O papel da finca de Fínola no futuro da Guarda.

 Por que se mercou a finca de Fínola en 2018?

No concello da Guarda temos un importante déficit de chan público e esta falta de espazo faise máis evidente no casco urbano. Faltan zonas para estacionamentos, faltan espazos verdes e sobre todo falta chan para dotacións municipais. O chan para servizos municipais, chamado “dotacional” é o que permitiría construír edificacións ou instalacións adicadas por exemplo a servizos sanitarios, asistenciais, docentes, culturais, deportivos e outros.

Dende fai moitos anos a finca de Fínola víñase utilizando por parte das comisións de festas e do concello para diversos usos gracias a boa vontade dos propietarios. No ano 2018 danse unha serie de circunstancias que fixeron que o concello se planteara adquirir esta propiedade:

1. O concello tiña unhas contas saneadas e depuradas que permitían facer fronte ao investimento.

2. A finca ten unha situación estratéxica dende o punto de vista do interese público, está entre a alameda e a finca do Centro Cultural, polo que resulta interesante para conseguir un gran espazo de chan público no casco urbano, que podería destinarse a dúas grandes necesidades da Guarda: un auditorio e un gran parque.

3. Dende o punto de vista urbanístico existe a posibilidade de convertir a parcela en dotacional sacándoa fora do ámbito do PERI 5. Desta forma trátase de evitar a construción privada na finca e posibilitar que ademais de zonas verdes ou aparcamentos se poida construir o equipamento que o concello necesite, por exemplo, como comentabamos antes, un auditorio.

4. O propietario estaba interesado en vender.

5. O valor das propiedades inmobiliarias estaba en niveis moi baixos.

6. O PERI 5 está grafiado no PXOM do concello da Guarda dende a súa aprobación en 1993. Nin no ano 2018 nin na actualidade hai indicios de que o PERI se vaia a desenvolver e o concello non ten a capacidade técnica nin económica para facelo. A todo isto hai que engadir que a ficha do PERI non contemplaba nin un só metro cadrado de chan dotacional, é dicir, non se podería  construír nin o auditorio nin calquera outro equipamento público.

O valor de compra da finca foi moi ventaxoso para o concello. O prezo foi determinado por un técnico municipal, nun informe que está a disposición de quen queira velo,  en 310.928,54 €. O prezo final pagado polo concello foi de 280.000 €. Se algún grupo político insinúa que a operación non foi limpa quizá habería que aplicarlle o refraneiro. A venda foi acorde a lei e aprobada en pleno.

Que facemos agora que a finca de Fínola é municipal?

Agora que o concello é propietario da finca de Fínola cunha superficie de 3.102 m2 ,cales son as opcións para esa propiedade? e desas opcións cal é a mellor para os intereses da Guarda?

O proxecto do equipo de goberno encabezado por Antonio Lomba cando adquiriu a finca era moi concreto, así se plasmaba na memoria de alcaldía que xustificaba a adquisición: a finalidade da compra de Fínola era a de convertir esta finca en chan dotacional.

A modificación puntual para convertir Fínola en dotacional foi dende o principio unha declaración de intencións. Pero imos a analizar se hai algunha outra proposta razoable, para ver se de verdade hai despilfarro ou polo contrario o que hai é ignorancia por parte de quen critica a operación.

A Modificación Puntual nº 7 para a finca de Fínola e o PERI 5 aprobouse inicialmente no último pleno. Os principais motivos para levar adiante esta MP son os seguintes:

1. Por interese público, conséguese espazo para dotacións no centro urbano da Guarda, que non se conseguirían  co desenvolvemento do PERI 5.

2. Optimízase o uso do patrimonio municipal adecuando a parcela a súa realidade física de chan urbano consolidado.

3. Increméntase os equipamentos públicos municipais, donde antes non había nada.

4. Dotase ao ámbito do PERI 5 de seguridade xurídica ao actualizalo a normativa urbanística actual

A outra alternativa que se plantea é non modificar o planeamento deixando a parcela dentro do PERI. Nese caso teríamos unha parcela coa condición de solar que non se pode usar para nada o que a convirte nun activo antieconónico. Iso si que sería un despilfarro.

Non cabe dúbida que modificar o planeamento para convertir a finca de Fínola en dotacional redelimitando o PERI5, tal como se aprobou inicialmente no pasado pleno, permitirá optimizar o patrimonio municipal en favor da veciñanza. Nesta operación, ademais de converter en dotacionais os 3102 m2 da finca de Fínola, aparece unha cesión municipal na nova ficha, pola adaptación á normativa, do 10%, que equivale a 1.168,80 m2. Isto quere dicir que se consiguen en total 4.270,80 m2 de chan dotacional gracias a MP7 onde antes non había nin un só metro.

Resulta indiscutible que o aumento dos metros cadrados de equipamentos no entorno urbano repercuten na mellora da calidade de vida e a cohesión social. 

Os grandes beneficiarios da compra de Fínola  e da Modificación Puntual 7 son os guardeses e guardesas do presente e do futuro, xa que permitirá, sobre todo aos primeiros, poder desfrutar dun equipamento tan necesario e demandado como será o Auditorio  e da ampliación da Alameda ( incorporando ademais a rúa Rosalía de Castro) nun prazo curto de tempo, algo que non sería posible doutro xeito.

A Guarda is alive

 

Non estou de acordo coa expresión “A Guarda está paralizada”. A da Guarda é unha sociedade dinámica a todos os niveis, social, cultural, deportivo e por suposto económico, como corresponde a unha histórica cabeceira de comarca.

Se falamos de política, deixo unhas pinceladas do traballo que estamos facendo no concello da Guarda co impulso dun equipo de goberno do que me sinto moi orgulloso pola súa valía e capacidade que da a estabilidade e tranquilidade que un concello necesita.

Neste momento estamos xestionando 1.359.954,46 € gracias ao plan concellos da Deputación de Pontevedra, entre outros proxectos para: Urbanización da 1ª fase da rúa Coruña, apertura da rúa Baixo Muro-Ireira, creación do Camiño Escolar do colexio Sinde, iluminación ornamental dos edificios municipais da praza do reló, reforma estética interior da Praza de Abastos, rehabilitación dos patios do Vello Sinde, pavimentación de camiños no rural, etc. 

Acabamos de empezar as obras e reforma e ampliación do pavillón da Sangriña cun investimento de 1.870.667,53 €, tamén se está executando a 3ª fase da urbanización da rúa da Cal co empedrado do entorno da fonte, a humanización do entorno da Igrexa, a 3ª planta da Casa dos Alonsos (novo concello) e en breve empezará a humanización da rúa Manuel Rodríguez Sinde.

Fai uns días cumpría un compromiso recentemente adquirido e dáballe a aprobación inicial ao “Plan Especial de Infraestruturas e Dotacións A Sangriña” que permitirá, unha vez se aprobe definitivamente, ter terreos para dotacións deportivas, como por exemplo un novo pavillón.

Tamén levamos ao próximo pleno a aprobación inicial da Modificación Puntual número 7 do Plan Xeral de Ordenación Municipal, que permitirá cualificar como dotacional a “finca de Fínola”. Unha vez aprobada esta modificación poderase facer na finca unha infraestrutura municipal, cousa que de momento non se pode. O noso proxecto é construír alí un auditorio, un aparcadoiro subterráneo e unir a alameda coa finca para ter unha gran zona de espallamento

Estamos redactando ou acaban de entregarnos varios proxectos moi interesantes para A Guarda:

• Proxecto de mellora dos accesos e posta en valor do Castelo de Santa Cruz, actuación para a que xa contamos cunha subvención de 240.000€

• Proxecto de de mellora da seguridade e accesibilidade no entorno do CEIP As Solanas.

• Proxecto de Humanización da rúa Joaquín Alonso (Praza Nova)

• Proxecto da senda de unión entre A Guarda e o Rosal

Para os fondos de recuperación Europeos Next Generation acabamos de presentar o proxecto de reforma e ampliación do pavillón da Sangriña, para recuperar parte do investido polo concello. Acabamos de presentar tamén o Plan de Turismo Sostible en Destino para A Guarda e estamos tramitando a presentación do proxecto de mellora enerxética e reforma da Piscina Municipal. 

A través de Costas do Estado tamén estamos xestionando unha subvención para os fondos Next Generation para a rexeneración medioambiental do estacionamento da Armona.

Este  mesmo ano executaremos as obras para unha nova biblioteca na sala de exposicións do Centro Cultural cun orzamento de 85.641,35 € financiada con fondos propios.

Estamos traballando no plan REHABITA, un plan de rehabilitación de vivendas que ten como obxectivo a colaboración público privada para aproveitar as liñas subvencións que permitan modernizar o parque de vivendas da localidade, que dinamicen a oferta de alugueiro en beneficio dos propietarios e dos demandantes e que actúen como motor económico no sector da construción e rehabilitación de vivendas.

Estamos traballando no fomento do uso das enerxías renovables, tanto para o ámbito privado como municipal. O noso obxectivo é constituír comunidades enerxéticas ou instalacións de autoconsumo para ceder a enerxía sobrante a particulares e abaratar a factura da luz.

Temos un obradoiro de emprego con un módulo de Axuda no Fogar e outro de Turismo que se atopan na actualidade na fase de prácticas.

En relación ao edificio do obradoiro de emprego, cando remate a formación que se está a impartir, acometeremos unha reforma para instalar un ascensor e darlle accesibilidade e cambiaremos a carpintería para mellorar a eficiencia enerxética do edificio.

Estamos actualizando o PACES (Plan de Acción Polo Clima e a Enerxía Sostibles). Toca facelo despois de dous anos da súa posta en marcha no 2020.

Estamos redactando o Plan de Implementación dos Obxectivos de Desenvolvemento Sostible (ODS) da Guarda.

Estamos en plena negociación do convenio colectivo e táboa salarial cos traballadores municipais e sindicatos.

Levamos meses traballando na promoción do Camiño Portugués da Costa para que se produza a recuperación que estamos vendo, con centos de peregrinos cada día polas rúas a pesar de que Portos de Galicia deixou abandonado o peirao do ferri impedindo o funcionamento do barco. E tendo en conta que a propia Xunta apoia un itinerarios non oficiais co mesmo nome co noso.

Xunto coa cámara de Caminha e a Deputación de Pontevedra estamos facendo un estudo de mobilidade entre A Guarda e Caminha para determinar como pode ser a comunicación do futuro entre as dúas vilas.

Estamos traballando xunto coas nosas atadeiras da Asociación de Redeiras do Baixo Miño Atalaia para propoñelas á candidatura da Medalla Emilia Pardo Bazán, pola súa labor en prol do recoñecemento dos dereitos ao seu sector e ás mulleres do mar en xeral.

Para este ano xa temos dúas bandeiras azuis para as praias do Muíño e da Area Grande e un recoñecemento do sendeiro azul para a senda que une as dúas praias.

Ademais de todo o mencionado estamos organizando actividades turísticas, culturais, deportivas, medioambientais, concertos, festas, etc. Non hai máis que coller a axenda de actividades de calquera semana para comprobalo. Xa temos completa a programación de actividades para os meses de xullo e agosto. A Guarda non está paralizada porque a actividade de xestión política do equipo de goberno e dos traballadores municipais é intensa e sobre todo porque a actividade das persoas, asociacións, organización e clubs desta vila é aínda máis intensa.

O que está paralizado na Guarda a pesar de que unha e outra vez berramos ben alto que temos os mesmos dereitos que o resto dos galegos, os doutras vilas e os das cidades. Son cousas como estas:

• A Xunta ten paralizada a Autovía a Tui unha infraestrutura fundamental para o noso futuro.
• A Xunta ten paralizado a reparación do peirao do ferri. Agora non podemos ter ferri
• A Xunta non manda os médicos que necesitamos para o Centro de Saúde nin para Urxencias. Calquera día temos unha desgracia.
• A Xunta ten paralizada a senda de circunvalación ao Monte Trega. Para cando pensan facela?

En resumo, A Guarda non está paralizada a pesar de que o PP e a Xunta de Galicia esfórzanse por conseguilo

As demandas do concello da Guarda, en relación a comunicación con Camiña, son escoitadas pola Xunta.

 

• As continuas reclamacións do concello da Guarda, así como do resto dos concellos do camiño Portugués da Costa, conseguen que a Xunta poña en marcha as solucións demandadas.

• O PP Guardés, pretende, unha vez máis, apropiarse dun traballo que non fixo. Roberto Carrero intenta sacar rédito político das actuacións da Xunta sin ter amosado ningunha preocupación por esta cuestión ata o día de saír na foto.

Foron moitas as xestións e reclamacións que a partir do verán de 2021 se fixeron dende o concello da Guarda para conseguir que a Xunta de Galicia asumira as súas obrigas en relación a comunicación con Camiña e ao Camiño Portugués da Costa.

Por unha banda urxía a reparación do peirao do ferri para que o barco volvera a transportar pasaxeiros e vehículos e servira de nexo entre Caminha e A Guarda no itinerario do camiño da Costa. Esta reparación foise atrasando e mantén o barco parado en pleno ano Xacobeo.

Por outra banda tamén se urxía a Xunta para que mentres non estivera reparado o embarcadoiro se implantara con urxencia un sistema de transporte de pasaxeiros entre as dúas beiras do Miño. 

Os concellos do Camiño Portugués da Costa  tamén mostraron a súa queixa ao Xacobeo pola súa inacción diante do recoñecemento oficial por parte do goberno Portugués dun itinerario co mesmo nome que prexudicaba o Camiño Portugués da Costa oficial recoñecido na lei de Patrimonio Cultural de Galicia de 2016.

Estas queixas foron as que o alcalde da Guarda, Antonio Lomba, co apoio expreso da restauración e do sector do aloxamento turístico da localidade, ademais dos alcaldes e alcaldesas do Camiño da Costa, levou aos distintos foros e responsables institucionais: Consellería de Turismo, Axencia Galega de Turismo, Xacobeo, Portos de Galicia, Mesa do Camiño da Deputación de Pontevedra e Parlamento de Galicia.

O resultado de todo o traballo realizado culminou o pasado venres 25 de marzo co anuncio da Xunta de Galicia que viña a atender as demandas feitas dende o concello da Guarda. A Xunta anunciou un investimento de 157.000 € por parte de Turismo de Galicia  nun proxecto de transporte turístico sostible que será prestado por AGAN (Asociación Galega de Actividades Naúticas). A súa vez o Delegado Territorial, Luis Lopez, anunciou tamén o comezo dos estudos técnicos para a reparación do peirao do ferri da Pasaxe por parte de portos de Galicia.

O novo servizo de transporte entre a Guarda e Caminha arranca, nunha primeira fase, a partir do 8 de abril con dúas embarcacións, unha eléctrica e outra a gasolina. A implantación definitiva do proxecto producirase no mes de xullo cunha embarcación eléctrica para doce pasaxeiros. Este transporte funcionará en paralelo co ferri coa idea de cubrir os horarios nos que o transbordador non pode navegar.

Este servizo de transporte complementarase cun proxecto de ecoturismo para a comarca do Baixo Miño que se está elaborando dende Turismo de Galicia e que contará coa participación de establecementos e axentes turísticos da comarca.

Os socialistas da Guarda presentan unha moción esixindo que a Xunta repare o peirao do ferri da Pasaxe.

Coñecedores da importancia económica e turística do ferri entre A Guarda e Caminha, neste ano xacobeo 2022, os socialistas esixen á Xunta que sexa responsable das súas competencias e repare a infraestrutura portuaria de atraque do transbordador.

Representantes do Grupo Municipal Socialista da Guarda  presentaron no rexistro municipal unha moción para que sexa debatida no próximo pleno ordinario do mes de marzo.

No apartado expositivo os socialistas argumentan a importancia que o ferri ten para A Guarda, tanto para manter a comunicación entre as dúas ribeiras do Miño, transportando pasaxeiros e vehículos, como para dar continuidade ao camiño Portugués da Costa que “entra en Galicia pola Guarda, tras cruzar o Miño na súa desembocadura.”

O peirao do ferri sofre unha avaría no verán de 2021 por falta de mantemento, e dende entón, portos de Galicia propietario da infraestrutura, impide o acceso dos vehículos ao embarcadoiro. Este é o motivo polo que o ferri deixa de navegar sin que Portos, ata o momento, atenda as demandas que se teñen feito dende o concello da Guarda.

Os socialistas declaran: “o embarcadoiro da Pasaxe seguirá tendo utilidade se o actual ferri se substitúe por outro tipo de embarcación ou incluso se houbera máis de unha facendo o servizo. Non hai nada que xustifique que se deixe deteriorar esta infraestrutura portuaria.”

Na moción tamén se fai mención ás demandas do sector privado vinculado ao Camiño Portugués da Costa, non solo do concello da Guarda senón tamén dos concellos de O Rosal, Oia, Baiona e Nigrán. Dende o seu recoñecemento oficial en 2016, moitas persoas estiveron traballando para ofrecer servizos no camiño en base ao crecemento que este viña experimentando e as expectativas que se crearon. Non é de recibo que agora a Xunta de Galicia deixe sen continuidade o camiño por non resolver o paso do esteiro do Miño. Debe manter as condicións que xeraron aquelas oportunidades e expectativas.

No apartado resolutivo os socialistas esixen a Xunta de Galicia que repare, a maior brevidade, o peirao do ferri da Pasaxe para posibilitar o embarque de vehículos. Tamén instan a Xunta a que habilite un transporte de pasaxeiros alternativo entre A Guarda e Caminha mentres non estea reparado o embarcadoiro.

Enlace á moción

Leticia Gallego esíxelle á Xunta que asuma as súas competencias e repare o pantalán de A Pasaxe que bloquea o ferri entre A Guarda e Caminha

 A portavoz de Turismo do Grupo Socialista, Leticia Gallego, urxiu hoxe a Portos de Galicia a reparar o pantalán do porto de A Pasaxe, en A Guarda, que ten provocado a interrupción da liña de ferri entre aquela localidade e Caminha. Gallego presentou unha proposta en Comisión parlamentaria para esixirlle á Xunta que exerza as súas competencias propias e tome cartas no asunto, pero que foi rexeitada polo PP que, dixo, “demostran unha vez máis que son o partido do NON”.

A responsable socialista resumiu que “a única solución é arranxar o antes posible o pantalán por parte de Portos de Galicia”, que ten competencia sobre a infraestrutura. Explicou que a avaría do peirao provocou que dende agosto non se puidera transitar no ferri en automóbil, limitando o servizo a pasaxeiros a pé e en bicicleta, pero foi suspendido na súa totalidade no mes de outubro pasado. 

Esta situación prexudica gravemente entre outros aos concellos de Baiona, A Guarda, O Rosal e Oia, polo que os seus alcaldes están a reivindicar unha solución urxente a un problema que está a afectar sinaladamente ao turismo procedente de Portugal. A interrupción desta conexión corta a vía do Camiño Portugués da Costa, que se está a converter “nun auténtico guirigai”, cos peregrinos confundidos pola ruta a seguir.

Salienta que a actuación da directora de Turismo, Nava Castro, “non ten precisamente axudado en nada” ao apoiar o pasado 16 de febreiro a certificación do que en Portugal veñen de denominar Camiño Portugués de Santiago – Camiño da Costa, e que non ten nada que ver coa ruta que transcorre por A Guarda e que o único que fai é “desinformar” aos peregrinos.

Gallego urxe a reparar este paso do Camiño de Santiago, xa que “de seguir así moitos negocios de hostalería e comercio terán que pechar, xa que a súa economía non aguanta sen peregrinos que paren nos locais e sen veciños e veciñas portugueses que vaian mercar entre A Guarda e Caminha”.

A parlamentaria socialista reclamou hoxe “solucións a curto prazo” para resolver o problema do transporte de pasaxeiros, e trasladou ademais a demanda dos alcaldes dos concellos afectados, que reclaman unha xuntanza co conselleiro da Presidencia, responsable de Turismo, e que tome medidas en relación ás publicacións que difundan itinerarios non oficiais desta variante do Camiño.

Lamentou o veto do PP a esta proposta, intentando derivar a responsabilidade ao seo do Eixo Atlántico como escusa para rexeitar esta proposta socialista, fundamental para os sectores turístico, comercial ou hostaleiro da comarca.

Enlace a iniciativa parlamentaria

Leticia Gallego urxe á Xunta a arranxar o problema de transporte entre A Guarda e Caminha para dar continuidade ao Camiño Portugués da Costa

 Censura o “importante quebranto e confusión” que supón a inactividade da liña do ferri que une os dous concellos e denuncia a proliferación de “publicacións contraditorias” que “formulan alternativas que nada teñen que ver coa ruta oficial”

A deputada socialista Leticia Gallego visitou hoxe A Guarda, xunto ao seu a alcalde, Antonio Lomba, para presentar unha batería de iniciativas para urxir á Xunta a resolver o problema de transporte entre o concello guardés e o municipio portugués de Caminha co principal obxectivo de dar continuidade ao Camiño Portugués da Costa no seu paso polo esteiro do Miño.

“O transbordador que une as dúas beiras do río atópase inactivo e isto impide a peregrinas e peregrinos cruzar o esteiro en transporte regular”, alertou a socialista, quen incidiu no “importante quebranto e confusión” que isto supón, ao que se suma a “desinformación” e as “publicacións contraditorias” sobre a ruta Xacobea.

Ao fío disto, Gallego lamentou que, “malia que a web oficial do Camiño de Santiago sinala que o Camiño Portugués da Costa entra en Galicia pola vila mariñeira de A Guarda, tras cruzar o río Miño na súa desembocadura, varias organizacións e entidades portuguesas formulan alternativas que nada teñen que ver coa ruta oficial, recoñecida e promovida pola Xunta”.

Así, destacou, “algunhas publicacións indícanlles ás peregrinas e peregrinos que percorran case 30 quilómetros máis para cruzar o río a través da ponte que une Vilanova de Cerveira e Tomiño para logo chegar ata A Guarda, e noutras mesmo propoñen continuar o itinerario ata Valença do Minho para enlazar dende alí co Camiño Portugués, o cal é moito máis grave xa que anula o percorrido pola costa atlántica galega que transcorre polos municipios de A Guarda, O Rosal, Oia, Baiona e Nigrán”.

“Cómpre buscar unha solución a curto prazo para arranxar esta problemática no transporte de pasaxeiros e pasaxeiras entre ambos municipios, polo que pedimos á Xunta que se reúna cos alcaldes afectados para que poidan trasladarlles de primeira man a problemática que están a vivir”, subliñou a responsable socialista.

Por último, Gallego pediu ao goberno galego que “se manifeste e tome medidas” en relación ás publicacións que difunden itinerarios “non oficiais” sobre o Camiño Portugués da Costa, xa que isto “implica un enorme prexuízo” para a ruta Xacobea e, nomeadamente, para os municipios do Baixo Miño polos que transcorre.

Enlace a iniciativa parlamentaria

E falso que os populares da Guarda conseguiran a substitución da carpintería exterior do CEIP A Sangriña

Tamén é falso que conseguiran, como se anunciou fai uns días, o Centro Integrado de Saúde (CIS) para A Guarda.

A Guarda 13 de novembro de 2021. Dende o equipo de goberno no se pretende crear polémica nin descualificar a ninguén, como ven facendo o portavoz local do partido popular. Creemos que non é necesario embarrar o escenario político local como está facendo Roberto Carrero coa axuda da Xunta de Galicia no que parece unha precampaña electoral para as municipais, a pesar de que estamos a ano e medio das próximas eleccións. Defendemos unha política constructiva, en positivo, na que as enerxías se gasten en facer cousas para os veciños e veciñas.

Neste caso simplemente queremos informar á cidadanía da Guarda da realidade sobre as dúas noticias que referimos no encabezamento desta nota e que puidemos leer nos últimos días nos medios de comunicación. En ambas o PP da Guarda atribúese logros que non lles corresponden.

Respecto da carpintería exterior do CEIP A Sangriña, aclarar, en primeiro lugar, que é unha obriga da consellería de Educación facer as obras estruturais necesarias para manter os centros de ensino en perfecto estado. Esa carpintería xa se tiña que haber cambiado fai anos cando llo demandaron dende a dirección do centro. Dende entón solicitouse a delegación provincial de educación o cambio da carpintería moitas veces. Ademais das distintas direccións do centro, pedíronllo as ANPAS, o alcalde da Guarda, responsables de educación municipais e polo visto tamén o partido popular fixo xestións. Haberá pois que atribuír a tenacidade e preseveranza de todos e todas que por fin se cambien as ventás do centro. Por certo este anuncio do cambio de ventás non é novidade, xa se coñecía dende mediados de 2020. Se temos algo que criticar neste caso é a falta de respecto institucional do delegado na maneira de anuncialo. Sr. Cesar Pérez, dicímosllo con todo o cariño, está moi feo e resulta pouco elegante anuncialo (ou permitir que se anuncie) como se fora un logro do PP local. 

Algo parecido sucedeu fai uns días co anuncio do Centro integrado de Saúde da Guarda. Neste caso xa manifestamos a nosa sorpresa pola significación que ten este anuncio en canto a que é un recoñecemento por parte da Xunta de Galicia de que a situación da Atención Primaria na Guarda está mal e ten moito que mellorar. Iso si, o prioritario a día de hoxe segue sendo a dotación de persoal á atención primaria. Non tería ningún sentido unha mellora das infraestruturas sanitarias se non mellora o servizo. 

Neste senso, en vista das noticias que aparecían nos medios, o alcalde declarou: “xa me puxen en contacto co conselleiro de sanidade, en primeiro lugar para expresarlle a miña desconformidade pola maneira de anunciar o CIS, e para dicirlle que deberían ter máis respecto institucional, este tipo de anuncios non se fan aos partidos políticos fanse aos responsables dos gobernos municipais ou ao propio sector, e en segundo lugar para poñer unha reunión de traballo e ofrecer toda a colaboración do concello para empezar a traballar neste proxecto”.

O conselleiro trasladou ao alcalde que este CIS estaba incluído no “Plan de Infraestruturas Sanitarias de Atención Primaria” da Xunta de Galicia, na que se prevé a posta en marcha de outros moitos centros de saúde por toda Galicia. Por certo, un plan feito con criterios técnicos e asistenciais, segundo palabras da propia Xunta. Nada que ver con que o conseguiron os populares da Guarda. Neste caso hai demandas de mellora do Centro de Saúde do persoal sanitario, de partidos políticos que levaron a situación do centro de saúde ao parlamento, do equipo de goberno, dalgún particular que recolleu máis de 3.000 sinaturas no seu momento e ata das plataformas pola mellora da atención primaria.

Creemos que a cidadanía da Guarda debe estar informada, isto é parte da obriga dun equipo de goberno e así o seguiremos facendo as veces que faga falta.