Dúas novas mocións do PSOE da Guarda para responder a demandas veciñais.

O Grupo Municipal Socialista da Guarda presentará no próximo pleno ordinario dúas mocións que abordan cuestións de relevancia para a veciñanza: a transparencia na facturación do abastecemento de auga e a seguridade peonil nun tramo da rúa Donantes de Sangre.

A primeira das iniciativas esixe o cumprimento da normativa vixente na facturación do servizo municipal de abastecemento de auga, logo de detectar que, desde que a recadación foi asumida pola ORAL da Deputación de Pontevedra, os recibos que emiten as entidades bancarias deixaron de incluír información básica sobre os consumos realizados. Esta carencia impide á cidadanía comprobar os datos facturados e dificulta calquera posibilidade de control ou reclamación, xerando unha situación de indefensión que resulta inaceptable nun servizo público básico. A moción insta a corrixir de maneira inmediata esta práctica e garantir unha facturación clara, detallada e conforme ao que establece a normativa municipal.

A segunda moción pon o foco na necesidade de dotar de beirarrúas o tramo final da rúa Donantes de Sangre. A falta de continuidade das beirarrúas obriga a camiñar polo arcén, que nalgúns puntos apenas alcanza os 40 centímetros, o que supón un alto risco, especialmente para persoas maiores, persoas con mobilidade reducida, usuarias de cadeiras de rodas, familias con carriños de bebés e estudantes que utilizan as paradas do transporte escolar. Con esta moción trátase de apoiar unha reclamación que leva meses na rúa grazas a unha iniciativa veciñal que está recollendo firmas para conseguir mellorar a seguridade peonil na zona.

Desde o Grupo Municipal Socialista sinalan que estas dúas mocións volven poñer de manifesto o contraste entre o traballo propositivo da oposición e a falta de contido dos últimos plenos municipais, nos que o equipo de goberno non está a levar asuntos de relevancia para o debate e a mellora da calidade de vida da veciñanza. “Mentres o goberno local presenta plenos baleiros de iniciativas, o PSOE da Guarda segue trasladando ao pleno problemas reais e demandas concretas da cidadanía, con propostas rigorosas e viables”, subliñan.

Os/as socialistas agardan contar co apoio do resto da corporación para sacar adiante ambas iniciativas, que consideran fundamentais para avanzar nun Concello máis transparente, accesible e seguro para todas e todos.

O PSOE da Guarda acusa ao concello de falta de empatía co persoal da piscina municipal

 O Grupo Municipal Socialista da Guarda denuncia a ausencia total de vontade política e empatía do Goberno local coa situación das traballadoras e traballadores da piscina municipal, que durante dez meses, como mínimo, verán reducidos os seus ingresos ao 70% da súa base reguladora debido ao ERTE derivado da obra de reforma da instalación.

No pleno extraordinario celebrado hoxe, no que se aprobou o Plan de Seguridade e Saúde da obra, a portavoz socialista Fátima Rodríguez puxo enriba da mesa a situación “profundamente inxusta” na que queda o persoal, que ademais leva “meses vivindo nunha incerteza absoluta sen recibir información clara sobre o seu futuro laboral”.

Grupo Municipal Socialista

Rodríguez lembrou que o Goberno local comprometeuse expresamente a buscar unha fórmula que evitase a perda de capacidade adquisitiva do persoal durante o tempo que non puidesen traballar, pero que esas promesas “non se van cumprir”. Ademais, advertiu de que moitas destas persoas teñen contratos a tempo parcial, polo que o impacto económico do ERTE será aínda maior.

Durante a súa intervención, a portavoz deu lectura ao comunicado publicado fai uns días por CCOO, no que o sindicato critica que, aínda que o concello reafirmou o seu compromiso co persoal en repetidas ocasións, finalmente se pode comprobar a ausencia de vontade real do Goberno para buscar alternativas.

Fátima Rodríguez lamentou especialmente que, tras unha denuncia tan clara e fundamentada realizada no pleno, o Goberno local optase polo silencio absoluto, sen ofrecer explicación nin defensa algunha, e defende que “ese silencio é o recoñecemento implícito de que o que dixemos é verdade e de que non teñen argumentos para negar a súa falta de compromiso coa xente traballadora”.

A portavoz socialista insistiu en que aquí non estamos ante unha dificultade administrativa, senón ante “un Goberno sen previsión, sen empatía e sen vocación de servizo público”.

“Cando se goberna así, sempre hai alguén que paga as consecuencias. E non son eles, que seguirán cobrando íntegros os seus salarios cada mes; son as traballadoras e traballadores da piscina, que non teñen responsabilidade ningunha nesta situación”, engadiu.

O Grupo Municipal Socialista esixe ao Goberno local que deixe de agocharse no silencio, e se poña a traballar para conseguir cumprir a palabra dada ao persoal.

O PSOE lidera melloras na Guarda con catro Mocións aprobadas por unanimidade

 O Grupo Municipal Socialista da Guarda conseguiu sacar adiante por unanimidade as catro mocións defendidas no Pleno celebrado o 1 de decembro, nas que se solicitaba a mellora do transporte público na comarca do Baixo Miño, a reposición das papeleiras retiradas e a instalación de modelos con separación de residuos, a publicación en prazo das subvencións municipais por concorrencia competitiva, e o reforzo das accións municipais contra a violencia machista con motivo do 25N.

Na primeira das mocións, o PSOE da Guarda instaba á Xunta de Galicia a reforzar o transporte público comarcal, mellorando as frecuencias, establecendo conexións directas cos hospitais e co CUVI e habilitando servizos a demanda nas parroquias. Tamén reclamaba a creación dunha Mesa Técnica Comarcal que permitise garantir unha planificación axeitada ás necesidades reais da veciñanza.

Votación dunha Moción no Pleno

A segunda iniciativa aprobada propuña un plan progresivo para volver colocar as papeleiras retiradas nos últimos anos e substituílas por modelos con separación de residuos, priorizando rúas comerciais, parques, prazas e zonas escolares, xunto cunha campaña de sensibilización para promover o seu uso correcto.

A terceira moción esixía ao goberno local publicar as subvencións municipais por concorrencia competitiva no primeiro semestre de cada ano, evitando atrasos como os dos últimos exercicios que dificultaron a planificación das asociacións e deportistas individuais.

Por último, a moción presentada con motivo do 25N pedía reforzar o compromiso municipal contra a violencia machista mediante accións de prevención dirixidas á mocidade, formación específica para a Policía Local e unha colaboración máis estreita co tecido asociativo. Ademais, instaba á Xunta de Galicia a mellorar as súas políticas nesta materia, especialmente no ámbito da violencia dixital, vicaria e económica.

Con estes acordos, o Grupo Municipal Socialista quere deixar claro que existe unha oposición que traballa, que analiza os problemas reais da veciñanza e que presenta solucións viables para mellorar o día a día no municipio. Nun momento no que o goberno local permanece practicamente paralizado, sen proxecto nin dirección definida, os/as socialistas están asumindo a responsabilidade de impulsar iniciativas útiles, de marcar prioridades e de abrir camiño alí onde o executivo non está a actuar.

A Guarda precisa políticas útiles, decisións concretas e avances visibles, non a inacción e a falta de dirección que mostra o actual goberno.

Os cinco Grupos Municipais Socialistas do Baixo Miño impulsan unha moción conxunta para reclamar melloras urxentes no transporte público da comarca

 Os grupos municipais socialistas da Guarda, O Rosal, Oia, Tomiño e Tui, de maneira coordinada e tras un traballo conxunto, presentarán nos cinco concellos unha moción para esixir á Xunta de Galicia unha mellora profunda do transporte público na comarca do Baixo Miño.

A iniciativa, articulada a través da Coordinación Comarcal do PSdeG-PSOE, responde ás numerosas queixas veciñais e aos resultados dunha enquisa cidadá realizada entre persoas usuarias de todos os municipios da comarca. O estudo revela carencias graves na mobilidade: conexións deficientes con Vigo, o CUVI e os hospitais Álvaro Cunqueiro e Meixoeiro; frecuencias insuficientes; autobuses saturados en horas punta; e dificultades de acceso a servizos esenciais, especialmente nas parroquias con menor densidade poboacional.

Entre os datos máis destacados, a maioría das persoas participantes valoran con entre 1 e 3 puntos (sobre 5) as conexións cos hospitais e co campus universitario, e unha parte significativa asegura ter quedado sen poder subir ao autobús nalgunha ocasión por falta de prazas.

A moción que se presentará nos cinco concellos para ser debatida nos próximos plenos ordinarios, insta á Xunta a incorporar estas necesidades reais na planificación e na nova licitación das concesións de transporte, recentemente alterada tras rescisións de servizo no sur da provincia.

As principais medidas que se propoñen son:

• Reforzo das frecuencias en días laborais e fins de semana.
• Liñas directas e cadenciadas cos hospitais e co CUVI.
• Implantación de servizos a demanda nas parroquias e franxas de menor mobilidade.
• Avances en accesibilidade e información en tempo real.
• Mecanismos de control e penalización por incumprimentos das empresas concesionarias.

Ademais, a proposta inclúe a creación dunha Mesa Técnica Comarcal do Baixo Miño, con presenza da Xunta, dos concellos e das empresas de transporte, para avaliar a situación, priorizar melloras inmediatas e establecer indicadores públicos de calidade do servizo.

A Coordinación Comarcal subliña que esta acción conxunta “é un exemplo do compromiso dos cinco grupos municipais socialistas coa defensa dunha mobilidade digna e accesible, que garanta o acceso da veciñanza á sanidade, á educación, ao emprego e ao conxunto dos servizos públicos”.

O PSOE da Guarda reclama a reposición das papeleiras retiradas e a instalación de modelos con separación de residuos

O Grupo Municipal Socialista da Guarda vén de presentar unha moción para que o Concello acometa un plan de reposición e instalación de novas papeleiras con sistema de separación de residuos. A iniciativa chega despois das numerosas queixas veciñais pola retirada progresiva de papeleiras en distintos puntos da vila, o que está a provocar máis sucidade nas rúas e dificultade para a correcta xestión dos pequenos residuos.

A voceira socialista, Fátima Rodríguez, explicou que “non se lle pode pedir á cidadanía que cumpra coa ordenanza municipal se o propio Concello non garante os medios mínimos. Sen papeleiras suficientes é imposible manter as rúas en bo estado e cumprir a normativa, que ademais impide depositar residuos menores directamente nos contedores”.

Modelo de papeleira con separación

A moción lembra que a actual ordenanza de limpeza establece a obrigatoriedade de utilizar papeleiras para restos pequenos —papeis, envoltorios ou botellas baleiras—, polo que a súa ausencia en rúas, parques e zonas de tránsito está a xerar confusión e unha peor imaxe da localidade.

Por este motivo, o PSOE propón catro medidas clave:

• Reposición das papeleiras retiradas nos últimos anos, priorizando os puntos onde a súa falta provoca vertidos ou sucidade.

• Instalación progresiva de papeleiras con sistema separativo (orgánico, envases, papel/cartón e resto) en rúas comerciais, prazas, zonas escolares, parques e áreas turísticas.

• Mantemento e baleirado diferenciados, garantindo unha xestión correcta de cada fracción de residuo.

• Posta en marcha dunha campaña informativa, para fomentar o uso responsable das novas papeleiras e promover hábitos de reciclaxe no espazo público.

Rodríguez destacou que “é hora de avanzar cara a un modelo de limpeza e reciclaxe adaptado ao século XXI. Outros concellos de Galicia xa dispoñen de papeleiras separativas, e a Guarda non pode quedar atrás”.

O Grupo Municipal Socialista agarda que a proposta sexa apoiada polo goberno local e que se inicie canto antes un plan que responda a unha demanda cidadá evidente e que melloraría de forma inmediata a limpeza e a imaxe da vila.

Os socialistas da Guarda piden unha xestión máis áxil das subvencións municipais

O Grupo Municipal Socialista da Guarda vén de presentar unha moción para ser debatida en Pleno para instar ao goberno local a publicar, dentro do primeiro semestre de cada exercicio económico, a convocatoria das subvencións municipais por concorrencia competitiva reguladas pola ordenanza aprobada en 2021.

Estas axudas son fundamentais para o tecido asociativo, cultural, deportivo e social da Guarda, xa que permiten que moitas entidades e deportistas poidan desenvolver proxectos e actividades ao longo do ano.

A voceira socialista, Fátima Rodríguez Marcos, explicou que “publicar as subvencións a tempo é unha cuestión de boa xestión e de respecto polas asociacións, que precisan planificación e seguridade para organizar o seu traballo”.

Lembrou tamén que en 2022, baixo o mandato socialista, a convocatoria saíra en xuño, pero nos dous últimos anos —xa con Carrero á fronte do executivo— publicouse en setembro, e este ano, a finais de outubro, aínda non foi convocada.

“O atraso reiterado deixa sen marxe ás entidades para executar as súas actividades e recibir as axudas en prazo”, subliñou Rodríguez, quen pediu ao goberno local “seriedade, previsión e compromiso coas asociacións e deportistas guardeses/as”.

O PSOE de A Guarda celebra que, despois de anos de reclamacións, a Xunta avance na senda arredor do Trega

 O proxecto da senda peonil e ciclista do Monte Trega dá un novo paso adiante coa apertura do proceso de información pública por parte do ente autonómico aprobado no Consello da Xunta.

O grupo municipal socialista da Guarda celebra que o Consello da Xunta aprobara onte a apertura do proceso de información pública do proxecto da senda peonil e ciclista que circunvalará o Monte de Santa Trega, ao longo da estrada autonómica PO-352, conectando o núcleo urbano da Guarda con Camposancos.

Iso si, a súa portavoz, Fátima Rodríguez, destaca que este anuncio chega “con anos de retraso e cun evidente oportunismo político”, xa que “a Xunta pretende agora botarlle un cable a un goberno popular local que, en máis de dous anos, non foi quen de impulsar nin un só proxecto relevante para A Guarda”.

Pola súa banda, a secretaria xeral do PSOE da Guarda, Bárbara Domínguez, lembra que “este proxecto non nace da iniciativa do actual goberno local, senón dunha longa traxectoria de xestións impulsadas polos anteriores executivos socialistas en base ás demandas da cidadanía. Xa en 2020 o Concello presentara na Xunta un anteproxecto da senda para a súa inclusión nos plans de infraestruturas, sen obter resposta naquel momento”

O grupo socialista anuncia, ademais, que revisará con lupa o proxecto co fin de vixiar que esta obra se faga con total transparencia, respecto ambiental e co consenso da veciñanza afectada.