concretas como o cambio de fiestras e a instalación dun ascensor no obradoiro de emprego Manuel B. Portela, a creación dunha área recreativa inclusiva no Monte Torroso ou a instalación dun aula de informática e melloras na vivenda protexida da asociación Avelaíña.

A esta cantidade hai que sumar outros proxectos dos que a nosa vila foi beneficiaria, como a promoción turística conxunta en FITUR, a campaña “Parte de Ti”, o acto de lanzamento de marca celebrado na sede das Redeiras da Guarda ou o Foro da Muller Rural, entre outros, que acadaron máis de 127.000 euros adicionais.

Ademais, Galicia Suroeste está a xestionar actualmente proxectos con financiamento europeo e estatal por un importe próximo aos 2.000.000€, destinados a apoiar o emprendemento, atraer investimento e impulsar novas oportunidades económicas no territorio.

Desde o PSOE lembran que as asociacións e entidades da Guarda poderán seguir participando nos programas do GDR, pero advirten de que a saída do Concello supón reducir a capacidade económica da entidade e, polo tanto, as oportunidades futuras para o territorio.

Resulta difícil de entender que o goberno municipal renuncie a participar nunha entidade que trae investimentos e oportunidades por unha cota anual irrisoria, mentres ao mesmo tempo destina recursos públicos a cuestións moito menos prioritarias, como máis de 1.500 euros en apenas dous meses en entrevistas radiofónicas de promoción persoal do alcalde.

Mentres ao alcalde se lle enche a boca falando de crecemento económico, na práctica estase renunciando a ferramentas reais de colaboración e captación de fondos que benefician directamente aos/as emprendedores/as, asociacións e mesmo ao propio Concello da Guarda.

Por todo iso, desde o Grupo Municipal Socialista presentarán ao pleno unha moción para instar ao equipo de goberno a reconsiderar esta decisión e recuperar a participación do Concello nunha entidade que leva anos contribuíndo ao desenvolvemento local e comarcal, ao apoio das asociacións e, en definitiva, á mellora da calidade de vida da veciñanza.