Carrero, sen peso en Santiago: só 50.000 euros para A Guarda en 2025

•  O pasado 21 de outubro, o delegado territorial Agustín Reguera, durante unha visita institucional á nosa localidade, anunciaba que a Xunta de Galicia asignará 16,5 millóns de euros á comarca do Baixo Miño dentro dos orzamentos de 2025.
• Porén, deses 16,5 millóns, A Guarda só recibirá unha partida de 50.000 euros, destinada ao proxecto do “Novo vial de acceso ao porto”. É irónico que a imaxe que acompaña esta nova fora tomada na Guarda, un dos concellos que menos recursos recibirá en 2025 por parte deste ente autonómico.

O Grupo Parlamentario do PSdeG-PSOE fíxonos chegar o pasado sábado os orzamentos da Xunta para que puidésemos estudalos e presentar as nosas propostas de emenda. Segundo o documento, a única asignación para A Guarda será de 50.000 euros para o vial de acceso ao porto.

No último pleno ordinario de setembro, o Partido Socialista presentou unha moción para instar a Carrero a reactivar de forma urxente o proxecto da saída sur ao porto, que o alcalde tiña "esquecido nun caixón" dende a súa chegada ao cargo. A moción foi aprobada por unanimidade, polo que Carrero tiña que "poñerse as pilas" e comezar a "petar portas" tanto na Xunta como na Deputación para conseguir o financiamento necesario para levar a cabo a obra.

A parte máis complicada do proxecto, que consistía en lograr que a Deputación redactase o proxecto e obter todas as autorizacións sectoriais favorables, xa fora completada polos/as socialistas. Agora, ao actual equipo de goberno só lles resta conseguir os fondos para executar a obra.

De momento, parece que a "recolecta de cartos" non vai demasiado ben, xa que só contamos con eses 50.000 euros da Xunta, unha cantidade insignificante tendo en conta que o custo total da obra ascende a máis de 1.700.000 euros.

Está claro que Carrero é un alcalde ineficaz para xestionar o Concello no día a día, pero tamén demostra ser incapaz de atraer investimento para a nosa localidade, nin sequera cando o seu propio partido goberna na Xunta.

En resumo, con Carrero na Alcaldía e o PP na Xunta, o futuro que nos agarda nos próximos tres anos pinta moi, pero que moi negro.

O Grupo Socialista da Guarda satisfeito de ver que se acomete outra obra xestionada na anterior lexislatura.

•  Estes días iniciáronse as obras de reforma integral no Bloque 1 do antigo colexio Sinde, sede de varias asociacións e grupos culturais da vila.
• A redacción do proxecto e unha subvención por valor de 709,738,81 € xa quedaran xestionadas polo anterior goberno socialista.

Os sucesivos gobernos socialistas apostaron polo antigo colexio Sinde como Centro Socio Cultural. Así, foron mellorando e facendo reformas nos distintos edificios que permiten ter neste espazo un albergue de peregrinos municipal, unha escola infantil, aulas de formación e espazos para as asociacións. Dándolle uso a uns edificios que no pasado, cando o goberno do PP e Fariñas saíu do goberno, estaban ao borde da ruína.

Vello colexio Sinde. Hoxe centro Socio Cultural

Neste proceso de modernización do espazo do Sinde vello o anterior goberno municipal socialista deixou xestionado (redactado e financiado) o “Proxecto de reforma integral edificio Sinde bloque 1”. A Deputación de Pontevedra aportaba para este proxecto 709,738,81 €.

A través da obra integral neste bloque (o máis próximo á Escola Infantil) crearanse espazos insonorizados para que os grupos podan ensaiar, despachos para as asociacións, salas de reunións e aulas de usos compartidos, mellorando a eficiencia enerxética e a accesibilidade do edificio.

Dita obra beneficiará non só ás asociacións e grupos que están instalados neste edificio, senón tamén a aquelas outras que se atopan situadas no outro bloque, e incluso ás que non dispoñan de local, xa que unha grande parte dos espazos están pensados para ter un uso compartido.

Dende que comezou o goberno de Carrero e Fariñas todas as obras con certa entidade que se están executando na Guarda son actuacións que deixara xestionadas o anterior goberno socialista.

Aínda que o traballo máis difícil está feito o tempo vai pasando de presa e os prazos vanse consumindo. En concreto a obra “Proxecto Básico e de Execución de Reforma Integral. Edificios Sinde, Bloque 1” ten de prazo de execución ata o 30 de abril de 2025. É practicamente imposible rematala en prazo. Conseguirá o goberno local unha prorroga da Deputación para dita obra ou perderá a subvención por tomarse este asunto con demasiada calma?.

Dada a nula xestión do goberno municipal, no momento actual, están en risco de perderse máis subvencións valoradas en millóns de euros. O problema xa non é a execución dos seus programas electorais. É que non dan executado os proxectos que quedaron financiados na anterior lexislatura polo goberno socialista. Isto é a consecuencia de ter un alcalde ausente (e algún concelleiro tamén).

Aínda así desde o Grupo Municipal Socialista alegrámonos moito de que, aínda que tarde, chegara este momento e estaremos atentos aos prazos para que A Guarda no perda nin un euro máis por mor do actual goberno.

Os/as Socialistas da Guarda acadan o compromiso de Carrero para retomar a saída súr

•  A portavoz socialista, Fátima Rodríguez, afirma que “é incomprensible que despois dun ano de mandato, e de que o Partido Socialista lle deixara o traballo totalmente encamiñado, o alcalde non teña avanzado un só paso neste proxecto tan vital para o noso concello. Durante anos, na oposición, fixo promesas e críticas, mais agora demostrou que as súas palabras eran só demagoxia”.

A semana pasada os/as socialistas levaron a pleno unha moción para esixir ao actual goberno que volva a retomar o proxecto da saída sur ao porto, tema que Carrero deixou “tirado nun caixón” desde que foi nomeado alcalde.

Grupo Municipal Socialista

"Este alcalde é experto en boas palabras e promesas, pero evita enfrontarse aos asuntos importantes porque, dun lado lle requiren moito traballo, e por outro os seus intereses non están na mellora da Guarda, senón nas súas propias aspiracións políticas. Vendo que só actúa nos temas cruciais cando se lle presiona, decidimos levar esta moción ao pleno", afirma a portavoz socialista.

Afortunadamente a moción aprobouse, e Carrero queda deste xeito comprometido coa Guarda a poñerse a traballar de forma inmediata pola saída sur ao porto, xa que no seguinte pleno ordinario, que será en novembro, deberá informar aos membros da corporación dos avances acadados.

Os/as socialistas esperan que o alcalde cumpra coa súa palabra e actúe conforme ao compromiso adquirido. Porén, lamentablemente, están afeitos/as a ver como fai promesas que logo non se materializan, e anuncian que seguirán vixiantes para asegurarse de que non volva deixar “aparcado” este proxecto tan importante.

A Xunta de Galicia executa as obras dun compromiso acadado polo anterior goberno socialista para o Castelo de Santa Cruz

•  O equipo de goberno socialista conseguira na anterior lexislatura a colaboración da Axencia de Turismo (Xunta de Galicia) para mellorar os camiños de acceso ao Castelo de Santa Cruz, e alumear artisticamente e de forma ecoeficiente a muralla.

• Fai uns días que xa podemos ver rematada a intervención que afectaba aos accesos ao Castelo, quedando aínda pendente de instalar a iluminación ornamental da muralla.

Os/as Socialistas somos conscientes de que o Patrimonio da Guarda é un dos bens máis prezados desta vila, e durante as últimas lexislaturas leváronse a cabo moitas xestións para tratar de protexelo e poñelo en valor.

Exemplo disto sería a firma deste convenio coa Axencia de Turismo da Xunta de Galicia, pero tamén diversas actuacións clave como a restauración e consolidación do xacemento do Barrio Mergelina, a reconstrución da porta norte do Castro, o proxecto Mar de Sal a través do que se recuperaron as Salinas do Seixal, ou a promoción de actividades de divulgación como as Barferencias ou as visitas guiadas.

Con todo, non podemos ocultar a nosa profunda tristeza ao ver como nos últimos tempos as nosas principais xoias patrimoniais, como o Castelo de Santa Cruz, as Salinas ou o Castro de Santa Trega, se atopan practicamente nun estado de abandono. Esta situación reflicte, unha vez máis, o total desleixo do actual equipo de goberno cara ao noso pobo.

A situación é tan preocupante que incluso o xornal Atlántico denunciou recentemente a falta de atención e coidado co que se está a tratar o noso patrimonio.

En relación ás obras no Castelo de Santa Cruz, celebramos que a Xunta de Galicia retomara e completara as melloras que quedaran pendentes. Non obstante, é imprescindible que o actual equipo de goberno comece a asumir a súa responsabilidade na protección e conservación do noso patrimonio, algo que, lamentablemente, non fixeron durante o tempo que levan gobernando.

Carrero deixa 1 ano “no caixón” o proxecto da Saída Sur ao Porto da Guarda.

•  A tan ansiada saída sur ao porto, un proxecto que os/as socialistas estabamos sacando adiante coa colaboración da Deputación de Pontevedra, e que quedara moi avanzado a finais da lexislatura pasada, leva todo un ano paralizado.

• A portavoz do partido socialista, Fátima Rodríguez, presentará unha moción ao pleno para que o actual equipo de goberno teña que comprometerse a seguir impulsando este proxecto.

As xestións para dotar á Guarda desta necesaria infraestrutura foran xa iniciadas a principios de marzo de 2017, ano no que o anterior alcalde da Guarda, Antonio Lomba, solicitou á Deputación de Pontevedra presidida pola socialista Carmela Silva, a redacción do proxecto desta infraestrutura, vinculada á humanización de Concepción Arenal.

Infografía do acceso sur do porto da Guarda

Despois de anos de trámites e antes do remate da anterior lexislatura, conseguíase o informe favorable de Patrimonio ao proxecto proposto. E, en xuño de 2023, co mandato de Carrero xa iniciado, publicábase no DOGA o informe favorable da Dirección Xeral de Calidade Ambiental, que definitivamente daba luz verde ao proxecto de construción dun novo acceso ao porto da Guarda.

Unha vez feitos estes trámites, que realmente eran os máis complicados, o actual alcalde debería ter “movido ficha” neste asunto durante este ano, pero non foi así. Fai unhas semanas solicitamos acceso ao expediente para saber en que punto se atopaba o tema, e cando nolo deron puidemos comprobar que todo o procedemento quedara paralizado xusto no punto no que nós o deixáramos.

Todo isto ven a demostrar, unha vez máis, que todos eses asuntos que parecían preocuparlle tanto a Carrero cando estaba na oposición e sobre os que facía tanta demagoxia, agora pasaron a un segundo ou terceiro plano.

Preguntámonos se este goberno vai a seguir paralizando todos os proxectos importantes para A Guarda, e se Carrero vai a seguir no seu papel de “alcalde ausente” os próximos tres anos de lexislatura.

Tamén nos gustaría saber se Roberto vai a preocuparse nalgún momento dos asuntos da Guarda, porque aínda que vaia aos eventos e se saque fotos para aparentar actividade, este alcalde non lle dedica suficiente tempo ao Concello, e ás probas nos remitimos: subvencións perdidas, proxectos paralizados, falta de mantenemento, ausencia de novas iniciativas, etc.

Nós, pola nosa parte, e demostrando o noso compromiso coa Guarda levaremos a pleno unha moción para que o equipo de goberno teña que comprometerse a seguir adiante con este proxecto, e sobre todo non se perdan todos os avances feitos desde 2017, avances aos que costou moito esforzo e tempo chegar.

O Concello da Guarda alarma á veciñanza enviando, dunha soa tandada, máis de 3.000 notificacións para limpeza de fincas.

 Estes días moitos veciños e veciñas da Guarda están recibindo notificacións firmadas polo alcalde da Guarda, que os/as informa da súa obriga de facer a limpeza das súas fincas, expoñéndose de non facelo a multas de entre 1.000 e 100.000€

Estas notificacións deberían ter sido enviadas de forma paulatina (non as máis de 3.000 ao mesmo tempo), e sobre todo antes do verán, xa que o obxectivo deste control é a prevención de incendios, para o que as fincas deberían estar limpas antes dos meses de máis calor.

Para colmo, as notificacións están enviándose de forma indiscriminada a todas as persoas propietarias de fincas nas franxas sensibles. Varios veciños e veciñas informáronnos de que, a pesares de ter limpas as súas propiedades, tiveran recibido igualmente as notificacións.

Nesas notificacións obrígase á limpeza das fincas baseándose en inspeccións realizadas durante o ano pasado...é dicir, envían avisos tomando como referencia inspeccións feitas fai máis de 6 meses?.

E preguntámonos: Como pensa Roberto Carrero que a veciñanza vai a facer fronte a limpeza de todas esas fincas? Nalgunhas delas non basta con que o propio veciño ou veciña acuda cunha desbrozadora, xa que hai que retirar acacias e outras especies arbóreas prohibidas, o que require na maior parte dos casos da contratación de empresas especializadas.

Non existen na zona do Baixo Miño, e ata Vigo tantas empresas que podan facer todo ese traballo nos 15 días que o Concello fixa de prazo máximo.

Cando a xente acude ao Concello a informarse danlles como resposta que o tema “é cousa da Xunta”, pero sen embargo vemos que noutros concellos limítrofes non se están enviando este tipo de notificacións masivas e indiscriminadas, así que, por que na Guarda si?.

Estamos por tanto ante outra mostra da falla de planificación, e das “chapuceiras” formas de actuar deste equipo de goberno, pero sobre todo da pouca empatía que Roberto Carrero e o seu equipo teñen pola veciñanza guardesa.

A Conta Xeral non minte: Os/as socialistas non deixaron o Concello da Guarda “sen un duro”.

O balance do 2023 foi, segundo a Conta Xeral, positivo en todos os aspectos. Gustaríanos que Carrero e o seu equipo deixaran de intentar esconder a súa incapacidade para xestionar o Concello detrás de bulos.

O ano pasado, Carrero e o Tenente Alcalde, aseguraban a distintos medios de comunicación que os/as socialistas nos “pulíramos” o diñeiro do Concello e que as arcas municipais estaban “sen un duro”. Mentirosos, ou ignorantes??.

Grupo Municipal Socialista 2024

Fai unhas semanas publicouse a Conta Xeral, que é ese documento que elabora unha vez ao ano o Departamento Económico do Concello, e no que queda reflexada a situación económica do Concello.

Documento que demostra que todo o que estes señores dicían non era máis que un bulo. E para desmontalo simplemente imos a dar tres datos significativos que extraemos da Conta Xeral do 2023 do Concello da Guarda:

1. O saldo en bancos do Concello a 31/12/23 era de 3.270.640,30€.
2. O resultado entre ingresos e gastos foi positivo, e dicir houbo máis ingresos que gastos, quedando un resultado orzamentario positivo de 962.012,08€.
3. O Concello conta cun remanente positivo de 1.711.762,20€, que pode ser utilizado para financiar obras e inversións.

Os/as políticos/as poden dicir o que lles pete, pero os números son os que son!