A Conta Xeral non minte: Os/as socialistas non deixaron o Concello da Guarda “sen un duro”.

O balance do 2023 foi, segundo a Conta Xeral, positivo en todos os aspectos. Gustaríanos que Carrero e o seu equipo deixaran de intentar esconder a súa incapacidade para xestionar o Concello detrás de bulos.

O ano pasado, Carrero e o Tenente Alcalde, aseguraban a distintos medios de comunicación que os/as socialistas nos “pulíramos” o diñeiro do Concello e que as arcas municipais estaban “sen un duro”. Mentirosos, ou ignorantes??.

Grupo Municipal Socialista 2024

Fai unhas semanas publicouse a Conta Xeral, que é ese documento que elabora unha vez ao ano o Departamento Económico do Concello, e no que queda reflexada a situación económica do Concello.

Documento que demostra que todo o que estes señores dicían non era máis que un bulo. E para desmontalo simplemente imos a dar tres datos significativos que extraemos da Conta Xeral do 2023 do Concello da Guarda:

1. O saldo en bancos do Concello a 31/12/23 era de 3.270.640,30€.
2. O resultado entre ingresos e gastos foi positivo, e dicir houbo máis ingresos que gastos, quedando un resultado orzamentario positivo de 962.012,08€.
3. O Concello conta cun remanente positivo de 1.711.762,20€, que pode ser utilizado para financiar obras e inversións.

Os/as políticos/as poden dicir o que lles pete, pero os números son os que son!

Carrero renuncia a unha subvención coa que poderían asumirse as obras de reforma da praza de abastos.

• Os/as socialistas conseguiran en 2023 unha subvención de Fondos Europeos de 318.458,40€ para levar a cabo diversas accións de dinamización do comercio, entre as que se atopaba a obra de reforma estética da praza de abastos.
• Un mes despois de que chegara a resolución positiva da mesma, Roberto Carrero, renunciou a esta subvención.

Desde a Concellería de Desenvolvemento Local, dirixida naquel momento pola actual portavoz municipal socialista Fátima Rodríguez, encargárase a un estudo de arquitectura un proxecto de reforma da praza de abastos, e a principios de 2023 reserváranse dos cartos que lle daba á Deputación ao Concello unha cantidade de 172.365€ para acometer dita obra.

Reforma do andar superior da praza de Abastos

Pouco despois, en marzo de 2023, xurdiu a oportunidade de presentarnos a unha subvención de Fondos Europeos, e ademáis de meter o custo desa reforma solicitáronse varias actuacións máis das que puideran beneficiarse tamén outros negocios da vila e non só os que tiñan negocio na praza.

Se nola concedían podería levarse a cabo a obra de reforma, ademáis do resto das accións, e os cento setenta mil e pico euros que estaban reservados, poderiamos utilizalos para outras obras, xa que Deputación permitía cambiar o destino deses cartos.

A noticia de que a subvención de Fondos Europeos fora concedida por un importe de 318.458,40€ chegou en setembro de 2023, xa estando Carrero no goberno, polo que xa lle quedaba a el a responsabilidade de inverter o diñeiro da subvención nas obras e actuacións que se acordaran. A máis destacable, como dicíamos, a obra de reforma da praza.

Incriblemente esta subvención foi rexeitada polo actual Alcalde un mes despois de recibir dita notificación, demostrando unha vez máis que o actual equipo de goberno non posúe nin a capacidade nin o interese necesarios para gobernar este Concello.

Está claro que xestionar Fondos Europeos non é doado, ata nos atreveríamos a dicir que pode resultar un auténtico desafío, pero o que non pode facer un goberno que se prece é tirar a toalla ante aquelas xestións que podan resultar máis difíciles. Cando se está no goberno hai que romperse moito a cabeza para evitar que o Concello perda nin un euro de diñeiro que poda vir doutras administracións.

Sr. Carrero é unha vergonza que desdeñen vostedes un diñeiro que é da Guarda, e que en lugar de aproveitar subvencións xa concedidas, renuncien a elas e agora vaian a ter que asumir a recén iniciada obra da praza de abastos co diñeiro da Deputación que inicialmente reserváramos nós, cantidade que podería terse destinado a outras obras, tamén necesarias.

Pedímoslle ao noso alcalde, xa alcumado por moitas persoas como “Roberto, o ausente” porque nunca está no Concello, que se tome en serio as súas funcións e lle dedique tempo e gañas ao seu pobo, e senón que se bote a un lado e pase o testigo a alguén que de verdade queira traballar pola Guarda.

Os Socialistas da Guarda sacan adiante unha moción para realizar o ancheamento do 1º Transversal Salgueiró en Camposancos.

• O Partido Socialista da Guarda, que leva moitos anos traballando no ancheamento de rúas e camiños, especialmente nas parroquias de Salcidos e Camposancos, desexa seguir contribuíndo a esta causa desde a oposición.
• Grazas á colaboración dunha familia campusina que cederá unha parte do seu terreo, o Concello da Guarda terá a posibilidade de anchear o 1º Transversal Salgueiró, unha rúa que nalgún tramo non chega aos 1,80 m de ancho.

O Partido Socialista da Guarda defendeu onte no pleno ordinario de maio unha moción que saliu aprobada e a través da cal o actual equipo de goberno se compromete a iniciar as negociacións cos/as propietarios/as e, unha vez feita a cesión, levar a cabo as obras para o ancheamento desta vía.

1º Trav. Salgueiró de Camposancos

Aínda en oposición, queremos seguir contribuíndo a que todos os veciños e veciñas da Guarda teñan as mesmas oportunidades, e para iso é necesario que, independentemente do punto da vila no que residan, podan ser asistidos/as en casos de emerxencia, ademais de reducir as posibilidades de danos nos seus vehículos.

A portavoz municipal, Fátima Rodríguez, e a vocal socialista na Entidade Local Menor, Luz Alonso, agradecen enormemente a Sonia e Frank a súa colaboración para facer posible o ancheamento deste camiño en Camposancos.

Os Socialistas da Guarda defenderán no pleno do mércores 29 de maio unha moción para conseguir anchear un camiño de Camposancos.

• O Partido Socialista da Guarda, que levaba moitos anos traballando no ancheamento de rúas e camiños, especialmente nas parroquias de Salcidos e Camposancos, desexa seguir contribuíndo a esta causa desde a oposición.
• Grazas á colaboración dunha familia camposina que cederá unha parte do seu terreo, o Concello da Guarda terá a posibilidade de anchear o 1º Transversal Salgueiró, unha rúa que nalgún tramo non chega aos 1,80 m de ancho.

O Partido Socialista da Guarda leva traballando moitos anos para facer realidade o ancheamento de multitude de camiños da Guarda, especialmente nas parroquias de Salcidos e Camposancos, lugares que ata fai pouco tempo concentraban a maior parte de vías da vila nas que os vehículos tiñan grandes dificultades para circular, especialmente os vehículos de emerxencia.

1º Transv. Salgueiró

Concretamente en Camposancos leváronse a cabo nestes últimos anos ancheamentos no Camiño do Cementerio, Camiño de Salgueiró, Camiño do Ferreiro, Camiño das Laxes, Camiño do Cascallar, etc.

Aínda en oposición, queremos seguir contribuíndo a que todos os veciños e veciñas da Guarda teñan as mesmas oportunidades, e para iso é necesario que, independentemente do punto da vila no que residan, podan ser asistidos/as en casos de emerxencia, ademais de reducir as posibilidades de danos nos seus vehículos.

Por iso seguimos atentos/as a aquelas oportunidades no que respecta á cesión de terreos que a veciñanza poda facer de forma voluntaria, e que teñan coma fin o ancheamento de vías públicas de difícil tránsito ou acceso.

Unha desas vías sería o 1º Transversal Salgueiró (Camposancos), que nun tramo ten un ancho que non chega aos 1,80m.

Na actualidade os propietarios de varias das parcelas que lindan co Transversal na súa parte máis estreita fixéronnos saber que estarían dispostos a ceder ao Concello da Guarda de forma gratuíta parte dos terreos da súa propiedade para realizar o ancheamento do camiño.

Dada esta boa oportunidade presentamos unha moción que esperamos sexa aprobada por unanimidade, e a través da cal o actual equipo de goberno se comprometa a iniciar as negociacións cos/as propietarios/as e, unha vez feita a cesión, levar a cabo as obras para o ancheamento desta vía.

A Xunta de Galicia inicia as obras dun compromiso acadado polo anterior goberno socialista para o Castelo de Santa Cruz.

• O equipo de goberno socialista conseguira na anterior lexislatura a colaboración da Axencia de Turismo (Xunta de Galicia) para mellorar os camiños de acceso ao Castelo de Santa Cruz, e alumear artísticamente e de forma ecoeficiente a muralla.

• Fai uns días deuse inicio a ditas obras, e xa poden observarse máquinas traballando tanto no acceso á Porta da Vila como na parte exterior da muralla.

O anterior goberno, consciente de que o Patrimonio da Guarda era, e sigue sendo, o ben máis prezado da nosa localidade, levou a cabo durante anos unha serie de iniciativas cun obxectivo común: poñer en valor e rendibilizar o seu Patrimonio para dalo a coñecer, para conservalo e tamén para utilizalo como atractivo turístico.

Rehabilitación do acceso pola porta da vila

Un deses elementos no que se puxo especial énfase, e que ademáis está declarado Ben de Interese Cultural, foi o Castelo de Santa Cruz.

Por iso solicitouse á Axencia de Turismo de Galicia a realización de varias actuacións dirixidas a seguir poñendo en valor este ben patrimonial, firmando un convenio entre a mesma e o Concello da Guarda na anterior lexislatura.

Obras de iluminación da muralla

Alegrámonos de que a Xunta de Galicia retome esta obra que quedara pendente de facer, e xa se dera inicio ás obras que representarán cambios moi positivos para o Castelo, xa que unha vez finalizadas a muralla lucirá iluminada e se mellorarán e farán accesibles os accesos tanto pola Porta da Vila (tramo que arranca na rúa Puerto Rico e ascende entre dúas casas indianas), como pola Porta de Socorro (tramo que nace no camiño peonil da Avda. Sto. Domingo de Guzmán). 

Roberto Carrero está molesto porque a oposición airea os seus pouco acertados movementos na xestión dos fondos

•  Roberto Carrero está molesto porque a oposición airea os seus pouco acertados movementos na xestión dos fondos.

• A cantidade de cartos que tiña na súa man para desbloquear a obra da senda arredor do Tegra, foi dirixida a outras actuacións que non son, desde logo, urxentes.

Roberto Carrero amósase moi molesto cos partidos da oposición simplemente por contar a verdade do que fixo o seu goberno, e que non foi, nin máis nin menos, que renunciar ao diñeiro que tiñan xa na man para desbloquear a obra da senda arredor do Trega.

Fala de que somos responsables de que esta obra non estea feita tras dúas lexislaturas…iso si que é unha tomadura de pelo pola súa parte.

Circunvalación ao Trega, estado actual

Aos/ás socialistas só nos faltou poñernos de xeonllos e suplicar á Xunta que asumise a obra, que recordemos, é quen ten que facela, xa que a estrada é propiedade súa. Chegamos incluso a presentar en 2020 un anteproxecto de senda para ver se, facilitándolles o traballo, entraban en razón e por fin escoitaban as peticións da cidadanía guardesa.

Se para Carrero facer iso, ou buscar financiación por outras vías para iniciar a obra, é unha “actitude belicosa”, é que non entendeu nada.

Destinar eses cartos do Plan de Turismo a iniciar o proxecto da senda era, sobre todo, unha declaración de intencións pola nosa parte. Demostramos que a pesar de que a Xunta desoíse durante anos as necesidades da cidadanía guardesa, o equipo de goberno socialista quería buscar a toda costa sacar o proxecto da senda adiante, fora como fose.

A verdade é que, analizando polo miúdo o traballo de Carrero durante o tempo que leva no goberno, vemos bastante difícil que poda conseguir nesta lexislatura que a Xunta financie este proxecto. E se o consegue, máis ben será mérito da ben instaurada “política de amiguismos” do PP ou da matraca que levamos dando nós co tema desde fai anos, e xa non tanto da súa xestión.

Pero ollo, que non se engane o actual alcalde, non crea que todos/as somos da súa mesma condición. A nós xamais nos vai a “doer” que se faga esta obra, aínda que sexa o mesmo Satanás quen se encargue de facela, porque confrontacións políticas aparte, o que nós queremos é o ben da Guarda e o estamos demostrando a través do noso apoio ao seu equipo de goberno en todo o que consideramos bo para este pobo.

Cousa que, por certo, vostedes non fixeron estando en oposición: Votando en contra da reforma do pavillón, da humanización de Concepción Arenal, dunha subvención da Deputación para dinamización do comercio, etc. Eran vostedes unha mala oposición e agora son un mal goberno. 

A senda arredor do Trega, cada vez máis lonxe de ser unha realidade.

•  Ante a inacción da Xunta de Galicia, o anterior goberno socialista reservara unha partida económica do Plan de Turismo (PSTD) para dar inicio á senda arredor do Trega.

• Agora, os Populares, deciden eliminar as actuacións na senda, e destinan ese diñeiro á creación dun aparcamento disuasorio no Museo do Mar e a conectar a senda Litoral coa das Cetáreas.

A través desta nota de prensa, desde o Grupo Municipal Socialista, queremos facer unha serie de aclaracións en relación á situación da senda arredor do Trega.

No Plan de Turismo, a través do que acadamos 1.000.000€ para diversas actuacións en materia de turismo, destinábase unha cantidade de diñeiro para dar inicio á senda arredor do Trega.

recreación da senda arredor do Trega

Dediciuse apostar por esta actuación porque a Xunta de Galicia, ente a quen realmente lle compete levar a cabo esta obra, leva incumplindo ao longo dos últimos anos e de forma reiterada, as súas promesas de construíla.

Xa en 2018 o Director Xeral de Infraestruturas de Xunta, aseguráballe a Antonio Lomba que sacarían unha liña de subvencións para sendas que nunca chegou a publicarse. En 2020 a Conselleira de Infraestruturas (Ethel Vázquez) comprometíase tamén, neste caso, a valorar incluír a nosa senda nun Plan de Sendas do Baixo Miño a través de fondos europeos (FEDER 2021-2027), promesa que volveu a incumprirse.

En vista dos antecedentes, os socialistas decidiron reservar unha partida orzamentaria para a senda dentro do Plan de Turismo, para desta forma, dar inicio ás obras e forzar á Xunta de Galicia a destinar fondos para a mesma, replicando a mesma estratexia que se seguira coa reforma do Pavillón Municipal, para o que ao principio a Xunta non quixo destinar nin un euro, e logo, unha vez o Concello e a Deputación puxeron fondos, viuse obrigada a facelo.

O Partido Popular publicaba unha nota de prensa en novembro de 2023 sacando peito porque Ethel Vázquez tamén lles prometera a eles/as incluir a senda nos próximos fondos FEDER (sónanos esa resposta…), o que polo de pronto nos di que, como mínimo, ata despois de 2027 a Xunta non prevé en ningún caso, abordar esta obra…se é que realmente a inclúe, cousa que, visto o visto, xa dubidamos.

E agora, observamos estupefactos/as como desde o Concello se decide que a cantidade coa que se pretendía dar inicio a esta obra, crucial para A Guarda e Camposancos tanto a nivel turístico como a nivel de seguridade viaria, se vai a destinar a facer unha obra que desde logo non ten a urxencia nin a importancia que pode ter a da senda arredor do Trega.

Preto de cumprirse un ano deste novo goberno, non deixamos de asombrarnos coa falta de consideración cara á cidadanía e o pouco sentido común que aplican ás súas políticas.